Разгляд кадравых пытанняў

Прэзідэнт Рэспублікі Беларусь Аляксандр Лукашэнка 20 кастрычніка разгледзеў кадравыя пытанні.

Кіраўнік дзяржавы назначыў:

Мартынюка Леаніда Аляксеевіча - памочнікам Прэзідэнта Рэспублікі Беларусь - інспектарам па Магілёўскай вобласці;

Бурака Канстанціна Віктаравіча - кіраўніком Апарату Савета Міністраў Рэспублікі Беларусь;

Еўдачэнку Андрэя Аляксандравіча - пастаянным прадстаўніком Рэспублікі Беларусь у Арганізацыі па забароне хімічнай зброі па сумяшчальніцтве;

Ермаловіча Максіма Леанідавіча - пастаянным прадстаўніком Рэспублікі Беларусь пры Міжнароднай марской арганізацыі па сумяшчальніцтве.

Прэзідэнт таксама даў згоду на назначэнне:

Барташа Сяргея Іванавіча - старшынёй Бярозаўскага райвыканкама;

Мароза Мікалая Мікалаевіча - старшынёй Ляхавіцкага райвыканкама;

Сойкі Андрэя Васільевіча - генеральным дырэктарам ААТ "Нафтан";

Карчэўскай Наталлі Уладзіміраўны - рэктарам УА "Беларускі дзяржаўны ўніверсітэт культуры і мастацтваў";

Лапцевай Наталлі Яўгенаўны - рэктарам УА "Мінскі дзяржаўны лінгвістычны ўніверсітэт";

Бахановіча Аляксандра Генадзьевіча - рэктарам УА "Брэсцкі дзяржаўны тэхнічны ўніверсітэт";

Гарошкі Аляксандра Васільевіча - Намеснікам Міністра прыродных рэсурсаў і аховы навакольнага асяроддзя.

Узгадняючы назначэнне Андрэя Сойкі генеральным дырэктарам ААТ "Нафтан", Аляксандр Лукашэнка заявіў, што ў Беларусі сёння нават не разглядаюць прыватызацыю нафтаперапрацоўчых заводаў.
 
"Прадпрыемства няпростае. Вы лепш за мяне гэта ведаеце. І прадпрыемства такое, дзе карупцыянеры заўсёды так прыглядаюцца і розныя зладзюгі, якія жадаюць прыватызаваць прадпрыемства, і пажадана за бясцэнак. Іх вакол топчацца вельмі шмат. Вы павінны ведаць маю прынцыповую пазіцыю: мы сёння нават не разглядаем пытанне прыватызацыі нафтаперапрацоўчых заводаў. Як бы ні было цяпер складана на рынку", - сказаў Кіраўнік дзяржавы.

Ён адзначыў, што цяпер НПЗ ва ўсім свеце адчуваюць цяжкасці ў сувязі з падзеннем цэн і попыту на нафту, уплывам пандэміі. "Адсюль гэтыя праблемы. Праблемы ёсць і іншыя, але мы не разглядаем пытанні прыватызацыі нашых буйных гіганцкіх кампаній, якія мы захавалі і, як бачыце, змаглі мадэрнізаваць", - падкрэсліў беларускі лідар.

"Заўсёды так было - падзенні, узлёты, - мы павінны ў гэты крызісны час шукаць тыя шляхі, якія выведуць нас на нармальны трэнд развіцця", - заявіў Аляксандр Лукашэнка.

Было адзначана, што пры назначэнні новых кіраўнікоў, у тым ліку гендырэктара ААТ "Нафтан", дасканала падыходзілі да падбору кандыдатур. І хоць Андрэй Сойка адносна малады па ўзросце кіраўнік, але мае значны вопыт работы як на прадпрыемствах галіны, так і ў кіраўніцтве канцэрна "Белнафтахім".

"Ну і добра, што маладыя прыходзяць у кіраўніцтва. Гэты даўно ўжо курс узяты. Сёй-той гэтага не бачыць. Яны думаюць, што можна адразу са школьнай лаўкі пайсці і кіраваць прадпрыемствам. Ды не, трэба патаптацца добра па жыцці, як прысутныя тут. Тады будзе толк, - заўважыў Кіраўнік дзяржавы. - А патаптацца па мінскіх чыстых утульных вуліцах і думаць аб тым, што заўтра вазьму руль кіравання не толькі прадпрыемствам, але і краінай у свае рукі, гэта прынамсі небяспечны памылковы погляд. Але добра, гэта нікому не забаронена. Амбіцыі ў добрым сэнсе слова - гэта нядрэнна, калі чалавек амбіцыйны. Толькі трэба сувымяраць свае сілы".

