Урачыстая цырымонія ўшаноўвання аграрыяў фестывалю-кірмашу "Дажынкі-2024" у Клімавічах

Прэзідэнт Беларусі Аляксандр Лукашэнка 16 лістапада наведаў абласное свята "Дажынкі" ў горадзе Клімавічы Магілёўскай вобласці.

Пасля прыбыцця Кіраўнік дзяржавы нагадаў чыноўнікам аб задачы па ўключэнні ў абарот прысядзібных і прыфермерскіх участкаў, якія пустуюць.

"Па ўсёй краіне і асабліва тут - прысядзібныя ўчасткі, прыфермерскія ўчасткі, асабліва былыя фермы. Фермы няма, адна вежа стаіць там. Вакол ні вёсак, ні пасёлкаў, нічога няма. І гектараў 20 неўзараных зямель. Гэта, вядома, непарадак. Таму трэба неяк нам гэтым заняцца", - падкрэсліў беларускі лідар.

З гэтай задачай Аляксандр Лукашэнка звярнуўся ў першую чаргу да старшыні пастаяннай камісіі Савета Рэспублікі і ўпаўнаважанага прадстаўніка Кіраўніка дзяржавы ў Магілёўскай вобласці Леаніда Зайца. "Трэба табе, напэўна, ужо і гэту праблему ўзяць на кантроль. Калі нешта трэба, гавары. Губернатараў таксама трэба ў гэтым плане падганяць, асабліва старшынь райвыканкамаў. Гэта іх землі лічы. Іх трэба ў парадак прыводзіць. І ўмеюць жа рабіць", - даручыў Прэзідэнт.

Ён падкрэсліў, што на гэтыя пытанні трэба звяртаць увагу не толькі каля так званых неперспектыўных вёсак, але і ў аграгарадках. Гэта звязана з тым, што большасці людзей ужо не патрэбны вялікія плошчы зямлі пад сельскагаспадарчыя работы.

"Людзі не хочуць працаваць на паўгектара зямлі, 40 сотак. Сёння гэта не трэба. Яны (працуюць. - Заўвага), калі добры гаспадар, на 6-10 сотках каля дома. А астатняе кінута", - заўважыў Кіраўнік дзяржавы.

На абласным фестывалі "Дажынкі-2024" у Клімавічах Аляксандр Лукашэнка прыняў удзел ва ўрачыстай цырымоніі ўшаноўвання аграрыяў.

"Імгненна праляцела дзесяць гадоў з нашай папярэдняй сустрэчы. Прыехаў да вас у Клімавічы і адчуваю сябе, як быццам я прыехаў дадому. Хоць я з дому прыехаў сюды, - адзначыў Аляксандр Лукашэнка. - Самае галоўнае, у чым Гасподзь нас не пакрыўдзіў: ён нам даў мудрасць. Мудрасць заўсёды дапамагала нам зрабіць правільны выбар: самім вырашаць, як жыць, каму даверыць несці цяжар улады, што пакінуць нашым дзецям і нашым унукам".

А працоўнае адзінства, заявіў Прэзідэнт, забяспечвае беларусам незалежнасць. "Мы працуем і зарабляем. За кароткі гістарычны перыяд наша краіна стала самастойнай і самадастатковай дзяржавай. І гэта не раз нас ратавала", - заўважыў Аляксандр Лукашэнка.

Прэзідэнт канстатаваў, што кожны рэгіён уносіць у засекі Радзімы нешта сваё. Як у сямейную скарбонку. "У нас жа шэсць абласцей і горад-герой Мінск. Усе працуюць на агульны рэзультат. Усе розныя, а сям'я адна. І адказнасць за яе таксама агульная", - падкрэсліў Кіраўнік дзяржавы.

Аляксандр Лукашэнка ахарактарызаваў кожны рэгіён. Напрыклад, ён адзначыў, што Брэстчына - гэта любоў да тэхналогій. Таму ў вобласці самыя высокія паказчыкі па надоях малака. Віцебшчына паказвае, што такое сялянская кемлівасць. Так, бальнасць глебы невысокая, адпаведная ўраджайнасць, але за кошт траў і нарыхтоўкі кармоў, стаўкі на жывёлагадоўлю рэгіён уносіць свой уклад у рэспубліканскі аграрны сектар.
 
