Прыняцце кадравых рашэнняў

Прэзідэнт Беларусі Аляксандр Лукашэнка 17 красавіка прыняў шэраг кадравых рашэнняў.

Кіраўнік дзяржавы назначыў:

Няверу Віталя Іосіфавіча - старшынёй Дзяржаўнага камітэта па маёмасці;

Бурака Канстанціна Віктаравіча - памочнікам Прэзідэнта Рэспублікі Беларусь - інспектарам па Гродзенскай вобласці;

Прэзідэнт даў згоду на назначэнне:

Пачко Сяргея Мікалаевіча - старшынёй Драгічынскага раённага выканаўчага камітэта;

Пачко Аляксандра Мікалаевіча - старшынёй Столінскага раённага выканаўчага камітэта;

Майсеюка Аляксандра Уладзіміравіча - старшынёй Кобрынскага раённага выканаўчага камітэта;

Шчаковіча Аляксандра Уладзіміравіча - кіраўніком адміністрацыі Савецкага раёна г.Мінска;

Страхара Руслана Барысавіча - генеральным дырэктарам ААТ "Магілёўскі завод ліфтавага машынабудавання";

Канюшкі Андрэя Васільевіча - першым намеснікам Міністра прамысловасці;

Печань Алены Мікалаеўны - першым намеснікам Міністра фінансаў;

Шаўцовай Наталлі Пятроўны - намеснікам Міністра сельскай гаспадаркі і харчавання;

Берднікавай Юліі Мікалаеўны - намеснікам Міністра працы і сацыяльнай абароны;

Машарскага Кірыла Генадзьевіча - намеснікам Міністра эканомікі;

Галаўко Канстанціна Анатольевіча - генеральным консулам Рэспублікі Беларусь у г.Гуанчжоу (КНР);

Якімава Пятра Мікалаевіча - генеральным консулам Рэспублікі Беларусь у г.Шанхаі (КНР).

Кіраўнік дзяржавы абазначыў ключавыя задачы на новай пасадзе для памочніка Прэзідэнта - інспектара па Гродзенскай вобласці Канстанціна Бурака.

Прэзідэнт звярнуў увагу, што сітуацыя ў рэгіёне мае важнае значэнне для забеспячэння бяспекі. "Людзі добрыя там, моцныя людзі. Эканоміка вобласці таксама добрая і моцная. Караеў (Юрый Караеў, назначаны ў сакавіку бягучага года старшынёй Гродзенскага аблвыканкама. - Заўвага) чалавек старанны і таксама не слабы як упраўленец. Я не хачу, каб вы там канфліктавалі. Але вельмі спадзяюся, што сваё меркаванне ў памочніка будзе", - сказаў Аляксандр Лукашэнка.

Кіраўнік дзяржавы падкрэсліў, што дзейнасць памочніка па вобласці звязана з падборам кадраў і інспектарскай работай па рэгіёне. Вобразна кажучы, гэта "вочы і вушы" Прэзідэнта, заўважыў Аляксандр Лукашэнка. Акрамя таго, памочнікі павінны непасрэдна ўзаемадзейнічаць з Кіраўніком Адміністрацыі Прэзідэнта і мець магчымасць пры неабходнасці абмеркаваць актуальныя вострыя пытанні на ўзроўні Кіраўніка дзяржавы, каб намеціць шляхі далейшых дзеянняў.

Звяртаючыся да Канстанціна Бурака, Прэзідэнт даў наказ: "Вопыт у цябе дастатковы. Я некалі быў прыхільнікам, каб ты ва Урадзе папрацаваў (да назначэння на пасаду памочніка Прэзідэнта па Гродзенскай вобласці Канстанцін Бурак працаваў кіраўніком Апарату Савета Міністраў. - Заўвага). Таму дзейнічай. Ты ведаеш, што там трэба рабіць".