Аляксандр Лукашэнка пацвердзіў, што да падбору кандыдатур для новых кадравых назначэнняў сапраўды вельмі ўважліва падыходзілі. "Час патрабуе не толькі добрых прафесіяналаў. Сёння час патрабуе надзейных людзей, верных і адданых сваёй дзяржаве. Каб нас не парвалі на кавалкі і не падзялілі. Ты, напэўна, больш за ўсё гэта адчуў, працуючы там, практычна далей ад цэнтра, на Захадзе (звяртаючыся да назначаемага памочніка Прэзідэнта - інспектара па Магілёўскай вобласці Леаніда Мартынюка, які да гэтага часу ўзначальваў Бярозаўскі райвыканкам Брэсцкай вобласці. - Заўвага). Ужо, выбачайце мне, некаторыя рот разявілі і бачаць не кавалак Беларусі, а ў цэлым Беларусь ім патрэбна ўжо. Ну дык а мы навошта? Мы дзе будзем тады? Таму гэта асаблівасць, - адзначыў Прэзідэнт. - Мы ніколі не думалі, што мы, гаспадарнікі, і нам давядзецца яшчэ несці на сабе нейкую залішнюю нагрузку ідэалагічную. Аказалася, так, трэба ідэалогіяй займацца, працаваць з людзьмі, трэба ім паказваць, што адбываецца. Для вас гэта не актуальна, паколькі Мінск аказаўся і глыбінка - гэта дзве розныя рэчы".

"У глыбінку прыязджаеш - ідзе работа, людзі працуюць, займаюцца здабываннем хлеба надзённага, кормяць і тут - мінчан. Але сёй-той у нас, няхай іх меншасць, не разумее, што такое дзяржава і як мы рашуча будзем падтрымліваць гэту дзяржаву", - падкрэсліў беларускі лідар.

Аляксандр Лукашэнка ў сувязі з гэтым згадаў масавыя мерапрыемствы, якія прайшлі напярэдадні ў Мінску. "Учарашні вось гэты прыклад, я назіраў за ваеннымі (мітынг з удзелам ветэранаў сілавых структур. - Заўвага), ён яскрава паказаў, хто чаго варты. Але не мы ж клікалі туды ваенных на гэту плошчу Незалежнасці. Гэта ж не мы клікалі. Яны паклікалі (арганізатары пратэснай акцыі. - Заўвага) - афганцаў, з Саюза афіцэраў, былых тваіх калег з КДБ (размова аб прысутным пры кадравых назначэннях Ігару Сергяенку, які раней працаваў на кіруючай пасадзе ў КДБ. - Заўвага БЕЛТА), з МУС. Ну паклікалі, людзі прыйшлі са сваімі перакананнямі пад дзяржаўнай сімволікай. Прыйшлі, узнялі гэтыя сцягі, выказалі сваё меркаванне", - адзначыў Кіраўнік дзяржавы. Ён падкрэсліў, што ніводны ваенны не стаў на процілеглы бок пад калабарацыянісцкімі сцягамі.

Прэзідэнт звярнуў асаблівую ўвагу кіраўнікоў раёнаў і ААТ "Нафтан" на неабходнасць падтрымліваць працоўныя калектывы, кіруючыся пры гэтым інтарэсамі краіны ў цэлым, а не толькі даручанага ім участка. "У яго агароджай абмежавана прадпрыемства, але гэта не значыць, што толькі ў гэтай агароджы ён павінен займацца, у яго цэлы горад - Наваполацк, - звярнуўся Кіраўнік дзяржавы да Андрэя Сойкі, узгодненага на пасаду генеральнага дырэктара ААТ "Нафтан". - Там тысячы людзей жывуць, горад будаваўся пад гэты завод. Таму хочаш не хочаш, а на плячах будзе вісець гэты горад, асобныя яго праблемы. Там ёсць улада, іншыя прадпрыемствы, але гэта прадпрыемства (ААТ "Нафтан". - Заўвага) забяспечвала заўсёды гэты горад. Ды і Полацк недалёка, таксама паглядае, каб яму недзе дапамаглі. Такая ў нас краіна. У нас сацыяльна арыентаваная эканоміка і краіна такая. Вядома, трэба дапамагаць".