Гомельшчына дэманструе ўменне спраўляцца з цяжкасцямі, Гродзеншчына - жаданне эксперыментаваць, смела ўкараняць навінкі, што дапамагае кожны год атрымліваць усё больш высокія ўраджаі. 

Міншчына - гэта моцная гаспадарлівасць, прадоўжыў Кіраўнік дзяржавы. Дастаткова паглядзець, што сёння там пад 3 млн т намалоту па збожжавых, зернебабовых і алейных культурах. Сам Мінск - сталіца, навуковы, прамысловы і перапрацоўчы цэнтр.

"Магілёўшчына, якая завяршае "дажыначную эстафету", - рэгіён са сваёй адметнасцю. Тут амаль 700 рэк і азёр, уключаючы паўнаводныя і дзіўныя па прыгажосці Бярэзіну, Сож, Днепр. Цудатворныя крыніцы, куды з'язджаюцца паломнікі. Зрабіў глыток - "як на свет нарадзiўся". Вялізныя лясныя ўгоддзі. У прамысловым маштабе вы асноўны ў рэспубліцы вытворца шын, ліфтаў, цэменту, хімічных валокнаў, газетнай паперы", - расказаў Аляксандр Лукашэнка.

А знакаміты бабруйскі зефір - ледзь ці не самы жаданы сувенір з Беларусі. У гэтыя дні, дарэчы, у Бабруйску праходзіць "Марафон адзінства". А праз тыдзень гэта маштабная акцыя перамесціцца ў Магілёў.

"Мы па праву ганарымся гісторыяй нашага рэгіёна. Менавіта ў Магілёве ў 1888 годзе з'явіўся першы беларускі тэатр. Яго сцены памятаюць Шаляпіна, Рахманінава. Першы беларускі алімпійскі медаль заваяваў у Мельбурне ў 1956 годзе ўраджэнец Магілёўшчыны малатабоец Міхаіл Крываносаў", - прывёў некалькі прыкладаў Аляксандр Лукашэнка.

Калі гаварыць пра сельскую гаспадарку, то першая ў Еўропе аграрная ВНУ - гэта Горы-Горацкая земляробчая школа, якая расчыніла свае дзверы яшчэ ў 1840 годзе. Дарэчы, менавіта там быў створаны першы ў свеце прататып збожжаўборачнага камбайна і закладзена першае ў свеце вучэбна-доследнае поле.

Цяпер гэта Беларуская дзяржаўная сельскагаспадарчая акадэмія ў Горках - флагман айчыннай аграрнай адукацыі, кузня кадраў для ўсёй краіны.

"Абавязкова ў бліжэйшы час планую там пабываць. Ёсць аб чым пагаварыць і з будучымі аграрыямі, і з тымі, хто адказвае за іх падрыхтоўку, і з маладымі спецыялістамі, паколькі для нас гэта найважнейшае пытанне", - заявіў Кіраўнік дзяржавы.

У гэтым годзе Магілёўская вобласць дала краіне 1,1 млн т збожжавых і зернебабовых. Планку 100 тыс. т перасягнуў Магілёўскі раён. Амаль 90 тыс. т намалацілі ў Шклоўскім. Ураджайнасць 50-60 ц/га атрымалі сельгасарганізацыі "Газавік-Сіпакова", "Рассвет імя Арлоўскага", "Агракамбінат "Зара", "Добраахвотнік" і іншыя.
 
Добрая ўраджайнасць рапсу - амаль 34 ц/га - у Кіраўскім раёне. А ў асобных гаспадарках гэта лічба дасягае 50 ц/га. "Ёсць на што раўняцца, культура перспектыўная і грашовая", - адзначыў Аляксандр Лукашэнка.
 
Ёсць перадавікі і ў нарыхтоўцы кармоў. Гэта "МушынаАгра", "Вендараж" і "Саўгас Кісялевічы". На зімова-стойлавы перыяд яны назапасілі ад 52 да 74 кармавых адзінак на ўмоўную галаву.

"У нас ёсць на каго арыентавацца. Гэта лідары. І 1,5 млн т намалоту па збожжавых і зернебабовых мы павінны дасягнуць. І значна, зразумела, прыбавіць па малаку і мясе", - абазначыў задачы на бліжэйшую перспектыву Кіраўнік дзяржавы.