Аляксандр Лукашэнка назначыў на пасаду Старшыні Дзяржаўнага камітэта па маёмасці Віталя Няверу, які раней займаў пасаду намесніка старшыні Гродзенскага абласнога выканаўчага камітэта.

"Што датычыцца дзяржмаёмасці, тут мне цэлую петыцыю выклалі. Я не збіраюся гаварыць пра каштоўнасць зямель, зямельных участкаў, уліку жылля, іншых рэчаў. Гэта ты лепш за мяне ведаеш, - сказаў Прэзідэнт, прымаючы кадравае рашэнне аб назначэнні Віталя Няверы старшынёй Дзяржкаммаёмасці. - Табе гэта знаёма больш, чым мне, і ты ведаеш, што там рабіць".

У якасці адной з асноўных задач для новага кіраўніка Аляксандр Лукашэнка абазначыў узмацненне ролі Дзяржкаммаёмасці. Пакуль, паводле слоў Прэзідэнта, гэта структура ўспрымаецца як нейкая бухгалтэрыя і не гучыць на належным узроўні. У гэтым ёсць і віна Урада.

Менавіта ў гэтым камітэце стаіць на ўліку маёмасць дзяржавы, і ў шэрагу краін яму адводзіцца ключавая роля. "Таму нам трэба тут працаваць бліжэй, цясней і дапамагаць. Мы гэта будзем рабіць", - падкрэсліў Прэзідэнт.

Аляксандр Лукашэнка пры ўзгадненні Руслана Страхара на пасаду генеральнага дырэктара ААТ "Магілёўскі завод ліфтавага машынабудавання" пацікавіўся, ці не ўспрымаецца новая пасада як нейкі рух уніз па кар'ернай лесвіцы.

"Гэта рашэнне для мяне абдуманае", - запэўніў Руслан Страхар, адзначыўшы свой вялікі вопыт работы ў прамысловасці (у тым ліку на "Строммашыне") і на дзяржслужбе на пасадах, дзе курыраваў у тым ліку прамысловы сектар, а таксама наяўнасць профільнай адукацыі. "Увогуле ўсё маё працоўнае жыццё так ці інакш звязана з прамысловасцю", - дадаў ён.

Аляксандр Лукашэнка пацікавіўся, што цяпер адбываецца са "Строммашынай". У адказ было агучана, што частка цэхаў і абсталявання перайшла БЕЛАЗу і там разгорнута вытворчасць кузаўных элементаў. Размяшчаецца яна, як і раней, у цэнтры горада, фарміруючы прамысловы вузел з іншымі прадпрыемствамі. Працуюць там да 600 чалавек, і перспектывы нядрэнныя. У прыватнасці, прапрацоўваецца новы сур'ёзны праект у кааперацыі БЕЛАЗа і "Магілёўліфтмаша" па зборцы буйных элементаў электратрансмісіі. Другая частка тэрыторыі "Строммашыны", якая не мае дачынення да БЕЛАЗа, развіваецца, пераўтвараецца ў адпаведнасці з горадабудаўнічым планам Магілёва.

"Значыць, рухавік для аўтамабіля вы зробіце?" - спытаў Прэзідэнт.

"Так точна", - пацвердзіў Руслан Страхар.

"Але добры рухавік", - папярэдзіў у сваю чаргу Кіраўнік дзяржавы.

"Так, Аляксандр Рыгоравіч", - адказаў новы кіраўнік "Магілёўліфтмаша". Паводле яго слоў, новым напрамкам прадпрыемства, які актыўна развіваецца, стала распрацоўка цягавых электрарухавікоў для электратранспарту, у тым ліку электробусаў і электрагрузавікоў, трамваяў і тралейбусаў "Белкамунмаша" і тэхнікі МАЗ.