"Беражыце людзей, рабіце ўсё, каб яны жылі і на нас не крыўдзіліся. Справядлівасць павінна быць у аснове ўсяго. Гэта галоўнае, - сказаў Аляксандр Лукашэнка. - Трэба падтрымаць тых, хто сёння ў складанае становішча трапіў. Нельга людзей кідаць. Мы ж славяне, мы павінны па-чалавечы жыць. Калі ты нечага дасягнуў, дапамажы суседу. Не крыўдзіце людзей. У пераважнай большасці ў нас добрыя людзі. Беларусы - людзі добрыя, разумныя, разважлівыя".

У якасці прыкладу Прэзідэнт прывёў тое, як людзі апошнім часам выказваюць сваю ўсвядомленую грамадзянскую пазіцыю, збіраючыся для правядзення рэспубліканскіх аўтапрабегаў. "Яны садзяцца ў свой аўтамабіль і едуць праз усю краіну. Колькі ўжо такіх было паездак. А гэта ж грошы. Гэтыя людзі купляюць дзяржаўныя сцягі, сімволіку, трацяць грошы на бензін і едуць, каб прадэманстраваць, што гэта іх краіна. Гэта дарагога каштуе", - упэўнены беларускі лідар. Аляксандр Лукашэнка яшчэ раз згадаў аб праведзеных напярэдадні ў Мінску масавых мерапрыемствах, калі заявіць аб сваёй пазіцыі выйшлі ветэраны сілавых структур, аднак іх меркаванне аказаліся не гатовы пачуць удзельнікі пратэснай акцыі. "Людзі прыехалі з усёй краіны. Пачулі ў Telegram-каналах. Калі вы паклікалі (размова аб арганізатарах пратэснай акцыі 19 кастрычніка ў Мінску. - Заўвага), дык вы хаця б пагаварыце з імі, пачуйце іх голас. Але каму там слухаць было? Паглядзеў я гэту карцінку. Каму там слухаць? Іх работа - выйсці і гвалтам крычаць на вуліцы", - пракаменціраваў нядаўнія падзеі Кіраўнік дзяржавы.

Гаворачы ў цэлым аб вулічных акцыях пратэсту, якія праходзяць у Мінску, Аляксандр Лукашэнка падкрэсліў іх негатыўны ўплыў і папярэдзіў аб адказнасці за проціпраўныя дзеянні. "Дрэнна, што бадзяюцца па Мінску, дрэнна, што паводзяць сябе нахабна. Але мы змянілі тактыку, - сказаў Кіраўнік дзяржавы. - Мы ў спакойным рэжыме знойдзем кожнага. Сучасныя сродкі дазваляюць гэта рабіць, што мы, дарэчы, і робім. І кожны адкажа за свае дзеянні. Я тут не пагражаю. Мы ў гэтым напрамку працуем. І гэта дае пэўны эфект".

Прэзідэнт звярнуў увагу на тое, як несанкцыянаваныя акцыі паўплывалі на меркаванне людзей. "Нашы людзі раптам зразумелі. Асабліва мінчане раптам зразумелі. Яны ўбачылі, хто рвецца да ўлады, хто можа прыйсці да ўлады і што будзе з краінай, - адзначыў Аляксандр Лукашэнка. - Яны зразумелі, што яны могуць страціць. Мінчане кажуць у сродках масавай інфармацыі: не заснуць па вечарах, па начах, дзяцей не вывесці на вуліцу - асцерагаюцца, і гэтак далей. Гэта значыць, людзі ўбачылі, што яны могуць страціць, і параўналі спакойны Мінск і калі Мінск бурліць, няхай нават па нядзелях".

Прымаючы кадравыя рашэнні, Прэзідэнт таксама выказаўся па пытаннях грамадска-палітычнай абстаноўкі ў краіне. Аляксандр Лукашэнка падкрэсліў, што ні ён, ні іншыя ўладныя структуры не будуць прымаць без адабрэння народа рашэнняў па важных пытаннях.

"Сказана, што краіну не аддадзім, значыць, не аддадзім. І пакуль я Прэзідэнт, вырашаць будзе беларускі народ. Толькі людзі будуць вырашаць. Не Прэзідэнт адзін, не Кіраўнік Адміністрацыі, вышэйшыя службовыя асобы, дэпутаты не будуць вырашаць адны. А прынясуць народу і скажуць: вырашыце вось 10, 20, 30 пытанняў. І як народ вырашыць - так і будзе", - заявіў Аляксандр Лукашэнка.

