Рабочая паездка ў Крупскі раён Мінскай вобласці

Прэзідэнт Беларусі Аляксандр Лукашэнка 2 верасня прадоўжыў серыю паездак па тэме развіцця сельгасвытворчасці і аграпрамысловага комплексу. Ён наведаў Крупскі раён Мінскай вобласці.

Кіраўнік дзяржавы абазначыў галоўнай тэмай сваёй рабочай паездкі далейшую мадэрнізацыю сельскай гаспадаркі і работу з неэфектыўна працуючымі гаспадаркамі.

"Тэма сённяшняга нашага ўрока - далейшая мадэрнізацыя сельскай гаспадаркі. Падтэма - ратаванне тых, хто патанае", - сказаў Кіраўнік дзяржавы.

У першую чаргу Прэзідэнт спытаў віцэ-прэм'ера Леаніда Зайца аб яго ацэнцы работы ў Крупскім раёне ў аграсектары. "Добрая", - адказаў віцэ-прэм'ер. І прывёў у пацвярджэнне шэраг лічбаў аб росце паказчыкаў. Значна павысілася і эфектыўнасць работы на землях, якія былі перададзены агракамбінату "Дзяржынскі".

Як растлумачыў Прэзідэнт, палова гаспадарак у краіне добра працуе. З астатніх палова - гэта гаспадаркі, якія пры пэўнай дапамозе і падтрымцы выкарабкаюцца, адзначыў ён. Але ёсць чвэрць ад усіх гаспадарак, якіх трэба ўратаваць. "Таму што там ёсць людзі, якія хочуць працаваць, урадлівыя землі", - падкрэсліў беларускі лідар.

Ён расказаў, што ёсць некалькі шляхоў для рэалізацыі гэтай задачы.

Некаторыя сельгаспрадпрыемствы і землі давядзецца аб'ядноўваць, ствараючы новыя гаспадаркі фактычна з нуля, як гэта зрабілі, напрыклад, у Мядзельскім раёне.

Іншыя гаспадаркі будуць далучаць да прампрадпрыемстваў. Такая практыка ў краіне ўжо напрацавана. "Ад гэтага нікуды не дзенешся і гэта справядліва. Усё ж такі прампрадпрыемствы выцягваюць людзей з вёскі. Таму даўгі трэба аддаваць", - заўважыў Аляксандр Лукашэнка. Адпаведныя падыходы Кіраўнік дзяржавы нядаўна ўзгадніў у Гомельскай вобласці.

"Далучаць стратныя гаспадаркі да прампрадпрыемстваў будзем прадаўжаць і далей", - дадаў Кіраўнік дзяржавы.

На прыкладзе Крупскага раёна бачны трэці шлях, які заключаецца ў супадзенні інтарэсаў. З аднаго боку, у раёне былі землі, якія не давалі жаданага выніку. З іншага - у Мінскай вобласці вялікі перапрацоўшчык і вытворца - агракамбінат "Дзяржынскі", які меў патрэбу ў дадатковых сельгасугоддзях для вытворчасці прадукцыі, кармоў для патрэб птушкагадоўлі і жывёлагадоўлі. Замест закупкі па імпарце прадпрыемства ўзяло землі ў Крупскім раёне і наладзіла там эфектыўную вытворчасць.

"Птушку сенажом і сіласам не накорміш. Ён (кіраўнік "Дзяржынскага". - Заўвага) мог бы закупляць гэта зерне недзе ў Расіі і жыў бы прыпяваючы. Але ў чым яго каштоўнасць (малайчына, і губернатар малайчына) - землі пачалі аддаваць. Узворвай, атрымлівай зерне і кармі курэй", - адзначыў беларускі лідар.

"Я падвёў да чаго - не толькі паказаць формы і метады пад'ёму гэтых 25% гаспадарак, якія па краіне яшчэ ў цяжкім стане, але каб ваш кантроль перш за ўсё, Леанід Канстанцінавіч (віцэ-прэм'ер Леанід Заяц. - Заўвага), Камітэта дзяржкантролю - ніякага збожжа з боку мы закупляць не павінны. У нас хапае зямлі для таго, каб вырошчваць тут зерне, карміць птушку, свіней, перапрацоўваць гэта зерне ў добрыя камбікармы і карміць жывёлу. Атрымліваць мяса, малако. Вось простая арыфметыка", - растлумачыў Прэзідэнт.

