Рабочая паездка ў Петрыкаўскі раён Гомельскай вобласці

Прэзідэнт Беларусі Аляксандр Лукашэнка 27 жніўня зрабіў рабочую паездку ў Гомельскую вобласць, у час якой прыняў удзел у цырымоніі ўводу ў эксплуатацыю Петрыкаўскага горна-абагачальнага комплексу ААТ "Беларуськалій".

На прадпрыемстве Кіраўніку дзяржавы далажылі аб перспектывах развіцця "Беларуськалія" і непасрэдна Петрыкаўскага ГАК, вырашэнні пытанняў у сацыяльнай сферы, забеспячэнні работнікаў жыллём. Цяпер пабудавана ўжо 12 шматкватэрных дамоў для работнікаў горна-абагачальнага комплексу, да канца года здадуць яшчэ тры дамы. Да 1 верасня расчыніць дзверы новы дашкольны цэнтр на 240 месцаў, выдзелены грошы на рэканструкцыю радзільнага дома, абмеркаваны пытанні выдзялення зямлі пад будаўніцтва спартыўнага комплексу, дзе будзе і басейн.

Як праінфармаваў Прэзідэнта генеральны дырэктар ААТ "Беларуськалій" Іван Галаваты, да 2025 года вытворчыя магутнасці плануецца павялічыць да 15,1-15,5 млн т, а да 2030 года дасягнуць узроўню 16 млн т.

Што датычыцца фінансава-гаспадарчай дзейнасці ААТ "Беларуськалій", то па выніках першага паўгоддзя 2021 года паказчыкі дзейнасці прадпрыемства па вытворчасці калію і яго экспартных продажах выраслі ў параўнанні з аналагічным перыядам мінулага года. Выраблена калійных угнаенняў у натуральным вылічэнні 6 млн 496 тыс. т, або 121,8% да першага паўгоддзя 2020 года. За 7 месяцаў 2021 года - 7 млн 546 тыс. т, або 116,6% да аналагічага мінулагодняга перыяду.

Прэзідэнт звярнуў увагу на неабходнасць далейшага развіцця рэгіёна ў цэлым, чаму ў немалой ступені будзе садзейнічаць запуск новай калійнай вытворчасці. "Трэба падтрымліваць Палессе. І ў нас атрымаецца - гэты кавалак ад Мазыра да Пінска", - падкрэсліў беларускі лідар.

Ён упэўнены, што гэту тэрыторыю трэба развіваць. Хоць палешукі і не абдзелены ўвагай, кіраўнік дзяржавы адзначыў, што можна прапрацаваць дадатковыя меры. Што датычыцца Петрыкаўскага раёна, то тут справа ў тым ліку за "Беларуськаліем", які ў тым ліку павінен быць зацікаўлены ў развіцці рэгіёна і стварэнні камфортных умоў жыцця для сваіх работнікаў. "Напэўна, Іван (генеральны дырэктар ААТ "Беларуськалій" Іван Галаваты. - Заўвага), трэба нам арыентавацца на тое, што дапамагаць ім тут трэба будзе, хоць праблем хапае і ў "Беларуськалія". Але давайце дамовімся, што першыя два гады хоць бы паўмільёна долараў у год. Ну а трэці, чацвёрты, пяты па мільёне ім тут трэба даваць. Але не грошы. А вы са старшынёй выканкама сядзеце, ты, як чалавек дасведчаны ў гэтым плане, увесь свет аб'ехаў, павінен паглядзець, дапамагчы: давайце вось гэта зробім, тут нешта дабавім", - сказаў Прэзідэнт.

"Але гэту тэрыторыю трэба развіваць. Усё ж такі палешукі ў нас не абдзелены ўвагай, але мы ўжо асабліва іх тут не ўзбагацілі. Трэба падтрымліваць Палессе. І ў нас атрымаецца - ад Мазыра да Пінска - гэты кавалак Палесся. Тут Петрыкаў якраз павінен развіцца. Жыткавічы - сам горад - добры, там ужо даўно парадак навялі, але, вядома, трэба ў сельскай гаспадарцы глядзець. Тураў - добры гарадок і вакол яго парадак. Петрыкаў, Жыткавічы - вось гэту граду трэба прыводзіць у парадак", - заявіў Кіраўнік дзяржавы.

Як і ў час нядаўняга наведвання Мінскай вобласці, Кіраўнік дзяржавы звярнуў увагу на пытанні навядзення парадку на зямлі, уключэння ў абарот невыкарыстоўваемых аб'ектаў і тэрыторый. Ён папярэдзіў, што гэту тэму трэба пастаянна трымаць у полі зроку. "Загадзім краіну - потым яшчэ два пакаленні будуць гэта ў парадак прыводзіць, - акцэнтаваў увагу беларускі лідар. - А то мы ствараем прыгажосць (размова пра ўвядзенне ў строй новых сучасных прадпрыемстваў накшталт Петрыкаўскага ГАК. - Заўвага), а вакол будзе бруд".