"Калі раптам народ вырашыць, што заўтра ім быць у НАТА, Паўночнаатлантычным блоку, як тут прапануюць гэтыя пратэстуны, - пойдуць у НАТА. Калі народ вырашыць парэзаць краіну на кавалкі і раздаць - будзе краіна парэзана. Але калі народ вырашыць, што жыць мы будзем у мірнай, спакойнай, ціхай, культурнай краіне, значыць, мы будзем жыць у такой краіне, - падкрэсліў беларускі лідар. - Каб ні ў каго з так званай эліты не было памылковых меркаванняў, што мы тут нешта змудрым, асабліва па Канстытуцыі, і праз падман зробім новую Канстытуцыю. Гэтага не будзе. Толькі людзі павінны вырашыць. Такі перыяд востры. Калі народ захоча нешта іншае, чым той шлях, па якім мы ішлі, ну няхай паспрабуюць".

Аляксандр Лукашэнка прывёў меркаванне замежных грамадзян, у прыватнасці ўкраінцаў, расіян, якія кажуць, што ў Беларусі народ непалоханы, людзі не жылі ў горшых умовах, а таму ім здаецца, што ўсё з неба зваліцца. "З неба нічога не зваліцца. І старэйшыя пакаленні і нават людзі вашага ўзросту - 35, 40-50 гадоў - яны разумеюць, што трэба працаваць да пасінення, каб жыць добра. У нас няма шалёных грошай. Нам усё трэба здабываць уласнымі рукамі. Я хачу, каб вы гэта данеслі да кожнага чалавека, - сказаў Прэзідэнт. - Хоць у вас там іх адзінкі. Яны ёсць, але адзінкі (размова пра грамадзян з пратэснымі настроямі ў рэгіёнах. - Заўвага). Ну, на "Нафтане", там так званых разумных, можа, дзясятак-другі будзе. Яны, вядома ж, не вызначаюць развіццё гэтага прадпрыемства, але павінны дакладна разумець. Што гэта за такое: беларускае не купляйце, падаткі не плаціце, спыніце вытворчасці беларускіх прадпрыемстваў?"

Аляксандр Лукашэнка нагадаў, што яшчэ раней, у востры перыяд, папярэджваў аб наступствах спынення вытворчасцей. У якасці прыкладу Прэзідэнт прывёў Мінскі завод колавых цягачоў: "На МЗКЦ я быў. Спыніце, калі ласка, без МЗКЦ Беларусь абыдзецца. Усё, што мы там выпускаем, напэўна, працэнтаў на 15 застаецца ў Беларусі. Усё астатняе ідзе на экспарт. Як толькі спыніце, з вамі ніхто размаўляць заўтра не будзе. І дзе будзеце вы потым? Колькі ў нас там - 5-6 тыс. чалавек, памножце на чатыры - 20 тыс. з сем'ямі. Хто карміць дзяцей будзе?"

"Гэта седзячы там, далёка за межамі Беларусі, на забеспячэнні ведаеце каго, можна разважаць. Таму людзі павінны дакладна разумець нашу пазіцыю. Усё будзе так, як яны вырашаць. Гэта мая няўхільная прынцыповая пазіцыя. Я хачу, каб вы яе разумелі", - заявіў Кіраўнік дзяржавы.

Адначасова Аляксандр Лукашэнка звярнуў увагу: "Гэта не значыць, што я растапыру пальцы і буду сядзець і чакаць, пакуль тут галаву мне адкруцяць, а потым вам. Не, ёсць агульныя прынцыпы канстытуцыйныя. Улада павінна быць уладай".

Звяртаючыся да назначаемых кіраўнікоў у рэгіёнах, Кіраўнік дзяржавы папярэдзіў, што ім будзе няпроста, паколькі яны будуць працаваць твар у твар з людзьмі. "Таму з імі трэба размаўляць. Не трэба нікога ўгаворваць. Які толк? Чым больш мы будзем угаворваць, тым больш будзе недаверу. Людзям проста трэба тлумачыць: вось сёння жыццё - так, няпростае, небагата мы жывём, але не горш за іншых, - сказаў Кіраўнік дзяржавы. - І ў нас ёсць магчымасць. Вунь украінцы часта ў тэлевізары нашым выступаюць, расказваюць. Хочаш працаваць - працуй, больш заробіш, менш - менш. Але табе на галаву снарады не падаюць. З Данбаса папрыязджалі людзі, у нас прыжыліся ўжо, дзяцей тут нараджаюць. Гэта, у рэшце рэшт, галоўнае! Таму людзям трэба проста паказаць: вось ёсць, вось будзе альтэрнатыва адна, другая - выбірайце".