Такім чынам, навінка ў Крупскім раёне якраз заключаецца ў адным з падыходаў да вырашэння вышэй акрэсленай праблемы. "Вось гэта праблема, якую я асабіста хацеў бы ўбачыць і паказаць усім, і засяродзіць увагу, што гэта добры шлях і добрая справа", - адзначыў Кіраўнік дзяржавы.

Адначасова Аляксандр Лукашэнка падкрэсліў, што вырашаецца і дзяржаўная задача. І ў гэтым тоіцца адна з галоўных прычын, чаму ён выступае за захаванне і развіццё буйнатаварных гаспадарак, так званых калгасаў і саўгасаў.

"Яму (кіраўніку агракамбіната. - Заўвага) патрэбна зямля. А нам патрэбна, каб ён і людзей дагледзеў. Чаму я трымаюся за буйнатаварныя гаспадаркі - калгасы, саўгасы, таму што яны выконваюць сацыяльную функцыю, утрымліваюць вёску. І мы тут ствараем аграгарадкі. Гэта працэс працяглы. Мы будзем тут доўга яшчэ працаваць, каб дарогі былі добрыя, гандаль быў, дзіцячыя сады, школы і гэтак далей і да таго падобнае, - сказаў Аляксандр Лукашэнка. - Яны цягнуць на сабе гэту сацыялку. Таму для мяне кіраўнікі прадпрыемстваў - людзі дзяржаўныя. Мы за іх трымаемся".

Прэзідэнт заўважыў, што можна стварыць і фермерскія гаспадаркі, калі будуць фермеры, раздаць землі, але фермер ужо можа не несці сацыяльную нагрузку. "Але ў нас і фермеры нясуць гэту сацыяльную нагрузку. Таксама малайцы. Таму што ў нас такая палітыка ў дзяржаве: хочаш забраць землі ўчарашняга калгаса - калі ласка, з вёскай, вытворчымі памяшканнямі, даводзь да розуму, працуй. Вось палітыка ў вёсцы, - падкрэсліў Аляксандр Лукашэнка. - Гэтым самым мы падымаем, ратуем вёску і даём работу людзям на зямлі. Так павінна быць. Гэта наша палітыка ў сельскай гаспадарцы".

Прэзідэнт упэўнены, што ў гэтай сферы патрэбны кантроль, каб не атрымаць негатыўныя прыклады дзяльбы зямель, як у некаторых суседзяў, у прыватнасці ва Украіне. "Усюды патрэбны кантроль. Гэта палітыка ў тым ліку па накіраванні фермерства. Я не хачу, каб фермеры, пачуўшы гэта, падумалі, што мы супраць іх. Не, калі ласка. Калі б прыехалі сюды фермеры замест яго (агракамбіната. - Заўвага), 40% гэтых зямель узялі (у Крупскім раёне. - Заўвага), людзям далі работу, жыллё будавалі, дапамагалі, стваралі такую вытворчую базу... Калі ласка, мы рады былі б!" - сказаў Прэзідэнт.

Аляксандр Лукашэнка таксама нагадаў аб сваім даручэнні, дадзеным у час рабочай паездкі ў Гродзенскую вобласць, аб патанненні будаўніцтва жылля ў вёсцы. "Трэба будаваць жыллё і прыцягваць людзей сюды", - сказаў ён.

Прэзідэнт звярнуў увагу і на кадравае пытанне, працоўную дысцыпліну, недапушчэнне расхлябанасці ў гэтай сферы. "Гэта не прыгоннае права. Але калі мы хочам захаваць, выратаваць сябе, - гэта пытанне бяспекі, нацыянальных інтарэсаў, незалежнасці. Кадры вырашаюць усё", - падкрэсліў ён.