"Што датычыцца аўтамабілебудавання і "Джылі" (размова аб распрацоўцы электрарухавіка для першага беларускага электрамабіля ад "БЕЛДЖЫ". - Заўвага), і тут такая задача стаіць. Пяць пробных рухавікоў было пастаўлена. Яны разам з Нацыянальнай акадэміяй навук распрацоўваліся", - дадаў Руслан Страхар.

Прэзідэнт падрабязна распытаў новага кіраўніка пра стан спраў у холдынгу.

Аляксандру Лукашэнку далажылі, што там працуюць усяго 5,5 тыс. чалавек, у тым ліку на галаўной пляцоўцы, уключаючы завод "Электрарухавік", - 4,8 тыс. чалавек. Да холдынга таксама адносяцца ААТ "Зеніт" (размешчана ў Магілёве), якое займаецца электронікай, ААТ "Завод "Ветразь" (Віцебская вобласць), а таксама сельгаспрадпрыемства ў Быхаўскім раёне, дзе працуюць больш за 130 чалавек.

"Усе гэтыя прадпрыемствы холдынга заняты, працуюць на поўную магутнасць? - спытаў Прэзідэнт. - Эканамічна яны эфектыўныя?"

Руслан Страхар адказаў сцвярджальна, падкрэсліўшы, што на гэты момант усе прадпрыемствы працуюць стабільна. "І ў цэлым холдынг "Магілёўліфтмаш" па мінулым годзе атрымаў амаль Br50 млн чыстага прыбытку", - сказаў ён. Паводле яго слоў, прыярытэтным напрамкам дзейнасці па-ранейшаму застаецца экспарт прадукцыі на расійскі рынак: "Кожны раз на "Магілёўліфтмашы" тэма нумар адзін - прасоўванне ліфтаў на расійскі рынак, няпросты, канкурэнтны, але, як кажам, наш". Тым больш што цяпер у Расіі рэалізуецца маштабная праграма па замене ліфтаў.

Размова зайшла таксама пра былога кіраўніка холдынга Сяргея Чарткова, які ў сакавіку бягучага года быў узгоднены на пасаду старшыні Магілёўскага гарвыканкама.

Кіраўнік дзяржавы нагадаў, што, прымаючы тады кадравае рашэнне, арыентаваў Сяргея Чарткова, каб ён на некаторы час заставаўся ўключаным у справы прадпрыемства, пакуль наступны кіраўнік поўнасцю ўвойдзе ў курс справы. Тым больш, што прадпрыемства размешчана ў Магілёве і гарвыканкам зацікаўлены ў яго эфектыўным развіцці. У той жа час і Руслан Страхар, які раней працаваў намеснікам старшыні Магілёўскага аблвыканкама, павінен аказаць садзейнічанне мэру Магілёва, каб добраўпарадкаваць горад, зрабіўшы яго больш прыгожым і ўтульным.

"Трэба, каб Магілёў быў сапраўдным прыгожым і ўтульным горадам", - звярнуў увагу Кіраўнік дзяржавы. - Пакуль гэты абласны цэнтр адстае ад іншых, мяркуе Прэзідэнт.

"Нядобра будзе, калі горад не прывядзём у парадак", - сказаў Аляксандр Лукашэнка. У якасці прыкладу таго, як можна правесці добраўпарадкаванне, Прэзідэнт згадаў зону адпачынку ў парку Падніколле, якую абнавілі, рэканструявалі, дзякуючы чаму гэта месца стала вельмі запатрабаваным у жыхароў і гасцей Магілёва. "Зону адпачынку зрабілі - усе людзі там, і моладзь асабліва. Людзі добра адзываюцца", - адзначыў Прэзідэнт.

"Тут трэба і прадпрыемствы каб падставілі сваё плячо", - дадаў Кіраўнік дзяржавы.

"Задача зразумелая. Будзем разам", - адказаў на гэта Руслан Страхар.

Узгадняючы назначэнне Аляксандра Пачко, які да гэтага часу ён займаў пасаду старшыні Кобрынскага райвыканкама, Аляксандр Лукашэнка пацікавіўся, у сувязі з чым было вырашана перавесці яго з Кобрына ў Столін.