У вобласці вырашылі рабіць стаўку на развіццё рыбаводства. "Вы ўзялі на сябе амбіцыйную задачу забяспечыць краіну каштоўнымі відамі рыб і прадукцыяй з іх. Тады мы закрыем уласныя патрэбнасці, дадзім натуральны і гарантавана якасны прадукт для ўнутранага спажывання, а таксама на экспарт. Паспяхова вырашым яшчэ адну задачу па імпартазамяшчэнні", - сказаў Прэзідэнт.

Аляксандр Лукашэнка падкрэсліў, што дзяржава заўсёды падставіць плячо сапраўдным працаўнікам: "Калі я буду бачыць, што ад таго ці іншага напрамку мы атрымаем добрую аддачу, прыбытак, гарантую вам усялякую падтрымку, у тым ліку фінансавую".

Таму, напрыклад, з 2015 года працуе праграма развіцця паўднёва-ўсходняга рэгіёна Магілёўскай вобласці. Ужо ўкладзена каля Br2 млрд, і на гэтыя грошы зроблена нямала.

Праведзена мадэрнізацыя цэментных заводаў. Іх перавялі на мясцовыя віды паліва. У Крычаўскім раёне пабудавалі завод цэментна-стружкавых пліт. У Слаўгарадскім раёне рэалізавалі інавацыйны праект па вытворчасці кандытарскіх вырабаў, а таксама ўвялі ў строй свінагадоўчы комплекс на 24 тыс. галоў. У Клімавіцкім раёне цяпер ёсць буйнейшая ў вобласці племянная гаспадарка - рэпрадуктар на 3,6 тыс. свінаматак.

"Дзеянне гэтай праграмы будзе прадоўжана, але ў абноўленым выглядзе. Яна стане (мы яе разгледзім у бліжэйшы час) стратэгічнай і будзе змяшчаць не толькі прэферэнцыі. Неабходна абазначыць канкрэтныя новыя праекты, у тым ліку і, можа, перш за ўсё ў сферы прамысловасці. Патрэбны рабочыя месцы і замацаванне людзей тут, на роднай зямлі", - абазначыў прыярытэты Кіраўнік дзяржавы.

"За зіму мы таксама вызначымся з тактыкай. Я не скажу стратэгіяй, - з тактыкай у сельскай гаспадарцы. Паглядзім, магчыма, нам трэба ўзмацніць нашы тэхнічныя атрады, якія ёсць на Магілёўшчыне і даюць нядрэнны вынік. Асноўная ж задача - далейшае скарачэнне дыферэнцыяцыі ў сацыяльна-эканамічным развіцці тэрыторый. Моцныя рэгіёны - гэта моцная краіна! Гэтым шляхам мы будзем рухацца. Гэта ўжо не тактыка, гэта стратэгія", - падкрэсліў беларускі лідар.

"Наведваючы "Дажынкі", я шчыра радаваўся поспехам кожнай вобласці. Але пры гэтым уважліва вывучаў, што мы яшчэ можам зрабіць для людзей, як павысіць прывабнасць вёскі. Каб чалавек ведаў: жыць у сельскай мясцовасці добра, выгадна і перспектыўна, - сказаў Прэзідэнт. - А наогул, я вам скажу па-чалавечы, па-сялянску: ніхто нас нідзе не чакае. Там, дзе нарадзіўся, там і згадзіўся. Гэта ж не я выдумаў. Давайце будзем ісці гэтым шляхам".

Аляксандр Лукашэнка адзначыў, што цяпер многія хочуць мець свой дом у вёсцы. І ў той жа час у краіне нямала пустуючых дамоў. Больш за 1 тыс. з іх ужо прададзены жадаючым, 650 - за 1 базавую велічыню (1 БВ - Br40). У рэестры яшчэ 22 тыс. прапаноў.