"Шляхі знойдзены. Гэта ўжо рух па гэтых шляхах да ўдасканалення сельскай гаспадаркі, каб усюды было як тут - прыгожа і добра", - рэзюмаваў Кіраўнік дзяржавы.

Аляксандр Лукашэнка наведаў мясаперапрацоўчы цэх. Яму далажылі аб стане і перспектывах развіцця АПК Мінскай вобласці, у тым ліку інтэграцыйных структур.

Губернатар Мінскай вобласці Аляксандр Турчын прапанаваў 50% сродкаў з інавацыйнага фонду Мінскага аблвыканкама накіроўваць на фінансаванне інвестыцыйных праектаў, такіх як у Крупскім раёне. Тут збіраюцца будаваць дадатковыя птушнікі. 

"Цалкам магчыма", - адрэагаваў Кіраўнік дзяржавы, даручыўшы пры бюджэтным планаванні на наступны год разгледзець і ўлічыць адпаведныя пытанні. Ён акцэнтаваў увагу на важнасці аператыўнага правядзення меліярацыйных работ.

Прэзідэнт таксама адзначыў неабходнасць нарыхтоўкі якасных кармоў. "Гэты год трэба зрабіць такім базавым, вызначальным, і мы будзем тады і ў будучым лічыць гэтыя ўсе працэнты ўраджайнасці зыходзячы з гэтага года, таму што гэта нядрэнны год", - сказаў Кіраўнік дзяржавы.

Як далажыў Прэзідэнту Міністр сельскай гаспадаркі і харчавання Ігар Брыло, у краіне засталося ўбраць менш як 3% плошчаў. Ураджай збожжавых і зернебабовых, як плануецца, будзе не менш як 10,7 млн т.

"Мы затачылі ўсіх: збожжа, збожжа, збожжа. Але кукурузу трэба паглядзець. Трэба каб быў кукурузны сілас. Не трэба гнаць да 11 млн т збожжа. Трэба акуратна разабрацца, што нам трэба ад кукурузы: або зерне, або пакласці добры сілас, - падкрэсліў Аляксандр Лукашэнка. - Проста не трэба гнаць для таго, каб пабольш, пабольш, пабольш  збожжа, і мы будзем хваліцца. Разумна падыходзіць".

Кіраўнік дзяржавы таксама звярнуў увагу на аператыўную сяўбу азімых: "Мы зразумелі, што азімыя трэба сеяць, павялічваць, павялічваць плошчы".

Яшчэ адно не менш важнае пытанне - пад'ём ільнотрасты. Прэзідэнт папярэдзіў, што ў канцы восені мае намер наведаць Аршанскі льнокамбінат, дзе будуць абмяркоўвацца перспектывы льноперапрацоўкі.

Наведваючы ў раёне аб'екты агракамбіната "Дзяржынскі", Аляксандр Лукашэнка азнаёміўся з вытворчымі магчымасцямі прадпрыемства і перспектывамі яго развіцця. Як расказаў генеральны дырэктар агракамбіната Уладзімір Лук'янаў, запланавана будаўніцтва новых малочнатаварных ферм, завода па перапрацоўцы нехарчовай жывёльнай сыравіны, аб'ектаў па атрыманні мяса індычкі.

"У бліжэйшай перспектыве кампанія павінна выйсці на мільярд рублёў", - сказаў Уладзімір Лук'янаў.

На агракамбінаце разлічваюць да 2025 года наладзіць штогадовую вытворчасць 110 тыс. т мяса птушкі куранят-бройлераў, 6 тыс. т мяса індычкі, 91 млн яек.

"На рынку попыт на птушку ёсць? Павялічвацца будзе?" - удакладніў Прэзідэнт.

Паводле слоў Уладзіміра Лук'янава, праблем з попытам на прадукцыю няма як унутры краіны, так і за мяжой. Наадварот, ён нават расце. Калі праблем са збытам няма, трэба павышаць рэнтабельнасць продажаў, а для гэтага неабходна пашыраць вытворчасць, адзначыў Аляксандр Лукашэнка.

"Трэба ўзбуйняцца, - перакананы Кіраўнік дзяржавы. - Гэта не трэба зацягваць".