Асобна Прэзідэнт цікавіўся кадравымі пытаннямі. Кіраўніка дзяржавы запэўнілі, што яны вырашаюцца. Цяпер на Петрыкаўскім ГАК працуюць амаль 850 чалавек. Па меры выхаду на праектную магутнасць колькасць персаналу вырасце да 1,2-1,3 тыс. чалавек. "Едуць практычна з усіх абласцей Беларусі. Сёння ў нас ёсць праграма навучання маладых людзей. Ёсць курсы, праграмы, якія мы зрабілі ў сярэдніх спецыяльных установах у Гомельскай вобласці. Навучаем і ў Салігорску, і ў Мінску ў БНТУ. Дзякуючы той падтрымцы і сацыяльнай праграме, якая ёсць у рэгіёне, Петрыкаве, людзі з задавальненнем едуць. Сярэдні ўзрост работнікаў сёння на камбінаце 33 гады", - расказаў Іван Галаваты.

На цырымонію ўводу ў эксплуатацыю Петрыкаўскага горна-абагачальнага комплексу запрасілі членаў Урада, кіраўнікоў дзяржаўных органаў, прадстаўнікоў мясцовай вертыкалі ўлады, топ-менеджараў "Беларуськалія" і працоўны калектыў прадпрыемства.

"Калій - брэнд нашай краіны. Нам нашанцавала, што айчынныя нетры багатыя на чырвонае золата. Попыт на яго вялізны і расце з году ў год, - адзначыў Аляксандр Лукашэнка. - "Беларуськалій" - адзін з вядучых ігракоў на сусветным рынку ўгнаенняў, вырабляе і прадае больш за 20 працэнтаў калійных угнаенняў. Але самае галоўнае (я не пабаюся гэтага слова, паколькі паглыблены ў вытворчасць і продажы калійных угнаенняў), гэта самы надзейны партнёр у свеце. І мы ніколі не падводзілі і не падвядзём сваіх партнёраў".

Прэзідэнт падкрэсліў, што нават цяпер, калі рэспубліку выпрабоўваюць на трываласць рознымі санкцыямі ЗША і краіны ЕС, калі збеглыя апазіцыянеры гэтыя санкцыі выпрошваюць, Беларусь нікога не падводзіць і абавязкова выканае ўсе свае абавязацельствы. "Мы, наадварот, шукаем новыя адрасы паставак, новыя магчымасці дастаўкі тавару. У калійных угнаеннях з Беларусі сёння зацікаўлены такія гіганты, як Кітай, Бразілія, Індыя, і мноства іншых краін, - заўважыў кіраўнік дзяржавы. - Свет вялікі. З-за пандэміі каранавіруса на планеце яшчэ больш востра паўстала пытанне забеспячэння прадуктамі харчавання, значыць, і ўгнаеннямі".

Паводле яго слоў, беларусам складана паверыць, што праблема голаду магчыма ў XXI стагоддзі, але тым не менш гэта так, лічыць Аляксандр Лукашэнка. "Цяпер вялізны попыт на прадукты харчавання. Амаль мільярд чалавек недаядае, паўмільярда галадаюць: не хапае. А прадукты харчавання - гэта матухна-зямля, глеба. А без угнаенняў ніякіх прадуктаў харчавання быць не можа. Таму попыт на ўгнаенні наогул і калійныя ў тым ліку ў свеце расце і будзе расці. Мы гатовы дапамагаць, таму і будуем гэтыя гіганты", - перакананы беларускі лідар.

З уводам Петрыкаўскага горна-абагачальнага комплексу Беларусь умацоўвае свае пазіцыі на сусветным калійным рынку, заявіў Прэзідэнт. А ўвесь Петрыкаўскі раён, гэта таксама немалаважна, атрымлівае новы стымул для развіцця і, будзем спадзявацца, хутка дагоніць Салігорск і па зарплатах, і па ўзроўні жыцця", - дадаў Аляксандр Лукашэнка.

Кіраўнік дзяржавы заўважыў, што ў раённым цэнтры ўжо зроблена нямала. На добраўпарадкаванне горада выдзелена каля Br50 млн, абноўлена амаль уся яго інфраструктура. "Я хачу, каб петрыкаўцы разумелі: гэта сабрана з усёй краіны, і ў гэтым перавага нашага сацыяльнага ўкладу і нашага развіцця. Калі пакрыху адусюль ствараем гэтыя апорныя кропкі развіцця нашай дзяржавы. І развіваем не толькі для нас - для ўсяго свету і, перш за ўсё, для нашых суседзяў. Побач Украіна - жытніца Савецкага Саюза, яна і будзе жытніцай. Яна мае патрэбу ў вялікай колькасці мінеральных угнаенняў, у тым ліку калійных", - прывёў прыклад Прэзідэнт.