"Актыўна прадаўжайце гэту работу без валакіты і бюракратызму, - запатрабаваў Кіраўнік дзяржавы. - Нішто не перашкаджае сёння купіць сорак сотак і стары дом. Не падабаецца - знось. Падабаецца - адрамантуй. Няхай будзе. Даглядай гэтыя сорак сотак, хто яго ведае, як жыццё складзецца. Мы ж беларусы, усё можа быць. І гэты кавалачак зямлі вас заўсёды будзе ратаваць. Будзе ўсё добра, як цяпер, і дзякуй богу. Унукі, дзеці прыедуць. Працэс пайшоў, але вельмі марудна. Хутчэй да нас нашы суседзі прыязджаюць. Цэняць нашу бяспеку, спакой і купляюць гэтыя кавалачкі зямлі".

Прыцягваючы да сябе спецыялістаў, сельгаспрадпрыемствы павінны прадастаўляць ім арэнднае жыллё, падкрэсліў Аляксандр Лукашэнка. "І гэты дом трэба дазволіць ім выкупляць гадоў праз 20", - перакананы ён.

Таксама неабходна падцягнуць да самага высокага ўзроўню дарогі, транспартнае забеспячэнне, магазіны, фельчарска-акушэрскія пункты. "У бліжэйшыя два-тры гады мы створым прывабную інфраструктуру для правядзення вольнага часу", - заявіў беларускі лідар.

"Ні ў якім разе не згортваем праграму "Адзін раён - адзін праект". Усяго за два гады рэалізавана 47 праектаў, створана звыш 4,5 тыс. рабочых месцаў, больш за тысячу з іх - на Магілёўшчыне. Гэта была мая ініцыятыва і, як у народзе кажуць, я абавязкова дацісну гэту праграму, - звярнуў увагу Прэзідэнт. - У Клімавічах, дапусцім, павінны быць створаны звычайныя невялікія, сярэднія (якія патрэбна для вас) прадпрыемствы".

У той жа час Кіраўнік дзяржавы канстатаваў, што пакуль гэта праграма рэалізуецца не зусім так, як задумвалася. "А яна на плячах старшынь райвыканкамаў. Частка праектаў - бягучая, планавая мадэрнізацыя прадпрыемстваў, якая і так праводзілася б, - заўважыў Аляксандр Лукашэнка. - Гэта значыць, прадпрыемства без гэтай праграмы мадэрнізавалася б. Пад гэта хуценька падстроіліся нашы начальнікі і чыноўнікі: "Вось, мы праграму разгортваем". Не, дарагія мае, трэба ствараць новыя вытворчасці. Няхай невялікія".

Прэзідэнт прывёў прыклад са сваёй малой радзімы. У пасёлку Копысь побач з яго роднай вёскай яшчэ ў дзіцячыя гады Аляксандра Лукашэнкі была хлебапякарня, дзе можна было ў магазіне купіць свежы цёплы хлеб. Потым гэту вытворчасць закрылі. "Навошта закрылі? Няхай там тры-пяць чалавек працуюць, але гэта нармальная вытворчасць, гэта ж для людзей, - адзначыў беларускі лідар. - Вось адзін з варыянтаў. Гэта значыць, трэба думаць, перш чым мы нешта робім. У раённых цэнтрах. Той жа Шклоў - сельгастэхніка была, сельгасхімія, ільносемстанцыя, ПМК будаўнічая".

Кіраўнік дзяржавы падкрэсліў, што цяпер усё гэта аднаўляюць у краіне, паколькі падобныя прадпрыемствы і іх паслугі патрэбны ў раёнах, не кажучы ўжо аб тым, што гэта рабочыя месцы для людзей. "Гэта задача старшыні райвыканкама. Усё гэта трэба аднавіць: ад камбікормавых заводаў да райаграсэрвісаў. І яны павінны варушыцца, працаваць, прыносіць карысць сельскай гаспадарцы. Давайце гэта адновім - тое, што нам трэба", - сказаў Аляксандр Лукашэнка.

Што датычыцца праграмы "Адзін раён - адзін праект", Прэзідэнт заявіў, што ў наступнай пяцігодцы яе ўзмоцняць, таксама як і патрабаванне за яе рэалізацыю, асабліва на ўзроўні старшынь райвыканкамаў. "Літаральна праз некалькі дзён у мяне разгледзім вынікі гэтай праграмы. Паглядзім, як вы гэта зрабілі. Але папярэджваю: не хлусіце, богам прашу! Не рабіце выгляд, што вы нешта зрабілі, калі вы гэтага не зрабілі. Непапулярна перад прэзідэнцкімі выбарамі, але вы мой падыход ведаеце: "Дамовіліся - трэба рабіць. Кроў з носа, але трэба зрабіць", - сказаў беларускі лідар.

