Сустрэча з вядомым палітычным і дзяржаўным дзеячам Украіны Аляксандрам Марозам

Прэзідэнт Беларусі Аляксандр Лукашэнка 14 лютага сустрэўся з вядомым палітычным і дзяржаўным дзеячам Украіны Аляксандрам Марозам.

"Што датычыцца нашых узаемаадносін, я думаю, няма сэнсу расказваць Вам аб гэтых адносінах. Няма сэнсу аналізаваць іх з пункту гледжання хто мае рацыю, хто вінаваты. Усё Вы цудоўна, як вопытны, мудры чалавек, разумееце. Разумееце, што адбываецца, - адзначыў Кіраўнік дзяржавы. - Але яшчэ раз хачу публічна сказаць Вам, што мы да абвастрэння нашых адносін практычна не маем ніякага дачынення. Мы праводзілі выразную, зразумелую палітыку для ўкраінскага народа. Я і цяпер прытрымліваюся гэтай палітыкі. Мы родныя людзі, мы суседзі. Гэта ад бога. І ўсё гэтым сказана. І будучыня наша павінна такім чынам складвацца, як у суседзяў".

Звяртаючыся да Аляксандра Мароза, Кіраўнік дзяржавы падзякаваў яму за тое, што той застаецца стойкім, прыхільным да сваіх ідэй чалавекам: "Я памятаю добра нашы сустрэчы, размовы. Скажу шчыра, тады ў палітыцы шмат было розных людзей. Але я спадзяваўся, што Вы не згубіцеся. Спектр меркаванняў быў шырокі. Вы памятаеце гэта не горш за мяне. І я вельмі рады, што мы з Вамі сустракаемся дзякуючы таму, што Вы захавалі мужнасць і стойкасць, не разгубілі свае перакананні ў той няпростай сітуацыі, якая складваецца вакол нас - вакол Украіны, Беларусі".

У сваю чаргу Аляксандр Мароз адзначыў, што доказам слоў, сказаных Прэзідэнтам аб адносінах з Украінай, з'яўляюцца амаль 200 тыс. украінцаў, якія прапісаліся і жывуць цяпер у Беларусі. "Я шмат адказваў на гэтыя пытанні ва Украіне. Таму што я размаўляў са сваімі землякамі. На працягу чатырох месяцаў я другі раз у Беларусі. Тое, што я бачу, гэта няма з чым параўноўваць. Таму што ёсць адчуванне, што дзяржава развіваецца, і развіваецца паспяхова", - сказаў ён.

Украінскі палітык таксама расказаў, што, знаходзячыся ў бальніцы, напісаў кнігу пад назвай "У чырвоным аддзяленні". І ў ёй змяшчаецца вывад аб тым, што ў "чырвоным аддзяленні" на сённяшні дзень апынулася ўся Украіна. "Але тут вельмі важна, якая хвароба, які дыягназ, які пратакол лячэння і ўсё іншае. На жаль, я аб гэтым адкрыта гаварыў і на месцы, і на рэдкіх сустрэчах з нашымі журналістамі (таму што ім, разумею, сёння гэта не прынята рабіць): галоўны дыягназ - гэта бездзяржаўнасць, гэта залежнасць ад знешняга кіравання, з чым нельга змірыцца", - адзначыў Аляксандр Мароз.

"Я ўжо гляджу, вашы палітыкі пачынаюць адбрыквацца ад агульнай лініі Захаду. Разумееце, я дакладна ведаю, што патрэбна сёння тут Захаду: трэба развязаць канфлікт. Вы ўжо ведаеце, яны ўмеюць чужымі рукамі. А яшчэ лепш паваяваць чужымі рукамі, чужымі людзьмі: няхай гінуць украінцы, рускія, беларусы - гэта далёка", - адзначыў Аляксандр Лукашэнка.

Прэзідэнт звярнуў увагу, што на Захадзе цяпер пастаянна гучыць тэма аб нападзенні Расіі на Украіну. "Паслухайце, калі б планавалі нейкую вайну супраць Украіны, зусім інакш паводзілі б сябе сродкі масавай інфармацыі. Таму што СМІ - гэта артпадрыхтоўка сучаснай вайны, - падкрэсліў Кіраўнік дзяржавы. - І як толькі сціхаюць на імгненне гэтыя крыкі аб вайне ва Украіне, з Амерыкі зноў ідзе сігнал і гэта істэрыя пачынае падагравацца. Таму зразумела, каму патрэбна гэта вайна".

"Да гэтай істэрыкі (вакол беларуска-расійскага вучэння. - Заўвага) мы прынялі рашэнне аб вучэннях на поўдні нашай рэспублікі. Мы іх павінны былі праводзіць самі для таго, каб вызначыцца, дзе нам трымаць невялікую колькасць войскаў у сувязі з тым, што адбываецца ва Украіне: гэты паток зброі, нашы збеглыя, фарміраванне лагераў, абучэнне. Адтуль ідзе прыток гэтых дыверсантаў, шчыра кажучы", - канстатаваў Кіраўнік дзяржавы.

