Сустрэча з кіраўнікамі выбарчых органаў краін СНД

Прэзідэнт Беларусі Аляксандр Лукашэнка 19 верасня сустрэўся з кіраўнікамі выбарчых органаў краін СНД.

"Ідучы да вас на сустрэчу, улічваючы свой багаты вопыт кіраўніцтва краінай, я ўспамінаю тыя часы, калі ўзначаленыя вамі органы толькі ствараліся. Скажу шчыра: гэта і ёсць добры, станоўчы прадукт дэмакратыі і дэмакратызацыі нашага грамадства ў тыя часы. Мы доўга спрачаліся: трэба нам выбарчыя камісіі, не трэба, вывучалі вопыт іншых краін, дзе, напрыклад, і Міністэрства ўнутраных спраў можа кантраляваць, арганізоўваць і рабіць адпаведнае заключэнне па выбарах. Але, ідучы дэмакратычным шляхам, мы стварылі нашы выбарчыя камісіі, вертыкаль - ад цэнтральнай да адпаведных раёнаў, акруг і гэтак далей. І я павінен сказаць, што гэта адзін з тых выпадкаў, калі мы не памыліліся", - падкрэсліў Аляксандр Лукашэнка.

Аднак у краінах СНД тады не маглі і ўявіць, што дзейнасць выбарчых органаў і іх зона адказнасці стане полем для баявых дзеянняў, заявіў Прэзідэнт. "Вы часта змагаецеся, дзякуй богу, не ўсюды паасобку, але тым не менш вам хапае", - дадаў Кіраўнік дзяржавы.

Аляксандр Лукашэнка адзначыў, што Кансультатыўны савет кіраўнікоў выбарчых органаў дзяржаў - удзельніц СНД створаны зусім нядаўна. Паводле яго слоў, гэта сведчыць аб тым, якое вялікае значэнне ў краінах Садружнасці надаецца арганізацыі выбараў і рэферэндумаў, удасканаленню выбарчага заканадаўства.

"Электаральныя кампаніі ўжо даўно перасталі быць тэхнічнай працэдурай. Гэта ўжо, будзем гаварыць адкрыта, поле бою ў перадвыбарны і выбарны перыяды, дзе галоўнай дзеючай асобай з'яўляюцца органы Цэнтральнай выбарчай камісіі і выбарчая камісія наогул", - падкрэсліў Прэзідэнт.

Ён заўважыў, што сёння выбары сталі адной з галоўных палітычных падзей у жыцці любой краіны. У той жа час Аляксандр Лукашэнка лічыць, што гэта павінен быць звычайны палітычны працэс, якому не варта надаваць вельмі вялікага значэння.

"Якасная падрыхтоўка выбараў, празрыстасць, сумленнасць гарантуюць падтрыманне палітычнай стабільнасці, захаванне міру і парадку ў грамадстве. У гэты перыяд кожнае слова з вашых вуснаў вельмі сур'ёзна ўспрымаецца, і народы нашы прывыклі верыць у тое, што гаворыць старшыня Цэнтральнай выбарчай камісіі і падпарадкаваныя яму структуры", - звярнуў увагу Кіраўнік дзяржавы.

Аляксандр Лукашэнка канстатаваў, што апаненты ўлады заўсёды спрабуюць выкарыстаць электаральны перыяд ва ўласных інтарэсах, нярэдка нават з дапамогай рэвалюцыйных і мяцежных метадаў.

"Усе мы зведвалі такія выпрабаванні, Беларусь у тым ліку - у 2020 годзе. Але мы заўсёды шчыра і сумленна прызнавалі, што не бывае так, што вось з-за мяжы на нас націснулі, і мы пачынаем або хістацца, або ў нас нехта па вуліцах пачынае бадзяцца. Значыць, ёсць і ўнутраныя нейкія прычыны. Мы гэтыя прычыны ведаем, мы іх дакладна вызначылі і зрабілі адпаведныя вывады, атрымалі ўрокі з тых падзей, каб не паўтарылася гэта зноў", - сказаў Прэзідэнт.

Сярод прынятых мер - маштабныя змяненні заканадаўства. Так, у Канцэпцыі нацыянальнай бяспекі Беларусі быў замацаваны тэрмін "электаральны суверэнітэт". Размова ідзе пра абарону нацыянальных інтарэсаў, неад'емнае права дзяржавы праводзіць выбары і рэферэндумы без аглядкі на вокрыкі і націск звонку.