Кіраўнік дзяржавы звярнуў увагу на тое, што цяпер задача № 1 - не дапускаць адтоку эканамічна актыўнага насельніцтва з рэгіёнаў. А значыць, трэба даць людзям цікавую работу.

"Зрабіць гэта можна толькі праз новыя вытворчасці і сур'ёзны ўздым якасці жыцця людзей. Каб у чалавека разам з зарплатай расла матывацыя і кваліфікацыя", - сказаў Аляксандр Лукашэнка.

Разам з тым ён папярэдзіў, што дармаедаў у краіне не будзе: "Усе павінны варушыцца, працаваць і зарабляць на сябе і сваю сям'ю. Мы дапаможам, прадаставім рабочае месца, толькі ідзіце працаваць. З тымі, хто перашкаджае людзям жыць, мы будзем сур'ёзна разбірацца, не крыўдуйце".

"Мясцовыя ўлады павінны ствараць рэжым максімальнага садзейнічання для ўсіх адказных інвестараў. Калі чалавек хоча ўкласці капейку ў вытворчасць, падтрымайце яго, вызначыцеся, дзе вам патрэбна гэта капейка, але не пускайце іх па крузе. Дапамажыце яму стварыць вытворчасць, там жа будуць працаваць людзі, - адзначыў Прэзідэнт. - Усе гэтыя меры ў той ці іншай ступені ёсць, але яны разрозненыя, разгрупаваныя па розных дакументах. Іх трэба аб'яднаць, актуалізаваць, зрабіць прыярытэтным нацыянальным праектам".

Паводле слоў Кіраўніка дзяржавы, Адміністрацыі Прэзідэнта ўжо даручана заняцца гэтымі пытаннямі. "Мы прывядзём наша заканадаўства ў ідэальны стан, каб чалавек не кідаўся па розных нарматворчых актах і не шукаў, як нешта арганізаваць. Гэта вялікая работа для спецыялістаў і вучоных, яна ідзе. І мы ў будучым годзе яе закончым", - заявіў Аляксандр Лукашэнка.

"Тэма развіцця рэгіёнаў павінна чырвонай ніткай праходзіць праз усю будучую пяцігодку, - запатрабаваў беларускі лідар. - Менавіта на рэгіёны, раёны, вобласці, будзе зроблены галоўны ўпор. Мы не павінны сцягваць людзей у цэнтр краіны, у Мінск і наваколле. Людзі павінны жыць па ўсёй краіне".

"Мы прайшлі вялікі шлях па стварэнні АПК будучыні. Але наперадзе задач не менш: павышаць прадукцыйнасць сельскай гаспадаркі перш за ўсё за кошт тэхналагічнай дысцыпліны і дакладнага земляробства, павялічваць глыбіню перапрацоўкі, развіваць уласную насенную базу, добра што навуковых інстытутаў у нас хапае", - адзначыў Прэзідэнт.

Кіраўнік дзяржавы расказаў, што, пралятаючы над рэгіёнамі, заўсёды ацэньвае культуру земляробства. І яна значна лепшая, чым у папярэднія гады. Вядома, імкнуцца ёсць да чаго. У гэтым плане Магілёўская вобласць адстае ад заходніх рэгіёнаў Беларусі.

"Паўтараю: лепш на зямлі працаваць, чым потым карачыцца. Будзе эканоміка - вайны ніколі не будзе. Не будзе эканомікі - самі пародзім гэту вайну, грамадзянскую развяжам. А жадаючых хапае: яны за мяжой ходзяць, бразгаюць зброяй. Але баяцца, таму што адзіныя мы як ніколі, таму што мы жыць хочам на сваёй зямлі. Яны гэтага баяцца перш за ўсё, а не таму што бацька там з дубінай ходзіць. Яны баяцца нашага адзінства і таго, што мы хочам працаваць. Страцім гэта пачуццё - паглядзіце, што будзе. Не дай бог гэтага дапусціць", - перасцярог Аляксандр Лукашэнка.

