Аляксандр Лукашэнка падпісаў Дырэктыву аб недапушчальнасці росту цэн
Прэзідэнт Беларусі Аляксандр Лукашэнка па выніках нарады аб цэнавай сітуацыі ў краіне 6 кастрычніка падпісаў Дырэктыву № 10 "Аб недапушчальнасці росту цэн".
Дакумент прыняты ў мэтах неадкладнага і жорсткага рэагавання на сітуацыю, якая склалася на спажывецкім рынку. Для абароны інтарэсаў грамадзян і арганізацый Беларусі, недапушчэння далейшага росту цэн, устанаўлення эфектыўнай сістэмы цэнавага кантролю і забяспечанасці ўнутранага спажывецкага рынку таварамі дырэктывай уводзіцца забарона на павышэнне цэн і абавязацельствы па безумоўным насычэнні ўнутранага рынку таварамі і паслугамі.
Дакументам таксама прадугледжваецца адказнасць за неналежнае выкананне ўстаноўленых у Дырэктыве патрабаванняў.
Для выпрацоўкі мер па рэгуляванні цэн створана рабочая група на чале са Старшынёй Савета Рэспублікі Наталляй Качанавай. Рабочай групе даручана ў дзесяцідзённы тэрмін распрацаваць і прадставіць у Савет Міністраў прапановы аб мерах па ўдасканаленні цэнавага рэгулявання, забяспечыць на пастаяннай аснове маніторынг цэн і стану спажывецкага рынку, інфармаваць кантралюючыя і праваахоўныя органы аб выяўленых парушэннях для прыняцця мер рэагавання.
Перад Урадам пастаўлена задача да 20 кастрычніка на аснове прапаноў рабочай групы зацвердзіць і ўвесці ў дзеянне сістэму рэгулявання цэн, забяспечыць эфектыўны кантроль за цэнавай дысцыплінай.