"Мы з нашымі сябрамі, партнёрамі, у першую чаргу з краінамі СНД, гатовы абмяркоўваць напрацоўкі нашага заканадаўства, забеспячэння бяспекі выбарчага працэсу. Вельмі важна, што існуе такая міжнародная пляцоўка, як наш савет, якая стала месцам эфектыўнага ўзаемадзеяння напярэдадні электаральных кампаній, а як сведчыць ваша практыка - наогул у жыцці, не прывязваючыся ні да якіх кампаній. Я не раз гаварыў, што нам трэба дзейнічаць сумесна, выпрацоўваць агульныя прынцыпы дзейнасці нашых цэнтральных камісій, выпрацоўваць законы, падзаконныя акты і напрацоўваць практыку, каб у нас не было вялікіх разыходжанняў", - дадаў беларускі лідар.

"Трэба вывучаць і сусветны вопыт. Наўрад ці мы там нешта пяроймем, напэўна, мы ўсё ўжо вывучылі і прынялі ў сябе дома адпаведныя рашэнні. Важна распрацоўваць уласныя стандарты, і галоўны стандарт, якога мы з вамі заўсёды прытрымліваемся, - гэта не тое, як нам навяжуць нейкія прынцыпы "па паняццях" з боку АБСЕ ці яшчэ якіх-небудзь арганізацый, а тое, наколькі будуць адпавядаць нашы законы і падзаконныя акты Канстытуцыі і наколькі выбары будуць адпавядаць таму заканадаўству, якое прынята ў нашых краінах. Гэта галоўнае", - падкрэсліў Аляксандр Лукашэнка.

Кіраўнік дзяржавы нагадаў, што ў Беларусі хутка пройдзе прэзідэнцкая электаральная кампанія, і ў краіне зыходзяць менавіта з агучаных ім прынцыпаў. "Беларускі народ павінен сам, без усялякага націску вызначыць, хто будзе ўзначальваць краіну", - заявіў Прэзідэнт.

"Што датычыцца СНД, мы заўсёды за тое, каб вашы прадстаўнікі і вы былі ў нас на выбарах. Для нас гэта вельмі важна. Ваша сяброўская парада, заўвага ці нават крытыка ўспрымаюцца сур'ёзна", - сказаў Аляксандр Лукашэнка.

Паводле яго слоў, пасля таго як у Беларусі будуць назначаны прэзідэнцкія выбары, Місіі наглядальнікаў ад СНД будзе накіравана адпаведнае запрашэнне.

"Сёння мы думаем, што рабіць з так званымі замежнымі наглядальнікамі, таму што мы ведаем: іх прыезд - гэта падрыхтаваныя дакументы, якія яны потым абвесцяць і падпішуць", - звярнуў увагу Прэзідэнт.

Кіраўнік дзяржавы заявіў, што гэта інфармацыя стала вядома дзякуючы рабоце спецслужбаў. Яны высветлілі, што апошні раз заходнія наглядальнікі прыбылі на выбары сапраўды з падрыхтаванымі рашэннямі, заставалася толькі абвясціць іх, што і было зроблена. "Значыць, іх не цікавіць гэты працэс, яны ўжо загадзя вызначылі тое, што будуць рабіць у нашай краіне, і падагульняючую заяву", - дадаў ён.

"Таму мы думаем, будзем з вамі раіцца ў тым ліку, з прадстаўнікамі Расійскай Федэрацыі - гэта наша бліжэйшая саюзная краіна, як нам зрабіць у гэтай сітуацыі. Нам, вядома, хацелася б, каб яны ўбачылі і расчараваліся ў тым меркаванні, з якім яны прыедуць да нас. Але мы не можам дапусціць, каб яны зноў прыехалі са сваімі талмудамі і зрабілі адпаведную заяву, якая падрыхтавана ўжо або якая напісана не іх рукой", - падкрэсліў Аляксандр Лукашэнка.

Немалаважна таксама гарантаваць належны ўзровень бяспекі выбарчага працэсу і забяспечыць давер грамадзян да яго вынікаў. "Асабліва на моладзь звяртаем увагу. Тут у полі зроку перш за ўсё палітычная дасведчанасць моладзі. Трэба растлумачваць, расказваць людзям, як мы будзем жыць пасля выбараў. Моладзь з'яўляецца - і гэта не сакрэт - асноўным вулічным сродкам каляровых рэвалюцый, таму асаблівую ўвагу мы ўдзяляем моладзі. Трэба шукаць агульныя падыходы з маладымі выбаршчыкамі, і калі ў вас ёсць такі вопыт, вы падзяліцеся ў ходзе наведвання Беларусі", - дадаў Аляксандр Лукашэнка.

Прэзідэнт упэўнены, што ўзаемадзеянне цэнтральных выбарчых органаў краін СНД дасць магчымасць паспяхова вырашаць самыя сур'ёзныя задачы і праблемы. "Мне вельмі хацелася б, каб вы і ў далейшым захавалі вось такое дзелавое супрацоўніцтва, якое склалася паміж цэнтральнымі выбарчымі камісіямі. Гэта, як у нас кажуць, дарагога варта. Нам гэта ні ў якім разе нельга страціць", - рэзюмаваў беларускі лідар.