Што ж датычыцца АПК усёй краіны, цяперашні ўзровень развіцця - гэта комплексны харчовы шчыт для сябе і экспартны каталізатар, падкрэсліў Прэзідэнт.

"А тое, што мы можам дабівацца выніку, паказвае і сёлетняя ўборачная кампанія. Атрымана па краіне 10,3 млн т збожжа ўсіх відаў. Агульная лічба вышэйшая за нашу зададзеную планку - адна тона збожжа на аднаго жыхара краіны, - канстатаваў кіраўнік дзяржавы. - Гэта норма міжнародная. Калі дзяржава атрымлівае збожжа больш за адну тону на чалавека, гэта перспектыўная дзяржава. Мы ў бягучым годзе зрабілі гэта".

Акрамя таго, у рэспубліцы сабрана 5 млн т цукровых буракоў, 150 тыс. т ільнотрасты. Аляксандр Лукашэнка ўспомніў, як у папярэднія гады ў магазінах не хапала цукру. Прымаліся самыя жорсткія рашэнні. У выніку па даручэнні Прэзідэнта ў Беларусі сталі актыўна вырошчваць буракі.

"Мы забылі аб гэтай праблеме, г.зн. мы самі можам вырашыць усе праблемы, якія ў нас ёсць. Гэта залежыць і ад мяне, і ад урада, не толькі ад вас. Але я свой шлях прайду, не хвалюйцеся. Вы павінны свой прайсці", - звярнуўся Кіраўнік дзяржавы да аграрыяў.

У краіне нарыхтавана 9,5 млн т кармоў рознага віду. Чакаецца, што па выніках года ўдой малака ад адной каровы перавысіць 6 тыс. кг. Закрануў Аляксандр Лукашэнка і непрыемную тэму: падзеж жывёлы. У бліжэйшы час Прэзідэнт мае намер заслухаць даклад Генеральнага пракурора па гэтым пытанні.

"І ўсяго таго добрага, што ў нас ёсць, вяскоўцы дабіліся ва ўмовах неспрыяльнага надвор'я - з засухай і яшчэ ўраганнымі вятрамі, якія накрылі нас", - звярнуў увагу Кіраўнік дзяржавы.

У наступнай пяцігодцы ад вяскоўцаў зноў чакаюць подзвігаў, падкрэсліў Аляксандр Лукашэнка. Трэба ўстойліва выйсці на 10,5-11 млн т збожжа, перавесці ўсю жывёлу ў сучасныя комплексы і павялічыць надоі да 8 т ад каровы.

"Малочнатаварныя комплексы ў наступнай пяцігодцы будуць пабудаваны па ўсёй краіне. У "загашніках" мы карову трымаць не можам. Карова павінна быць у "палацы", - заявіў Прэзідэнт.

Кіраўнік дзяржавы лічыць, што, у прынцыпе, карове неабходна паставіць помнік: малако ратавала ад голаду ў ваенныя гады, ды і цяпер малочная прадукцыя абавязкова прысутнічае на стале беларусаў.

За наступную пяцігодку ў Беларусі таксама плануюць пабудаваць ультрасучасныя свінакомплексы і канчаткова разабрацца з перапрацоўкай лёну. "Лён - гэта будучыня. Не таму, што гэта сімвал нашай краіны і ў нашым гербе лён. Вы бачыце - цэны пачалі расці. Людзі ўсё больш і больш да натуральных тканін схіляюцца. Акрамя беларусаў. Беларусы не разумеюць. Беларусы рвуцца за Gucci, Versace і іншай гадасцю. Сваё трэба насіць. Свае тканіны. У нас ёсць усё. Насіце сваё і прывучайце дзяцей да гэтага", - заклікаў Аляксандр Лукашэнка.

Паводле яго слоў, таксама важна забяспечыць Беларусь сваёй агароднінай, садавіной і рыбай па даступных цэнах, укараніць новыя культуры (соя, тэхнічныя каноплі), самабытныя і новыя прадукты, якія пачалі вырошчваць у краіне ў сувязі з пацяпленнем.