"Прыйдзем мы. І Канстытуцыю будзем прымаць, і Прэзідэнта, і парламент будзем выбіраць, і ў вас там мясцовыя саветы будзем выбіраць хутка. Дамовімся з тымі, з кім можна дамаўляцца, і прымем рашэнне", - рэзюмаваў беларускі лідар.

Узгадняючы назначэнне новых кіраўнікоў дзяржаўных вышэйшых навучальных устаноў, Прэзідэнт сказаў: "Рабіць выгляд, што ва ўніверсітэтах нічога не адбываецца, напэўна, не наша палітыка. Мы ведаем усе праблемы, вы іх ведаеце не горш, чым я".

"Катастрофы там няма, - прадоўжыў ён. - Студэнты заўсёды былі людзьмі буянымі і бурнымі. Мне часта гавораць: "Аляксандр Рыгоравіч, ну што вы ўсё гэта церпіце, з гэтымі студэнтамі? Ды павыганяйце іх". Але тут і асабістае: я ўспамінаю сябе, калі я быў студэнтам. Ведаеце, дэкану гістарычнага факультэта заўсёды было са мной няпроста. Але я ніколі не ваяваў супраць улады".

Аляксандр Лукашэнка адзначыў, што ў час вучобы ў ВНУ займаўся і грамадскай дзейнасцю, абараняў інтарэсы студэнцкай моладзі. "З дэканам я заўсёды ваяваў за справядлівасць. Калі хтосьці студэнта пакрыўдзіў... Я быў камсамольскім актывістам, кіраўніком камсамольскага пражэктара, калі вы сутыкаліся з гэтым. Гэта чалавек, які глядзеў за парадкам, за дысцыплінай, як цяпер кажуць, з карупцыяй змагаўся. Вось я за справядлівасць. Мяне толькі ратавала тое, што я заўсёды выдатна вучыўся і актывістам яшчэ быў. Ну як мяне выганіш?"- расказаў Кіраўнік дзяржавы.

"Я так успамінаю і думаю: ну, напэўна, ёсць жа нямала аблудных студэнтаў, - сказаў Прэзідэнт. - Ёсць, у якіх мазгі на месца ўжо не паставіш. Але гэта адзінкі. А за імі цягнуцца і іншыя: ну як, гэта ж няёмка, вось ён тут выйшаў, супраць улады выступіў, і я за ім. Я гэта ўсё ў душы разумею і неяк супакойваў і сілавікоў, і чыноўнікаў. Гавару: трэба пацярпець. Трэба пацярпець, зразумеюць людзі".

Аляксандр Лукашэнка звярнуў увагу новых рэктараў, што ім давядзецца наводзіць парадак у сваіх універсітэтах. "Таму што і ў вашым універсітэце, і ў вашым праблем хапае. І калі мне прапанавалі дзвюх жанчын - адна Наталля і другая, шчыра кажучы, я так падумаў: Госпадзі, як яны там будуць наводзіць гэты парадак. А потым падумаў, што часам жанчыны хутчэй разбяруцца з беспарадкамі, чым мужыкі", - сказаў Кіраўнік дзяржавы.

Аляксандр Лукашэнка адзначыў, што ён "жаночы Прэзідэнт", паколькі жанчыны яго заўсёды падтрымлівалі. Акрамя таго, ён вырас толькі з маці. "Таму ў мяне асаблівае стаўленне да жанчын. І калі я сказаў, што прэзідэнтам у нас пакуль жанчына быць не можа, гэта не таму, што я не паважаю. Гэта яны (апаненты. - Заўвага) так прадставілі. Таму што я вас (жанчын. - Заўвага) вельмі паважаю. І сёння жанчыне загрузіць гэту краіну з гэтай Канстытуцыяй, з гэтымі праблемамі..." - адзначыў Прэзідэнт.

У гэтым плане ён апеляваў да вопыту цяперашняга Кіраўніка Адміністрацыі Прэзідэнта Ігара Сергяенкі, які прыйшоў на гэту пасаду з Камітэта дзяржаўнай бяспекі: "Вось ён прыйшоў - генерал КДБ. Напэўна, ужо зразумеў, куды трапіў. І, напэўна, разумее, што такое працаваць Прэзідэнтам. Менавіта працаваць. Многія думаюць, што гэта, ведаеце, царская пасада: сеў і кіруй, пальцам паказвай. Нічога падобнага, у нас варушыцца трэба".

