Рабочая паездка ў Петрыкаўскі раён Гомельскай вобласці

Прэзідэнт Беларусі Аляксандр Лукашэнка 3 жніўня прадоўжыў рабочую паездку ў Палескі рэгіён, у цэнтры ўвагі Кіраўніка дзяржавы былі пытанні развіцця аграрнага сектара.

Аляксандр Лукашэнка ў Петрыкаўскім раёне наведаў сельгаспрадпрыемства "Палессе-Аграінвест", заснавальнікам і ўласнікам якога з'яўляецца ААТ "Мазырскі НПЗ".

Першая тэма - пасяўная пад будучы ўраджай. У рэгіёне ўжо сеюць азімы рапс, свірэпіцу.

"Вы лічыце, што пара ўжо рапс на поўдні сеяць? - спытаўся Прэзідэнт у старшыні Гомельскага аблвыканкама Івана Крупко. - Я табе раіў бы не сеяць усё адразу, а ў 2-3 этапы і зрабіць вывад. Трэба паглядзець, як на поўдні, у якія часы сеяць. Я баюся з-за культуры земляробства, тэхналогіі ў Гомельскай вобласці мы не справімся з ростам (раслін. - Заўвага). Калі перарасце восенню, можа загінуць зімой".

Практыка паказвае, што ранняя сяўба можа даць вынік у выглядзе дадатковага ўраджаю, але трэба ўносіць спецыяльныя прэпараты, каб стрымаць рост. Гэта значыць усё ўпіраецца ў тэхналогію і культуру земляробства. "Ці ўнясуць у вас іх? Унесяце - добра. Я ў вашы тэхналогіі не ўмешваюся, але я на вашым месцы паспрабаваў бы ў 2-3 этапы. І параўнаць. Трэба паглядзець. Гэта ўсё ж такі поўдзень. Але я ў вашы тэхналогіі не ўмешваюся. Таму што яны складваюцца гадамі, людзі прывыкаюць", - заўважыў беларускі лідар.

Кіраўніку дзяржавы далажылі аб ходзе ўборачнай і іншых сельгасработ у рэгіёне. Для завяршэння ўборачнай патрэбна яшчэ шэсць пагодлівых дзён. Аляксандр Лукашэнка канстатаваў, што нават з улікам асаблівасцей рэгіёна ў гэтым годзе вільгаці хапала. Але сярэдняя ўраджайнасць каласавых невысокая.

Прэзідэнт у сувязі з гэтым настройвае на эфектыўную работу і строгае выкананне ўсіх агратэхнічных працэсаў. "Гэта ідэальны год. Столькі вільгаці было. Трэба вучыцца. Калі б вы так усюды ў вобласці працавалі (як у гаспадарцы "Палессе-Аграінвест". - Заўвага), таксама былі б на вяршыні. Вылізана, пасеяна, роўненька ўсё", - адзначыў Аляксандр Лукашэнка.

"Без тэхналогіі не трэба сеяць. Асабліва ў Гомелі. Лепш мы падумаем, каму аддаць гэта поле і гаспадарку. 20 ц/га - гэта не ўраджайнасць", - падкрэсліў ён.

Прыклад - вырошчванне рапсу. Гэта адносна новая для аграрыяў культура, прыбытковая, але і затратная. На полі трэба праводзіць да двух дзясяткаў розных апрацовак.

"Калі ты ўклаўся ў рапс добра, тады і атрымаеш вынік", - заўважыў Аляксандр Лукашэнка.

Не трэба забываць і пра кукурузу, арыентуе Кіраўнік дзяржавы: "Ад кукурузы, напэўна, мы нікуды не пойдзем. Яна ў многім ратуе ў Гомельскай вобласці, ды і па ўсёй краіне. А кукуруза - гэта і зерне нядрэннае, і сакавітыя кармы, сілас".

За 2023 год прадпрыемства спрацавала з тэмпам росту валавой прадукцыі сельскай гаспадаркі 101,5 працэнта да ўзроўню 2022 года. Пры гэтым выручка ад рэалізацыі прадукцыі была больш як на 12 працэнтаў большай. Атрыманы чысты прыбытак у памеры Br8,1 млн.

Па выніках работы ў студзені - чэрвені бягучага года валавая вытворчасць прадукцыі атрымана на ўзроўні 109,4 працэнта да аналагічнага перыяду мінулага года.

Падчас рабочай паездкі Аляксандр Лукашэнка даў параду аграрыям, як якасна правесці сяўбу.

"Галоўнае: сяўба - гэта майстэрства. Калі ён (кіраўнік гаспадаркі. - Заўвага) і аграном, а не толькі механізатар, за гэта будуць адказваць (на краі поля стаяць), тады пасее як трэба. А не - я вось зверху лячу - агрэхі надзвычайныя. Гэта значыць сеялка дзесьці спрацавала, дзесьці - не. Механізатара паслалі на планёрцы: "Ідзі тое поле пасей". Ну ён і сее адзін. Ніхто не кантраляваў, ніхто не глядзеў. А трэба якасна пасеяць. Гэта - галоўнае", - сказаў Кіраўнік дзяржавы. 

Аляксандр Лукашэнка выказаў нараканні і па іншых пытаннях: "Усё галоўнае цяпер. Араць мы развучыліся. Паглядзіш на поле - адны грабяні. Плуг не адрэгуляваны. Калі роўна ўзараць, тады менш апрацоўваць трэба".

Асобнае даручэнне - берагчы тэхніку як зрэнку вока, асабліва імпартную. У гэтым плане трэба напружваць і айчынную прамысловасць, каб актыўней працавалі ў напрамку імпартазамяшчэння.