"Усё  мы можам, і Гасподзь падарыў нам дзіўную прыроду для таго, каб жыць нармальна і працаваць. Наша задача - экспарт у аб'ёме не меншым як $10 млрд у год з акцэнтам на новыя рынкі, а новыя рынкі - гэта Азія і Афрыка. Вы не думайце, што нам Захад санкцыі ўвёў, таму што ў нас правоў чалавека няма і іншае. Аб гэтым ужо ўсе забылі. Мы для іх канкурэнты. Наша прадукцыя там не патрэбна. Нібыта ваююць з Украінай - дапамагаюць і іншае. Але як толькі ўкраінцы цераз Польшчу і іншыя краіны пачалі вывозіць збожжа, у тую ж Афрыку, не ім, яны закрылі гэтыя дарогі. Чаму? Гэта ж сябры, абяцалі дапамагчы. А таму што збожжа - гэта канкурэнт для Заходняй Еўропы", - заявіў Прэзідэнт.

Беларусь патрэбна краінам Афрыкі і Азіі, падкрэсліў Аляксандр Лукашэнка. Прыклад таго - Зімбабвэ і Кітай. І, вядома, традыцыйны партнёр - Расія.

"$8-9 млрд у гэтым годзе мы можам атрымаць ад экспарту. Нафтавікі столькі не атрымліваюць. А трэба $10 млрд - адзін мільярд застаўся. Мы павінны ў наступнай пяцігодцы падысці да гэтага ўзроўню. Будзе нялёгка. Але зразумейце, інакш дабіцца рэзультата будзе немагчыма.Толькі цяжкая праца, пот і максімальнейшае напружанне могуць нам дапамагчы", - сказаў беларускі лідар.

"Разарваць і прыхапіць Беларусь жадаючых шмат. Як толькі расслабімся і самазаспакоімся - знікнем з палітычнай і геаграфічнай карты свету. Як ужо гаварыў, у наступныя пяць гадоў адшліфуем краіну і прывядзём яе ў ідэальны стан, каб перадаць нашым дзецям", - падкрэсліў Аляксандр Лукашэнка.

Ён дадаў, што перадавікі жніва павінны дапамагчы гаспадаркам, якія адстаюць. Прэзідэнт аб гэтым гаварыў і ў Полацку. "У кожным раёне ёсць гэты маяк, раўняйцеся на яго. Старшыню райвыканкама трэба задзейнічаць максімальна, як гэта было раней. У бліжэйшы час мы вернемся да нарматыўнага прававога акта, указаў або законаў, зацвердзім і пацвердзім іх рэальныя паўнамоцтвы, каб старшыня райвыканкама адкрыў кніжку і паглядзеў, што яму рабіць, як рабіць і за што ён будзе адказваць", - расказаў Кіраўнік дзяржавы.

Аляксандр Лукашэнка адзначыў, што на гербе і сцягу Клімавіч залатая пчала - знакавы сімвал працавітасці мясцовых жыхароў. "Так, у нашай краіне няма столькі, колькі нам трэба, нафты і газу. Але ёсць свой кавалачак зямлі. І ёсць унікальныя людзі. Не перастаю  паўтараць: гэта галоўнае наша багацце. Тое, чаго няма ў іншых краін, - заявіў беларускі лідар.

Гаворачы пра герояў уборачнай кампаніі, Прэзідэнт падкрэсліў, што іх імёны ўвасабляюць чарговыя поспехі і рэкорды. Ён перакананы, што ў наступныя гады абавязкова будуць і новыя.

"Я вельмі ганаруся ўсімі вамі! Вельмі! Я ганаруся сваім беларускім народам!" - сказаў Аляксандр Лукашэнка.

Ён нагадаў, што нядаўна выступаў на міжнароднай канферэнцыі. Паводле слоў Прэзідэнта, гэта вялікі здабытак - магчымасць сказаць тое, што лічыш патрэбным, і нават пакрытыкаваць любую буйную краіну, маючы на гэта права: "Таму што да мяне вы прэтэнзій і да майго народа, дзяржавы мець не павінны. Мы свята выконваем узятыя на сябе абавязацельствы".

"Таму вы - мая гордасць. І я шчаслівы, што нарадзіўся і вырас на гэтай зямлі разам з вамі. Я ўдзячны лёсу за тое, што час выбраў менавіта нас. Цяжкі час. Але мы гэты час рабілі. І мы зробім, зробім так, як нам трэба. І самыя важныя першыя старонкі гісторыі суверэннай Беларусі мы пішам разам з вамі. Без беспадстаўнай сціпласці - мы гэта робім пакуль дастойна!" - падкрэсліў беларускі лідар.