Кіраўнік дзяржавы запэўніў новых кіраўнікоў ВНУ, асабліва рэктараў-жанчын, што па любым іх запрашэнні гатовы прыбыць у іх універсітэты, каб абмеркаваць тыя ці іншыя пытанні, сустрэцца са студэнтамі. "Я гатовы прыехаць і разам з вамі размаўляць са студэнтамі, даводзіць сваю пазіцыю. Нам апраўдвацца няма чаго, нават перад студэнтамі. Што маглі, тое зрабілі. Няхай іншыя зробяць лепш. Хутка будзе прадастаўлена такая магчымасць", - сказаў Аляксандр Лукашэнка.

Кіраўнік дзяржавы таксама згадаў аб пратэсных мерапрыемствах, якія праходзяць у сталіцы па нядзелях: "У нядзелю ў Мінску будзе наведзены парадак. Таму што яны (удзельнікі несанкцыянаваных пратэсных акцый. - Заўвага) па нядзелях у асноўным ходзяць. Ну паказалі, чаго яны вартыя. Вы таксама ўбачылі, добра. А цяпер трэба растлумачыць усім адзін раз, папярэдзіць, а потым не трэба заспакойваць. Расказалі, растлумачылі, ідзіце  вырашайце, ідзіце вучыцеся, калі хочаце. Не? Вы павінны як рэктар першым сказаць, заявіць аб тым, што вось такая колькасць людзей вучыцца не хочуць. Ну не хочуць - не трэба. Хто ў армію, хто пойдзе працаваць або яшчэ куды-небудзь. Гэта права выбару. Асабліва цяпер".

Прэзідэнт упэўнены, што студэнтам на такіх мерапрыемствах рабіць няма чаго, асабліва што датычыцца творчай ВНУ. "Слухайце, будучая інтэлігенцыя. Яны нам са сцэны і іншых падмосткаў будуць паказваць тую мараль, якая павінна быць заўтра. І тут студэнтам трэба проста давесці. Тут не ў тым пытанне, што мы змагаемся супраць іншадумства, барані божа. Розныя павінны быць пункты гледжання. Заўсёды будуць іншадумцы. Яны або маўчаць будуць, недзе там на кухні абмяркоўваць або адкрыта. Мы не супраць гэтага змагаемся, мы змагаемся супраць парушэння закону. Яны парушаюць закон. Для некага гэта свавольства. Нікога не ўгаворвайце. Вось прыйшлі, растлумачылі - вось такі парадак. Хочаце вучыцца - вучыцеся. Не хочаце - лепш самі ідзіце", - сказаў Кіраўнік дзяржавы.

"Што датычыцца Прэзідэнта Беларусі, ён за ўладу пасінелымі рукамі (шмат разоў гаварыў) не трымаецца. Пытанне не ўва мне. Пытанне ў вас: што будзе з вамі без мяне. Можа, я ўжо занадта сваю ролю тут пераацэньваю, але я заўсёды гляджу вось на ветэранаў учарашніх (мітынг з удзелам ветэранаў сілавых структур. - Заўвага), на вас. Вам жыць у гэтай краіне. А што будзе? Вы што думаеце, яны нас/вас пашкадуюць, вось учарашнія, вы бачылі іх? Яны пашкадуюць? Ды парвуць на кускі", - заявіў беларускі лідар.

Аляксандр Лукашэнка канстатаваў, што час цяпер няпросты. "Нам лягчэй не будзе. Я на Усебеларускім народным сходзе вам раскажу ўсе дэталі, усё, што адбываецца, што будзе адбывацца і гэтак далей. Трэба гэты час перажыць, - сказаў ён. - Горш будзе, калі мы перажывём, як перажыла Украіна. А яшчэ страшней - як Карабах, сёння гэта ўсё адбываецца. І не трэба думаць, што там толькі міжнацыянальны канфлікт. Усё - у эканоміцы ў жыцці людзей. Калі б вы ўбачылі, што робіцца ў Арменіі, дзе вельмі разумныя людзі... Армяне разумны народ, а ў якую сітуацыю трапілі... Таму ўсё ад мазгоў чалавека і ад той сітуацыі, якая складваецца ў той ці іншай дзяржаве. Не дай бог нам гэта перажыць".