"Мне прапанавалі - я згадзіўся. Тым больш Століншчына - гэта мая радзіма, - растлумачыў Аляксандр Пачко. - Дзесяць гадоў таму я са Столінскага раёна пайшоў працаваць у Лунінецкі раён. Сем гадоў адпрацаваў у Лунінецкім райвыканкаме. За гэты час былі амаль падвоены паказчыкі па раёне. Амаль тры гады працую старшынёй Кобрынскага райвыканкама. За тры гады таксама ёсць станоўчыя вынікі. Калі браць сельскую гаспадарку, то дабавілі больш за тону малака ўдою на адну карову. Па валавой вытворчасці дабаўлена больш за 100 т у дзень. На сённяшні дзень раён атрымлівае больш за 500 т малака. Па прамысловасці і астатніх напрамках таксама ёсць вынікі".

Як было адзначана, у Столінскім раёне цяпер 17 гаспадарак, тры з іх - прыватнай формы ўласнасці. "Працуе ў вёсцы больш за 3,5 тыс. чалавек. Амаль 92 тыс. га сельгасугоддзяў. Утрымліваецца 87 тыс. галоў жывёлы, 24,3 тыс. кароў. Удой за мінулы год - 7,6 тыс. літраў малака. Атрымана збожжа больш за 106 тыс. т", - падрабязна праінфармаваў Кіраўніка дзяржавы старшыня райвыканкама.

Прэзідэнт удакладніў, ці рэалізуецца ў раёне новая праграма па адраджэнні Палесся. Як праінфармавалі Кіраўніка дзяржавы, такая работа ў Столінскім раёне вядзецца. "Вельмі шмат было зроблена за першую праграму па меліярацыі. А цяпер - другая", - сказаў Аляксандр Пачко.

Яго брат Сяргей Пачко ўзгоднены на пасаду старшыні Драгічынскага райвыканкама. Раней ён займаў пасаду дырэктара на мясцовым прадпрыемстве "Аляксеевічы-Агра". "36 гадоў я на розных пасадах працую ў Драгічынскім раёне. Гэта, скажам, не другая, але мая вялікая радзіма ўжо", - заявіў Сяргей Пачко.

На пасаду старшыні Кобрынскага раённага выканаўчага камітэта ўзгоднены Аляксандр Майсяюк. Раней ён узначальваў Кобрынскі раённы Савет дэпутатаў.

Кіраўніком адміністрацыі Савецкага раёна Мінска ўзгоднены Аляксандр Шчаковіч, які да гэтага часу быў намеснікам старшыні Федэрацыі прафсаюзаў Беларусі.

"Цікавае ў нас перамяшчэнне з прафсаюзаў у Савецкі раён", - заўважыў Аляксандр Лукашэнка.

Аляксандр Шчаковіч расказаў, што некалькі гадоў працаваў членам Мінскага гарвыканкама і добра знаёмы з эканомікай горада. У Савецкім раёне сталіцы, у прыватнасці, размешчаны прадпрыемствы "АМКАДОР-Белвар" і "Прамсувязь".

"Я вельмі буду чакаць твайго падключэння. З "АМКАДОРам" у нас вялікія праблемы", - падкрэсліў беларускі лідар.

"У цэлым", - удакладніў Кіраўнік Адміністрацыі Прэзідэнта Дзмітрый Крутой.

"Таму трэба прыводзіць гэта прадпрыемства да ладу. І ні ў якім разе нельга загубіць. "АМКАДОР" - гэта вельмі перспектыўнае для нас і для Расіі прадпрыемства. На нашым агульным рынку вельмі важнае, - звярнуў увагу Аляксандр Лукашэнка. - Таму ўнікай. Таму што ў бліжэйшы час давядзецца вельмі моцна працаваць на "АМКАДОРы".