Паводле слоў Аляксандра Лукашэнкі, сёння, нягледзячы на пазіцыю ўкраінскага кіраўніцтва, беларускі бок вядзе дыялог аб тым, каб не парваць эканамічныя адносіны, і думае аб развіцці супрацоўніцтва (дарэчы, на цырымоніі запуску Петрыкаўскага ГАК прысутнічаў дэпутат Вярхоўнай рады Украіны Яўген Шаўчэнка, які здымае фільм пра Беларусь). "Украінцы - гэта нашы людзі. Мы ў любых сітуацыях будзем ставіцца па-чалавечы да гэтых людзей, як бы сябе там ні пазіцыянаваў ваш Прэзідэнт", - запэўніў беларускі лідар.

Вяртаючыся да тэмы развіцця беларускага рэгіёна, Кіраўнік дзяржавы заявіў, што Палессе - гэта соль беларускай нацыі. "У мяне заўсёды была мара: прыкласці максімум намаганняў для адраджэння нашага Палесся, - прызнаўся ён. - Мне заўсёды хацелася нешта для палешукоў зрабіць добрае".

У прыклад Аляксандр Лукашэнка прывёў Жыткавічы, назваўшы горад цудоўным непрамысловым раённым цэнтрам. "Ён мяне здзівіў, - заявіў Прэзідэнт. - А Тураў? Гэта наогул жамчужына Беларусі".

Паводле яго слоў, раней Петрыкаў не дацягваў да гэтых населеных пунктаў. Але цяпер горад прыведзены ў парадак, а будаўніцтва горна-абагачальнага комплексу дало магчымасць стварыць паўтары тысячы працоўных месцаў. "Задума была такой, каб развіць Прыпяць, гэты Палескі край. І вось гэта жамчужына, якую мы будавалі каля 10 гадоў, якраз укладваецца ў тую задуму. Але гэта не канец, мы будзем прадаўжаць працаваць і далей", - падкрэсліў Аляксандр Лукашэнка.

Кіраўнік дзяржавы расказаў, што падставіць плячо гораду і сам "Беларуськалій". Паколькі гэта запатрабуе пэўных фінансавых затрат, Аляксандр Лукашэнка выказаў сумненне, ці варта прадпрыемству так маштабна спансіраваць, напрыклад, той жа хакей і футбол. "Вакол павінна жыццё кіпець, калі ўклалі грошы. А то будзем, як учора "вялікія" хакеісты, - сказаў Прэзідэнт. - А ты ім грошы, грошы, грошы".

У сувязі з гэтым ён выказаўся пра ігру беларускіх хакеістаў, якія з паражэння стартавалі ў кваліфікацыйным турніры Алімпійскіх гульняў - 2022. "Я папрасіў, каб ён (гендырэктар "Беларуськалія". - Заўвага) асабліва там не раскідваўся, вобразна кажучы, на хакеістаў і футбалістаў. Таму што паехалі ўчора ў Польшчу (там 20 чалавек у хакей гуляюць) - прайгралі. Такой ганьбы... Я, вядома, не крыўджу, не прыніжаю палякаў - яны малайцы, перамаглі "вялікіх". А мы іх спансіруем. Вось сярэдняя зарплата - няхай атрымліваюць, а потым за вынік нешта дабавім. Так і па футбалістах", - быў катэгарычны Аляксандр Лукашэнка.

Незадаволены Кіраўнік дзяржавы і выступленнем беларускай каманды на Алімпійскіх гульнях у Токіа. Паводле слоў Прэзідэнта, ён ужо звярнуў увагу прэм'ер-міністра і міністра спорту на спансіраванне відаў спорту. "А то мы паехалі і "здзівілі" ўвесь свет у Токіа са знакам мінус і фінансуем. Фізкультура ёсць, а вялікага спорту няма, таму што не прадумана", - падагульніў беларускі лідар.

Петрыкаўскі горна-абагачальны комплекс будавалі амаль 10 гадоў, на работы было патрачана каля $1,25 млрд. Запасаў калійнай руды тут хопіць на 100 гадоў.

Аляксандр Лукашэнка падзякаваў усім, хто меў дачыненне да стварэння гэтага ўнікальнага, паводле яго слоў, аб'екта: праекціроўшчыкам, інжынерам, будаўнікам, шахцёрам. Работы выконваліся выключна беларускімі падраднымі праектнымі, будаўнічымі і мантажнымі арганізацыямі, а доля айчыннага абсталявання склала больш за 85%.