Таму, падкрэсліў ён, у Беларусі вырашылі ўзмацніць граніцу ў гэтым напрамку. У той жа час, адзначыў Прэзідэнт, неабходна захаваць добрыя адносіны з украінцамі, жыхарамі пагранічча, якія па спрошчаным рэжыме перасякалі граніцу Беларусі ў сезон збору грыбоў і ягад. "Мною было прынята рашэнне: мы правядзём вучэнні і ў выніку вызначымся, на якіх напрамках нам трэба трымаць нейкія ўзброеныя сілы. Потым сустрэліся з Пуціным, і я гавару: "Давай правядзём сумесныя вучэнні". Усё ж такі ППА агульная, шмат агульнага, вучэбныя цэнтры мы стварылі: Расія дала нам зброю, C-400, "Іскандэры" і іншую сучасную тэхніку, каб мы маглі яе вывучаць, - расказаў Аляксандр Лукашэнка. - Ён згадзіўся, кажа: "Добра, мы падключымся". Падключыліся. Дык чаго крычаць, што мы тут супраць Украіны нешта ствараем. Гэта значыць зусім іншы фон".

"Сёння гвалтам крычаць: "Калі выведзеце войскі? (расійскія з Беларусі. - Заўвага)". Слухайце, гэта наша справа з Пуціным, - падкрэсліў беларускі лідар. - Мы ў бліжэйшы час сустрэнемся і прымем рашэнне, калі, у якія тэрміны, па якім графіку выводзіць адсюль Узброеныя Сілы Расійскай Федэрацыі. Гэта наша справа".

"Паглядзіце, што робяць амерыканцы: яны тысячамі перакідваюць да нашай граніцы, непасрэдна ў Польшчу, Прыбалтыку. Брытанцы і іншыя еўрапейскія краіны перакідваюць узброеныя сілы. Паўстае слушнае пытанне: вы калі іх выведзеце адсюль? Яны аб гэтым не гавораць, а націскаюць на нас. Выведзем тады, калі вырашым з Прэзідэнтам Расіі гэта зрабіць і калі скончацца тут вучэнні. Гэта мы будзем прымаць рашэнне: гэта наша тэрыторыя", - сказаў Кіраўнік дзяржавы.

"Гэта брахня наконт таго, што Лукашэнка гатовы напасці на Украіну: слухайце, мне гэта ніколі не трэба было, не трэба і цяпер. Але тое, што робяць вашы ўлады супраць Беларусі, гэта наогул аналізу не паддаецца, розуму недаступна", - падкрэсліў Аляксандр Лукашэнка.

Прэзідэнт адзначыў, што ва Украіне цяпер вырашылі адмовіцца ад беларускіх калійных угнаенняў і папрасілі Амерыку дапамагчы замясціць гэты тавар. Але ў ЗША адмовілі, паколькі яны самі ў асноўным закупляюць калій у Канадзе. "Гэта трэба ў Амерыку звяртацца, каб закупіць! А ўявіце, якая цана: здабыць, перапрацаваць, адвезці, чыгуначным транспартам, у партах пагрузіць, сюды за тысячы кіламетраў, тут зноў перавалка, зноў чыгуначны транспарт, пакуль давязуць да сялян... На парадак даражэй будзе. Навошта вы гэта робіце пры такой сітуацыі?" - выказаў неўразуменне Кіраўнік дзяржавы.

У той жа час, звярнуў увагу Аляксандр Лукашэнка, Беларусь заўсёды гатова падставіць плячо Украіне. Нядаўна, напрыклад, ва Украіну па яе запатрабаванні былі пастаўлены дадатковыя аб'ёмы электраэнергіі.

"Навошта наперадзе ўсёй планеты закрылі неба для пералёту нашых самалётаў? Ну, абляцім мы. А калі мы з Расіяй дамовімся і Расія закрые вылет самалётаў з Украіны - і ўкраінскіх, і іншых? І паставіць кропкі ўваходу ў Расію праз Беларусь, што будуць рабіць? Разумееце, бязглуздасць, - эмацыянальна выказаўся Прэзідэнт. - Няхай, літоўцы: ва ўлад Літвы даўно мазгоў няма. Але Украіна навошта гэта робіць? Навошта гэта ўсё было разбураць?"

Аляксандр Лукашэнка адзначыў, што ў папярэднія гады прыклаў шмат намаганняў, каб арганізаваць дыялог паміж украінскім і расійскім кіраўніцтвам і ўрэгуляваць канфлікт. "І мы шмат аб чым дамовіліся. І Парашэнка згадзіўся. Але потым каманда "Не!" прыйшла з-за акіяна, і ён адышоў ад гэтых спраў. Ужо ў Данбасе не было б вайны. Пуцін паабяцаў грошы - аднавіць Данбас. Людзі спакойна жылі б. Не. Гэта што за палітыка?" - спытаў Прэзідэнт.

"Аляксандр Рыгоравіч, вы цудоўна разумееце, што гэта палітыка не Украіны. Гэта выкананне чужой палітыкі", - коратка адказаў Аляксандр Мароз.

"Аб гэтым і размова", - рэзюмаваў Кіраўнік дзяржавы.