Свята "Купалле" ("Александрыя збірае сяброў")

Фестываль "Александрыя збірае сяброў" з маленькага ўтульнага свята ператварыўся ў падзею міжнароднага маштабу. Аб гэтым Прэзідэнт Беларусі Аляксандр Лукашэнка заявіў 6 ліпеня на рэспубліканскім свяце "Купалле" ("Александрыя збірае сяброў").

Кіраўнік дзяржавы адзначыў, што ліпень стаў своеасаблівым славянскім культурным месяцам: у гэтыя дні адзначаецца "Купалле" ў Александрыі, а праз тыдзень пройдзе "Славянскі базар у Віцебску".

"І ўсюды размова пра славянства. Хоць сёння і "Александрыя", і наш фестываль у Віцебску даўно перасталі быць толькі славянскімі. Сюды больш за дзесяць краін прыехала. На "Славянскі базар" прыедуць больш за 30 дзяржаў планеты. Гэта пацвярджае мой тэзіс, што гэта ўжо далёка не славянскі базар. Але ўсё роўна ўсё пачыналася адсюль", - сказаў Прэзідэнт.

Аляксандр Лукашэнка заўважыў, што сённяшнімі пакаленнямі Днепр успрымаецца як звычайная рака, аднак у старажытныя часы гэта быў сапраўдны водны шлях. "Тая дарога, па якой з поўдня, як гавораць многія гісторыкі, рухаліся нашы продкі. Тут яны бачылі сваё жыццё больш свабодным. Там іх, напэўна, вельмі прыгняталі. І вось адтуль, з-пад Кіева, з Дуная, як гавораць многія спецыялісты, нашы продкі рухаліся сюды на поўнач. Таму рака Дняпро - гэта асаблівая рака. І добра, што наша пакаленне адрадзіла гэту цудоўную традыцыю ў гэтыя купальскія дні збірацца на беразе старажытнага Дняпра і нагадваць не толькі аб Дняпры", - падкрэсліў Кіраўнік дзяржавы.

"І вось ужо 15 гадоў мы збіраемся ў гэтым маляўнічым кутку Беларусі, каб на імгненне адчуць сувязь часоў. За такі кароткі перыяд мы стварылі фестываль, які, як я ўжо сказаў, з маленькага ўтульнага свята ператварыўся ў падзею нацыянальнага і міжнароднага маштабу. І тым не менш ён не страціў сваю назву ўтульнага свята. Тут сапраўды асаблівая атмасфера, але мы захавалі і ўтульнасць", - заявіў Аляксандр Лукашэнка.

Прэзідэнт адзначыў, што фестываль стаў месцам прыцягнення для творчых людзей і сапраўдных аматараў самабытнай славянскай культуры з усёй Беларусі і з іншых дзяржаў.

"Мы калісьці даўно не планавалі такога размаху. Але людзі самі пацягнуліся сюды. Гэта патрабаванне душы. Гэта імкненне да сапраўдных каштоўнасцей, туды, дзе шчыра рады гасцям, дзе б'ецца пульс жывога творчага жыцця", - заявіў беларускі лідар.

"Галоўнае, што мы зрабілі, - адрадзілі традыцыі сваіх продкаў. Мы развіваем спрадвечную нацыянальную культуру. Пагадзіцеся: мала ведаць і помніць гэтыя традыцыі, яны павінны стаць часткай сучаснай гісторыі", - упэўнены Аляксандр Лукашэнка.

"Нашы дзеці павінны бачыць, як мы самі беражліва адносімся да таго, што стваралася стагоддзямі. Яны павінны ўспрыняць думку: усё, што зроблена сваімі рукамі, - плецены кошык, гліняны збан, вышываны ручнік - заўсёды прыгожа, заўсёды будзе актуальна і модна. А народная музыка - гэта песня славянскай душы. Гэта наша песня", - звярнуў увагу Прэзідэнт.

Кіраўнік дзяржавы адзначыў, што Александрыя сапраўды стала цэнтрам адраджэння старадаўніх абрадавых і рамесных традыцый.

"Толькі так можна захаваць сваю ідэнтычнасць - прадаўжаючы тысячагадовую гісторыю ўсходнеславянскіх народаў. Веданне гэтай гісторыі, разуменне філасофіі роднай культуры - наш нацыянальны здабытак. І мы павінны яго зберагчы, калі хочам быць народам, калі хочам быць нацыяй. Гэта аснова асноў беларускай дзяржаўнасці", - заявіў Аляксандр Лукашэнка.