"Я сапраўды адчуваю гонар за ўсіх вас, цудоўных спецыялістаў і майстроў сваёй справы", - заявіў Кіраўнік дзяржавы. Таксама напярэдадні Дня шахцёраў Аляксандр Лукашэнка павіншаваў калектыў "Беларуськалія" і ветэранаў прадпрыемства з прафесійным святам.

Пасля выступлення Прэзідэнт ажыццявіў сімвалічны запуск прадпрыемства, націснуўшы на пульце кіравання кнопку запуску горна-шахтавага праходчага камбайна. Працэс работы тэхнікі на глыбіні дэманстраваўся ўдзельнікам мерапрыемства анлайн.

Кіраўнік дзяржавы ўспомніў, як аднойчы ў часы сваёй прэзідэнцкай маладосці разам з малодшым сынам Мікалаем спусціўся ў шахту на глыбіню некалькіх сот метраў. Там Аляксандр Лукашэнка агледзеў лаву - падземную горную вырабатку.

"Мы спусціліся на глыбіню, як мне дакладвалі, 600 метраў. Праехалі. На імпартным нейкім трактары мяне везлі да гэтага камбайна. І я, як звычайна: "А чыё гэта?" - Не наша. Сёння мы перамяшчаемся на сваім транспарце. Гэта значыць, мы пакрыху займаліся імпартазамяшчэннем. Ну а ў мяне малыш быў зусім яшчэ маленькі. Недзе кадры гэтыя ёсць. Яны прывезлі да гэтага камбайна. Ён мяне за руку цягне ў лаву гэту. Помню, такі мудры-мудры шахцёр кажа: Аляксандр Рыгоравіч, не перажывайце, пойдзем! - успомніў Кіраўнік дзяржавы. - Селі і глядзім. І ў мяне да гэтага часу ўражанні засталіся: я помню, як трашчаў гэты дах нада мной. Гэта ж трэба прывыкнуць, каб кожны раз працаваць там і не баяцца гэтага! Трашчыць гэта ўсё над табой".

Аляксандр Лукашэнка тады спытаў у аднаго з вопытных шахцёраў, ці можа абваліцца. "Можа, але наўрад ці", - такі быў адказ.

Прэзідэнт падкрэсліў, што шахцёры-калійшчыкі многае далі Беларусі. І размова не толькі пра калійныя ўгнаенні. Напрыклад, у старых вырабатках стварылі спелеакамеры, дзе праходзяць лячэнне людзі з захворваннямі органаў дыхання. "Я размаўляў з людзьмі, якія праходзілі гэта лячэнне. Кажуць, што на год хапае", - адзначыў Кіраўнік дзяржавы.

"Гэта значыць, шмат шахцёры падарылі Беларусі. Не кажучы ўжо аб тым, што дапамагаюць і спорту, і ў ахове здароўя, і па іншых напрамках працуюць. Таму вы проста малайцы і вялікі вам дзякуй!" - падкрэсліў Аляксандр Лукашэнка.

Прэзідэнт заклікаў цаніць Беларусь і захаваць яе суверэнітэт.

"Шануйце сваю зямлю. Лепшага краю, чым Беларусь, асабліва ў вас тут, на Палессі, у свеце няма. Я пабываў паўсюль. Няма лепшага краю, чым тут. Ну а мы будзем старацца ствараць для вас умовы для таго, каб вы маглі карміць сваіх дзяцей. Таму давайце створым гэту зямлю для сябе і сваіх дзяцей. І захаваем нашу суверэнную і незалежную Беларусь, - заклікаў беларускі лідар. - Ведайце, што як мая Беларусь, так гэта і ваша зямля. І нашым дзецям жыць тут. Цаніце гэта. Мы перажываем няпросты час. Не толькі мы. Многія краіны. Паўсюль вельмі шмат праблем".

Аляксандр Лукашэнка падкрэсліў, што беларусаў нідзе ў іншых дзяржавах не чакаюць, а таму трэба старацца будаваць сваё жыццё ў роднай краіне. "А калі хтосьці і чакае... Можа, на плантацыях, як часта ўкраінцы кажуць, у палякаў там ці ў немцаў карачыцца, збіраць клубніцы. Дык лепш у сябе вырошчваць гэта і ў свабодны ад работы час займацца карыснай працай", - сказаў Прэзідэнт.

Кіраўнік дзяржавы на прыкладзе Петрыкава расказаў, як можна не толькі знайсці дадатковую крыніцу прыбытку і стварыць працоўныя месцы, але і ўключыць у абарот закінутыя тэрыторыі, якія не выкарыстоўваюцца. "У Петрыкаве вызвалілі шмат пляцовак. Яны занядбаныя, але там добрая інфраструктура. Я губернатару кажу: ну невялікія грошы, вазьміце цяпліцы пастаўце, стварыце што-небудзь на электрычнасці. Электрычнасці хапае ў краіне. Я гатовы падключыцца і дапамагчы", - сказаў ён.