Ён павіншаваў працаўнікоў вёскі з надыходзячым святам, адзначыўшы, што яны самыя стойкія, патрыятычныя і мудрыя. "Гэта ўсе вы. Вы - апора наша. Гэта вы не дапусцілі знішчэння і развалу нашай краіны", - сказаў Прэзідэнт.

Кіраўнік дзяржавы пажадаў усім моцнага здароўя, дабрабыту і новых здзяйсненняў. "І ў кожны дом, кожную сям'ю - любоў, узаемаразуменне і дастатак, які залежыць толькі ад нас. І, самае галоўнае, каб вашы дзеці ніколі не засмучалі вас", - дадаў Аляксандр Лукашэнка.

У час фестывалю-кірмашу Кіраўнік дзяржавы ўручыў узнагароды працаўнікам АПК.

Ордэна Пашаны ўдастоены трактарыст-машыніст ААТ "Рассвет імя К.П. Арлоўскага" Мікалай Дрозд.

Медалём "За працоўныя заслугі" ўзнагароджаны загрузчык сыравіны ААТ "Горкілён" Святлана Зэйдзіна; дырэктар ААТ "Кіраўскі райаграпрамтэхснаб" Лявонцій Кушавараў; вядучы спецыяліст па вырошчванні ААТ "Мсціслаўлён" Міхаіл Лорчанка; дырэктар - галоўны дзяржаўны інспектар Магілёўскай абласной дзяржаўнай інспекцыі па насенняводстве, каранціне і ахове раслін Сяргей Марфель; галоўны інжынер сельскагаспадарчага вытворчага кааператыва "Гігант" Ігар Міхалёнак; трактарыст-машыніст ААТ "Александрыйскае" Аляксандр Якуцін.

Ганаровае званне "Заслужаны работнік сельскай гаспадаркі Рэспублікі Беларусь" прысвоена трактарысту-машыністу камунальнага сельскагаспадарчага ўнітарнага прадпрыемства "Ніва-Барсукі" Аляксандру Петранкову.

Шэраг работнікаў АПК удастоены Падзякі Прэзідэнта.

Падзякі Прэзідэнта ўдастоены таксама калектыў унітарнага камунальнага сельгаспрадпрыемства "Саўгас "Добраахвотнік". Прадстаўнікам працоўнага калектыву гэтага прадпрыемства Аляксандр Лукашэнка ўручыў падарачны сертыфікат на трактар "Беларус".

Старшыня Магілёўскага аблвыканкама Анатоль Ісачанка падкрэсліў, што Прэзідэнт Беларусі - гэта чалавек, які цэніць сялянскую працу, дапамагае і аберагае працуючых у галіне людзей. У знак падзякі за гэта кіраўніку дзяржавы паднеслі жытніцу ўраджаю 2024 года.

Яшчэ адзін падарунак звязаны з самым каштоўным, што ёсць у вобласці. Прэзідэнту ўручылі фотаальбом "Соль зямлі Магілёўскай". У ім сабраны фатаграфіі працаўнікоў сельскагаспадарчых прадпрыемстваў Магілёўшчыны, бясконца адданых сваёй высакароднай справе. Працуючы на мірных палях і здзяйсняючы працоўныя подзвігі, хлебаробы Прыдняпроўскага краю славяць родную зямлю, захоўваюць і прымнажаюць лепшыя аграрныя традыцыі краіны.

Адзін экзэмпляр фотаальбома Аляксандра Лукашэнку папрасілі падпісаць, каб пакінуць у музеі Клімавіцкага раёна.

"Першы губернатар, які просіць аўтограф, а не грошы", - з гумарам адзначыў Кіраўнік дзяржавы.

На заканчэнне Аляксандр Лукашэнка яшчэ раз падзякаваў работнікам АПК за працу. "Галоўнае - гэта вы. Будзеце вы - будзе і краіна, з хлебам будзем, усё ў нас будзе - і мір, і спакой. Шчасця вам, поспехаў, жывіце доўга, будзьце здаровыя! У нас ёсць усё. Тое, чаго няма, мы купім", - сказаў на развітанне Прэзідэнт.