Разгляд кадравых пытанняў

Прэзідэнт Беларусі Аляксандр Лукашэнка 17 студзеня разгледзеў кадравыя пытанні.

Кіраўнік дзяржавы даў згоду на назначэнне:

Каспяровіча Сяргея Антонавіча - рэктарам Брэсцкага дзяржаўнага тэхнічнага ўніверсітэта,

Чуканава Аляксея Мікалаевіча - рэктарам Віцебскага дзяржаўнага ордэна Дружбы народаў медыцынскага ўніверсітэта,

Пяшко Валянціна Валянцінавіча - рэктарам Гродзенскага дзяржаўнага аграрнага ўніверсітэта,

Паляковай Ірыны Міхайлаўны - старшынёй Гарадоцкага райвыканкама,

Сысоева Аляксандра Уладзіміравіча - кіраўніком адміністрацыі Чыгуначнага раёна Віцебска,

Бахановіча Аляксандра Генадзьевіча - Першым намеснікам Міністра адукацыі,

Лемеха Паўла Канстанцінавіча - намеснікам Міністра фінансаў,

Воінава Алега Леанідавіча - дырэктарам Дэпартамента па архівах і справаводстве Міністэрства юстыцыі, 

Пернача Юрыя Уладзіміравіча - кіраўніком спраў Віцебскага аблвыканкама,

Петрашовай Вольгі Уладзіміраўны - першым намеснікам адказнага сакратара Парламенцкага сходу Саюза Беларусі і Расіі,

Белакапытавай Наталлі Віктараўны - намеснікам начальніка галоўнага ўпраўлення прававога і дакументацыйнага забеспячэння Сакратарыята Парламенцкага сходу Саюза Беларусі і Расіі.

Прымаючы кадравыя рашэнні ў сістэме адукацыі і мясцовай вертыкалі, Аляксандр Лукашэнка настройваў кіраўнікоў на акуратную работу ў пытанні расстаноўкі кадраў.

"Разумееце, нельга людзей крыўдзіць. Тым больш цяпер, калі час няпросты. Гэта датычыцца і вас як кіраўнікоў, і сістэмы органаў улады. Асабліва кіраўнікоў адміністрацый, райвыканкамаў. Трэба вельмі ўважліва да гэтага падыходзіць. А не тое што "ты не спадабаўся, давай я цябе зніму і іншае", - сказаў беларускі лідар.

"Нам трэба ўзмацніць кантроль за работай кадраў. Трэба глядзець: звольнілі намесніка, яшчэ некага, нават у райвыканкаме, - мы гэта павінны бачыць і даваць ацэнку і губернатарам, і старшыням райвыканкамаў. Калі заслугоўвае, не цягне воз, гультай, а можа, яшчэ і горш - вораг, ну што тут размаўляць... Размаўляць няма чаго. Калі чалавек недацягвае ў нечым, малады чалавек, яшчэ не вельмі разумее, мала папрацаваў - ну папрацуйце з ім. Ён павінен даць вынік. І дасць вынік. Я упэўнены. Калі па-чалавечы. А проста выкідваць людзей нельга. Да кадраў трэба ставіцца акуратна", - запатрабаваў Кіраўнік дзяржавы.

Аляксандр Лукашэнка падкрэсліў, што калі чалавек прафесіянал, адданы краіне і гатовы працаваць, то з ім трэба працаваць. "Нельга махаць налева і направа шашкай. Удумліва (трэба. - Заўвага) падыходзіць. Ёсць добрыя кадры - будзе вынік. Тым больш размова ідзе аб кіраўніках высокага ўзроўню. Калі яны на месцы, моцныя - будзе вынік. Працэнтаў на 90 ад кіраўніка залежыць у любой справе. Гэта павінна быць для ўсіх законам і навукай", - сказаў Прэзідэнт.