"У кожнага з нас ёсць сваё месца сілы, куды мы прыходзім або вяртаемся, каб удыхнуць на поўныя грудзі і расправіць крылы для новага палёту, - сказаў Аляксандр Лукашэнка. - Шчыра дзякую ўсім, хто ўпрыгожыў сённяшняе свята сваім майстэрствам і талентам. Дзякуй кожнаму, хто ўсе гэтыя гады стварае тут па-сапраўднаму аўтэнтычную атмасферу. Цяпер гэта асабліва каштоўна".

"Паглядзіце. Свет мяняецца з шалёнай хуткасцю. Нам здаецца, што мы ўсё пазналі і ўсё пакарылі. Ствараем у сетках альтэрнатыўную рэальнасць, часам жывём у гэтым інтэрнэце, адарваліся ад сапраўднага жыцця. Але, дзякуй богу, ёсць людзі, такія як вы, - з чыстымі думкамі і добрым сэрцам. Людзі, якія вераць у цуд, з году ў год прыязджаюць у Александрыю, каб адсвяткаваць ноч на Івана Купалу. Свята, авеянае старажытнымі легендамі і міфамі. І дай бог, каб усё, аб чым вы думаеце, што загадалі, абавязкова збылося. Для вас на гэтай цудоўнай зямлі б'е Трафімава крыніца чыстай вады. Мы, александрыйцы, верым у яе цудадзейную сілу", - заявіў Прэзідэнт.

Ён расказаў, што ў гады Вялікай Айчыннай вайны маці і жонкі акраплялі вадой з гэтай крыніцы мужчын, якія ішлі на фронт.

"Няма лепшай абароны, чым любоў да роднай зямлі і вера ў яе сілу. Гэту традыцыю мы перадаём сваім дзецям, шчодра дзелімся з сябрамі. Мы знайшлі тое, што тысячу гадоў шукалі продкі. Пазналі сапраўдны сэнс жыцця. Наша міралюбнасць, імкненне да дружбы, паважанне традыцый розных культур і ёсць тая самая папараць-кветка з закадзіраванай у ёй тайнай свету. А сілы гасціннай Александрыйскай зямлі і вады з Трафімавай крыніцы хопіць на ўсіх", - падкрэсліў Кіраўнік дзяржавы.

Аляксандр Лукашэнка прызнаўся, што ліпень - адзін з самых цяжкіх месяцаў у рабоце Прэзідэнта, паколькі ў гэты перыяд праходзіць вялікая колькасць масавых мерапрыемстваў, у актыўную фазу ўступае ўборачная кампанія. На гэты раз адбітак наклаў і міжнародны парадак дня: не так даўно Кіраўнік дзяржавы вярнуўся з саміту Шанхайскай арганізацыі супрацоўніцтва, які праходзіў у Астане.

"І, вяртаючыся дадому, я загадзя запланаваў, што павінен прызямліцца тут (аэрапорт добры), таму што на ўсходзе вельмі шмат назбіралася спраў. І адсюль у бліжэйшы час буду працаваць, глядзець, як мы рыхтуемся да ўборкі ўраджаю. Ураджай у полі як ніколі. Я не помню такога года для аграрыяў, як гэты. Пакуль бог надзяліў нас цудоўным ураджаем, праца будзе найцяжэйшая. І трэба паглядзець, як тут, ва ўсходніх рэгіёнах, справяцца з гэтым людзі, - падзяліўся планамі Кіраўнік дзяржавы. - І пасля гэтай нагрузкі, калі ты прыходзіш на сваю родную зямлю, ты як быццам акунаешся ў іншы свет. Гэта сапраўды, не як быццам, гэта іншы свет. Ты прыходзіш да сваіх вытокаў, тут табе лепш, прасцей. І літаральна за суткі ты становішся здаровым, моцным, як і раней у тыя часы, калі ты хадзіў па гэтай зямлі. Ты вельмі хутка аднаўляешся".

"Калі я думаю аб тым, што трэба прыйсці да вас, а тут прысутнічае нямала маіх землякоў, што граху таіць, якія пра цябе ведаюць усё. Нават часам тое, чаго ты не ведаеш. І гэта самае складанае. Гэта самае складанае - прыйсці да вас, гаварыць тут нешта, выступаць, разумеючы, што людзі, якія сядзяць у гэтым амфітэатры, думаюць пра цябе рознае. І самае цяжкае тое, што ты ўспрымаеш гэта як нейкі папрок з вашага боку, - што ты нечага яшчэ не дарабіў, ты нешта не зрабіў... А чаму? Я ведаю, што вы не адчувалі гэта. І не дай вам бог, атрымаўшы ад некага ўсё, што вы хацелі, потым не апраўдаць гэты давер. Найцяжэйшае для чалавека", - падкрэсліў Прэзідэнт.