Ды і ў цэлым тэхніку трэба берагчы. "Каб тэхніка была нармальная, трэба, каб парадак быў на машынным двары. Заехаў у адны вароты - выехаў у гэтыя вароты. Жорсткі кантроль", - параіў Кіраўнік дзяржавы.

Аляксандр Лукашэнка адразу ў полі ўзгадніў назначэнне новага старшыні райвыканкама. Ім стане дырэктар СУП "Палессе-Аграінвест" Аляксандр Верамееў. 

"Давайце аб галоўным. Ты хочаш, каб ён працаваў старшынёй райвыканкама?" - звярнуўся Аляксандр Лукашэнка з пытаннем да старшыні Гомельскага аблвыканкама Івана Крупко. 

Кіраўнік рэгіёна адказаў сцвярджальна.

"Справіцца?" - удакладніў Кіраўнік дзяржавы.

І тут адказ быў сцвярджальным.

Аляксандр Лукашэнка ўжо ў самога Аляксандра Верамеева пацікавіўся, наколькі ён у тэме аб'яднання мясцовых гаспадарак, як ён глядзіць на гэтыя пытанні.

Абмеркаваўшы гэтыя тэхнічныя моманты, Прэзідэнт папярэдзіў, што ва ўсім раёне культура земляробства павінна быць, як у СУП "Палессе-Аграінвест".

"Добра, будзем лічыць, што з панядзелка ты старшыня райвыканкама. Але май на ўвазе - тут добрая гаспадарка. Не дай бог знішчыце. Таму паглядзі, хто будзе тут працаваць", - сказаў Кіраўнік дзяржавы.

Аляксандр Лукашэнка адзначыў, што ва ўсім раёне трэба зрабіць, як у гэтай гаспадарцы. "Я ведаю яго біяграфію. Мне далажылі. Я ж не спантанна. Ён мясцовы, вырас тут. Сапраўдны паляшук, якіх я вельмі люблю і паважаю, - сказаў Прэзідэнт. - Вядома, глеба ў іх не гродзенская і не тураўская (па ўрадлівасці. - Заўвага). І вось такіх людзей трэба знаходзіць, якія не ныюць, не плачуць, а працуюць на тым, што ёсць".

Падчас рабочай паездкі Аляксандр Лукашэнка таксама наведаў таварную ферму "Турок", якая ўваходзіць у састаў прадпрыемства. Яна была ўведзена ў эксплуатацыю ў 2010 годзе пасля рэканструкцыі. Тут ёсць шэсць жывёлагадоўчых памяшканняў для ўтрымання буйной рагатай жывёлы на 1469 жывёламесцаў.

"Калі ў цябе ўвесь час так, як цяпер, гэта тое, што трэба. Гэта ідэальна. У кожным раёне павінны быць такія кіраўнікі, якія ведаюць тэхналогію ўтрымання жывёл, - падкрэсліў Кіраўнік дзяржавы. - Вось гэта ідэальна для ўзнаўлення. Нічога больш не трэба".

На ферме Прэзідэнт азнаёміўся з тэхналагічным працэсам гадоўлі маладняку буйной рагатай жывёлы. 

"Гэта самы нармальны варыянт. Цялят трэба трымаць пад дахам. Усе гэтыя клеткі - гэта глупства. Асабліва поліэтыленавыя гэтыя. Я паспрабаваў у сябе на ферме: калі горача, цяля ўсё спацелае і мокрае - дакладна захварэе. Гэта мы прывыклі - палацы, палацы. А жывёлам палацы не патрэбны. Ім чым прасцей, тым лепш. Акуратненька ўсё зроблена, - ацаніў убачанае Аляксандр Лукашэнка. - Трэба паставіць задачу: пры кожным комплексе мець вось такі лагер, дзе будзе трохтыднёвая жывёла".

Старшыня Гомельскага аблвыканкама Іван Крупко далажыў Кіраўніку дзяржавы аб планах па будаўніцтве і рэканструкцыі малочнатаварных комплексаў да 2031 года. Паводле яго слоў, да гэтага часу ў вобласці застанецца 340 малочнатаварных ферм (комплексаў). У рэгіёне плануецца рэканструяваць 190 малочнатаварных аб'ектаў пад гадоўлю маладняку, а таксама пабудаваць і рэканструяваць 86 малочнатаварных комплексаў. Пры гэтым будуць поўнасцю закрыты 111 малочнатаварных ферм.

"Мне вельмі падабаецца гэты комплекс. Ёсць вынік, што тут вам раіць. Рабіце так, як лічыце патрэбным", - рэзюмаваў беларускі лідар.

Прэзідэнт дадаў, што, калі атрымаецца, восенню ён яшчэ раз наведае Петрыкаўскі раён і азнаёміцца з работай новага кіраўніка. "Раскажаш, як ты пачаў працаваць. Паглядзі на кадры: хто застаяўся, хто хоча працаваць, хто - не. Як я заўсёды гавару, нельга разганяць людзей, нават калі ты разумееш, што іх трэба разагнаць. Трэба даць шанц чалавеку. Калі будзе патрэбна мая падтрымка, я гатовы", - заявіў Кіраўнік дзяржавы.

"Трэба, каб ён вырас як мінімум да Іван Іванавіча (былога кіраўніка Мінсельгасхарча, а цяпер старшыні Гомельскага аблвыканкама Івана Крупко. - Заўвага), каб мы яго назад забралі, а ён ужо разбіраўся з вобласцю", - дадаў Аляксандр Лукашэнка.