Кіраўнік дзяржавы ўпэўнены, што чалавеку заўсёды трэба даваць шанц: "Недзе памыліўся... Дайце час, каб чалавек адумаўся. Дапамажыце, калі трэба. А раптам з яго нешта атрымаецца. Парайцеся з людзьмі, пагаварыце, хто працаваў , хто ведае (гэтага чалавека. - Заўвага), а потым ужо прымайце рашэнне. Таму што за намі ж глядзяць людзі. І калі мы будзем размахваць шашкай налева-направа - сячы галовы, якая работа будзе? Не будзе работы. Навошта чалавеку такая работа? Ён увесь час будзе ў стрэсавай сітуацыі. У яго ні сям'і не будзе, ні справы не будзе, да якога ён прыстаўлены".

"Глядзіце, гэта галоўнае для вас. Вы кіраўнікі з сённяшняга дня", - даў наказ беларускі лідар.

Прымаючы кадравыя рашэнні, Прэзідэнт заявіў, што ў сістэме адукацыі пара заканчваць пературбацыі і рэарганізацыі.

"Мы задумалі вельмі сур'ёзную рэарганізацыю, перш за ўсё ў сістэме адукацыі. Аб гэтым я ўжо не раз гаварыў. Але вывад быў адназначны. Пара гэтыя ўсе пературбацыі і рэарганізацыі заканчваць", - сказаў Аляксандр Лукашэнка, назначаючы рэктараў ВНУ.

Ён нагадаў, што даручалася выйсці на канчатковае рашэнне. Неабходна было сур'ёзна паглядзець на Міністэрства адукацыі, каб там не было лішніх структур.

На прыкладзе аднаго з такіх пытанняў Кіраўнік дзяржавы абазначыў выяўленыя праблемныя моманты, звязаныя з перабудовай асобных элементаў структуры Міністэрства адукацыі і падведамных яму арганізацый.

У прыватнасці, гэта датычыцца работы Дэпартамента кантролю якасці адукацыі і створанага нядаўна Нацыянальнага агенцтва па забеспячэнні якасці адукацыі. "Быў дэпартамент. Потым перакінуць (функцыі. - Заўвага) - зрабіць упраўленне - не патрэбны гэты дэпартамент. Але ствараюць паралельна агенцтва, - абазначыў пытанне Аляксандр Лукашэнка. - Ну, дык а ў чым тады розніца, у чым сэнс?"

Сяргей Каспяровіч, узгоднены на пасаду рэктара Брэсцкага дзяржаўнага тэхнічнага ўніверсітэта, а да гэтага дня начальнік галоўнага ўпраўлення прафесійнай адукацыі Мінадукацыі, далажыў, што па агенцтве работа толькі пачынаецца: набраны штаты, задача ў новай структуры вялікая - забяспечваць якасць на ўсіх узроўнях адукацыі.

Аляксандр Лукашэнка задаў слушнае пытанне: "Дык дэпартамент з гэтым не спраўляўся?"

"У прынцыпе, спраўляўся. У яго шмат задач. І ліцэнзаванне, і апастыль", - адказаў Сяргей Каспяровіч. 

"Дык вы ўсё перадалі ў агенцтва..." - заўважыў Кіраўнік дзяржавы.

Сяргей Каспяровіч пацвердзіў: "Цяпер, фактычна, так. Частка функцый перададзена ў агенцтва". "Прапановы, якія ідуць цяпер, заключаюцца ў тым, каб дэпартамент уключыць у склад міністэрства ў выглядзе глаўка. Гэта паўнацэнная дзяржаўная структура ўжо ўнутры міністэрства. Не асобная юрыдычная асоба, - растлумачыў ён. - Што датычыцца дэпартамента, які можа стаць глаўкам, - гэта задача зноў жа ліцэнзавання, апастыля. Агенцтву прапануецца праводзіць, наколькі я разумею, сістэмную работу па забеспячэнні якасці: акрэдытацыі, праверкі якасці, праверкі прыватных устаноў адукацыі па ўсіх узроўнях".

Аляксандр Лукашэнка звярнуў увагу, што ў такім выпадку фактычна нічога не мяняецца. "Што было, тое і засталося. Грошы плаціць агенцтву трэба? Трэба. Плаціць трэба людзям. Вы ж там 35 ці колькі чалавек набралі. Вось зрабілі справу!" - сказаў Прэзідэнт. Больш таго, дзяржаўныя пытанні аддаюцца нейкай ледзь ці не грамадскай арганізацыі, у складзе якой нават няма ніводнага дзяржслужачага.