Нядаўна расійскі журналіст пацікавіўся ў Кіраўніка дзяржавы, што для яго як для Прэзідэнта самае цяжкае. І Аляксандр Лукашэнка адказаў: "Апраўдаць давер людзей".

"Здавалася б, за тры дзясяткі гадоў пара ўжо і неяк закасцянець, супакоіцца. Але нічога такога. І гэта ўсё адсюль, ад гэтай зямлі: шанаваць людзей, дарыць ім шчасце, рабіць усё для таго, каб яны пра цябе проста дрэнна не думалі, - заявіў беларускі лідар. - На гэтай зямлі я нарадзіўся. Тут я вучыўся, тут мае карані. І калі ты сюды вяртаешся, ты разумееш, што гэта твая малая Радзіма".

"Для чаго я гэта ўсё гавару? Паважаныя беларусы і самыя блізкія нашы сябры з Украіны і Расіі, падумайце над маёй прапановай аб куплі за грошы, за капейкі невялікіх участкаў у так званых неперспектыўных вёсках. Вы ведаеце, што вёска ў нас выратавана. Мы будуем больш за паўтары тысячы аграгарадкоў, ужо вызначана, дзе яны будуць. У нас засталіся сярэднія і зусім маленькія вёсачкі, дзе раней жыло вельмі шмат людзей, - сказаў кіраўнік дзяржавы. - Гэта ж цудоўныя мясціны, цуда месцы. Яны не павінны загінуць - вось гэтыя сярэднія вёсачкі, маленькія. А хто іх адновіць, хто іх захавае? Мы з вамі!"

Прэзідэнт асабліва заклікае купляць участкі ў гэтых вёсачках гараджан: "Вы павінны адрадзіць гэтыя вёсачкі. Няхай у вас там будзе дача. Гэта ж 40-50 сотак зямлі - гэта немалы кавалак. У горадзе або каля горада вы ў лепшым выпадку атрымаеце ўсяго шэсць сотак для гэтага дачнага ўчастка. А тут 40-50, - заўважыў Аляксандр Лукашэнка. - Рабіце гэта цяпер, заўтра будзе позна. Рабіце таму, што ў вас ёсць дзеці і яны павінны хадзіць басанож па зямлі".

Паспяшацца трэба і таму, што заўтра гэтых участкаў ужо не будзе, таму што Беларусь стала ціхім і спакойным, утульным кутком для расіян і ўкраінцаў, звярнуў увагу Кіраўнік дзяржавы. І яны з задавальненнем набываюць тут зямлю: у Беларусь яны прыязджаюць за спакоем і цішынёй.

"Вось такія мае разважанні тут, на Радзіме. Я прашу прыслухацца да маіх рэкамендацый. Я ўсё ж такі ў жыцці пабачыў нямала і пахадзіў па гэтай зямлі, дзе вы сёння знаходзіцеся", - сказаў Прэзідэнт.

Аляксандр Лукашэнка пажадаў беларусам і замежным гасцям фестывалю шчасця і поспехаў. "Шчыра запрашаю вас у купальскую казку. Усяго добрага вам!" - пажадаў беларускі лідар.

Галоўнай падзеяй свята "Александрыя збірае сяброў" стаў вячэрні гала-канцэрт "Толькі тут такія зоркі". У аснову яго сюжэта пакладзена ідэя мірнага беларускага неба, на якім заўсёды можна ўбачыць зоркі і сузор'і. Сюжэтная лінія раскрыта праз гумарыстычныя гісторыі пра знаходжанне сучаснай моладзі ў вёсцы, знаёмства з яе жыхарамі, а таксама народныя звычаі і вясковы побыт. У канцэртнай праграме таксама адлюстраваны тэмы Года якасці, асваення космасу, 80-годдзя вызвалення Беларусі ад нямецка-фашысцкіх захопнікаў. Асобная ўвага ўдзелена тэме 30-годдзя інстытута прэзідэнцтва ў Беларусі. Па традыцыі завяршыўся канцэрт святочным феерверкам і запальваннем купальскага вогнішча.