Прыняты дадатковыя меры для стымулявання гаспадарчай дзейнасці спартыўных клубаў і федэрацый

Прэзідэнт Беларусі Аляксандр Лукашэнка 7 лютага падпісаў Указ № 33, якім карэкціруецца Указ № 191 ад 15 красавіка 2013 года "Аб аказанні падтрымкі арганізацыям фізічнай культуры і спорту".

Дакумент прыняты ў мэтах дадатковага стымулявання развіцця ўласнай гаспадарчай дзейнасці клубаў па гульнявых відах спорту і рэспубліканскіх спартыўных федэрацый.

Указам прадугледжваецца аднясенне да сродкаў падтрымкі даходаў клубаў і федэрацый, што атрыманы ад рэкламадаўцаў, якія з'яўляюцца дзяржаўнымі арганізацыямі, а таксама ад замежных арганізацый, не менш як палавіна акцый (долі ў статутным фондзе) якіх знаходзіцца ва ўласнасці Рэспублікі Беларусь.

Міністэрства спорту і турызму надзяляецца правам зацвярджэння парадку ўзгаднення планаў развіцця клубаў або каштарысаў федэрацый і адклікання такога ўзгаднення пры выяўленні фактаў парушэння імі норм Указа № 191. Пры гэтым адкліканне ўзгаднення будзе з'яўляцца падставай для спынення падтрымкі. Міністэрству спорту і турызму даручана да 1 красавіка 2022 года зацвердзіць парадак узгаднення планаў развіцця клубаў і каштарысаў федэрацый, а таксама іх адклікання.