Прэзідэнт таксама паставіў пытанне, а ці можа з функцыямі, якія ўскладаюцца на агенцтва, справіцца адпаведнае профільнае ўпраўленне ў сістэме Мінадукацыі.

"Упраўленне са штатам чыноўнікаў, дапусцім, 8-10 чалавек…" - з нотамі сумнення ў голасе пачаў адказваць Сяргей Каспяровіч.

"Не, я не гавару цяпер пра колькасць. Трэба, дык і 200 будзе", - парыраваў Аляксандр Лукашэнка. 

"Справіцца. Калі дастатковы рэсурс", - адрэагаваў спецыяліст.

"Я не разумею сутнасць гэтай усёй пературбацыі. Добра, тут у вас ва ўпраўленні (у структуры Мінадукацыі. - Заўвага) 8 чалавек. А ў агенцтве 35. І яно справіцца. Дык вы забярыце 35. Нават не 35, а 30 можаце забраць. Плюс гэтых 8. І спраўляйцеся. Калі ёсць парадак і дысцыпліна, адзін чалавек справіцца. А калі бардак, дык вы там і 200 чалавек пасадзіце - толку не будзе, - сказаў Аляксандр Лукашэнка. - Слухайце, ну так, Прэзідэнт запатрабаваў там і іншае (упарадкаваць структуру Міністэрства. - Заўвага). Замест дэпартамента - упраўленне. А дэпартамент так і застаўся. Ніякага замест. Толькі яго назвалі агенцтва, выкінулі з міністэрства і ніводнага дзяржслужачага. Выканалі дзве задачы. Нібыта парадак навялі ў структуры ўпраўлення і з дзяржслужачымі разабраліся (аптымізацыя колькасці. - Заўвага). А на самай справе, калі паглядзець углыб, горш зрабілі, мне здаецца".

Прэзідэнт паставіў перад Сяргеем Каспяровічам слушнае пытанне: "Калі б вы былі, дапусцім, кіраўніком дэпартамента, а вам сказалі: "Ідзі, вось будзеш агенцтва ўзначальваць?"

"Тут цяжка сказаць. Неадназначнае рашэнне", - адказаў спецыяліст.

"Я не пайшоў бы", - сказаў Прэзідэнт.

"Так, у дэпартамента ўсё ж паўнамоцтвы, аўтарытэт. Гады працы. Які ведаюць і недзе, прама скажу, баяцца ўстановы адукацыі", - пагадзіўся Сяргей Каспяровіч.

"Правільна, самастойная структура, - падкрэсліў Аляксандр Лукашэнка. - А мы што зрабілі? Якую карысць прынеслі?"

У размове з журналістамі пасля завяршэння мерапрыемства Сяргей Каспяровіч звярнуў увагу, што любыя прапановы па ўдасканаленні, рэарганізацыі сістэмы адукацыі заўсёды вельмі сур'ёзна ўзважваюцца, абмяркоўваюцца на ўзроўні кіраўніка дзяржавы. Паводле яго слоў, у тых пытаннях, якія датычацца дзейнасці дэпартамента і агенцтва, канчатковыя рашэнні яшчэ не прыняты. "Будзе асобны даклад кіраўніка ведамства і на ўзроўні Урада, я думаю, Кіраўніку дзяржавы, дзе яны будуць прыняты, - сказаў спецыяліст. - Пытанне цяпер заключаецца ва ўдасканаленні дзейнасці: што будзе з Дэпартаментам кантролю якасці, ці ўвойдзе ён у структуру Мінадукацыі як асобнае структурнае падраздзяленне або прадоўжыць сваю дзейнасць? Пытанні ўзаемадзеяння з нацыянальным агенцтвам таксама на парадку дня - як гэта будзе адбывацца. Сёння агенцтва фактычна каардынуецца дэпартаментам. Тут ёсць разуменне неабходнасці ўдасканалення гэтай работы, павышэння эфектыўнасці".