Наведванне рэспубліканскіх спаборніцтваў сярод юнакоў і моладзі па біятлоне і лыжных гонках

Кіраўнік дзяржавы Аляксандр Лукашэнка 26 лютага наведаў рэспубліканскія спаборніцтвы сярод юнакоў і моладзі па біятлоне і лыжных гонках на прызы Прэзідэнта Беларусі. Спаборніцтвы прайшлі на базе Рэспубліканскага цэнтра алімпійскай падрыхтоўкі па зімовых відах спорту "Раўбічы".

Разам з вядомымі беларускімі біятланістамі перад стартамі Прэзідэнт пратэсціраваў лыжную трасу і стрэльбішча. Паводле яго слоў, для гэтай пары года траса проста ідэальная. "Раніцай было цвярдзей, потым, зразумела, крыху растапталі гэту трасу. Але слізгаценне было вельмі добрае. Падушка добрая, снег добры, надвор'е ідэальнае", - адзначыў Аляксандр Лукашэнка.

Кіраўнік дзяржавы даў старт біятлонна эстафетнай гонцы сярод юнакоў і дзяўчат 2005-2006 гадоў нараджэння. Ён таксама паназіраў за ходам спаборніцтваў і прыняў удзел у цырымоніі ўзнагароджвання пераможцаў і прызёраў біятлонных эстафетных гонак.

Прэзідэнт расказаў, навошта было прынята рашэнне аб правядзенні рэспубліканскіх спаборніцтваў сярод юнакоў і моладзі па біятлоне і лыжных гонках.

"Зусім нядаўна завяршылася зімовая Алімпіяда. І гэта Алімпіяда, шчыра кажучы, мала радасці падарыла беларускаму народу. Мы нямала зрабілі, каб нашы спартсмены годна выступілі на спаборніцтвах у Пекіне. І калі мы задавалі пытанні спартсменам, чаго не хапае, усяго хапала. У выніку маем тое, што маем. У бліжэйшы час у рабочым парадку, у тым ліку і па выніках гэтых спаборніцтваў, адказныя чыноўнікі, Мінспорту і Урад даложаць мне, як яны распарадзіліся тымі сродкамі, якія былі ім выдзелены. Няхай невялікія, але, здаецца, усяго хапала. І чаму так блякла мы выглядалі. Думаю, што няма дастойнай канкурэнцыі", - сказаў Кіраўнік дзяржавы.

Таму, адзначыў Прэзідэнт, ён прыехаў паглядзець, ці ўмее хто-небудзь яшчэ на лыжах бегаць і страляць. "Аказваецца, умеюць і бегаць, і страляць. Я паабяцаў гэтым дзяўчатам і хлопцам, што летам мы сустрэнемся тут на гэтым стадыёне ўжо на лыжаролерах. Гэта бліжэйшая наша змена. Што маем, тое маем. Але ёсць вельмі нядрэнныя дзяўчаты і хлопцы, якія могуць трапіць нават у новы чатырохгадовы цыкл. Летняя Алімпіяда пройдзе ў Францыі, а зімовая ў Італіі, - заявіў Аляксандр Лукашэнка. - Я вельмі хацеў бы, каб з гэтых маленькіх яшчэ пакуль зорачак выраслі сапраўдныя спартсмены, каб у нас была дастойная канкурэнцыя, каб у нас турыстамі на чэмпіянаты свету і Алімпійскія гульні больш ніхто не ездзіў".

Кіраўнік дзяржавы таксама выказаў пажаданне, каб такія спаборніцтвы сталі традыцыяй.

Ён даў наказ юным спартсменам, заклікаўшы іх цаніць і несці адказнасць перад сваімі бацькамі, балельшчыкамі: "На лыжні трэба "паміраць", каб паказваць нармальныя вынікі. А потым ажываць пасля фінішу. Ведаеце, аб чым я гавару".

Чыноўнікаў ад спорту і трэнераў Аляксандр Лукашэнка папярэдзіў, што калі яны хочуць і далей працаваць, трэба паказваць вынік: "Калі чыноўнікі ад спорту і трэнеры хочуць далей працаваць, значыць, трэба паказваць вынік. Не - значыць, трэба адыходзіць. У гэтым быў сэнс гэтых спаборніцтваў. Я паабяцаў гэтым дзяўчатам і хлопцам, што летам мы сустрэнемся тут на гэтым стадыёне ўжо на лыжаролерах".

На заканчэнне Аляксандр Лукашэнка яшчэ раз заклікаў усіх да здаровага ладу жыцця і заняткаў спортам, для чаго ў Беларусі створаны ўсе неабходныя ўмовы.

У час наведвання цэнтра алімпійскай падрыхтоўкі Кіраўнік дзяржавы таксама паразмаўляў з журналістамі.

Ён лічыць, што ў Беларусі ёсць усё, каб спартсмены заваёўвалі алімпійскія медалі, але няма адказнасці за расходаванне выдзеленых сродкаў.

"Чаго ў нас не хапае для трэніровак і падрыхтоўкі, каб заваёўваць медалі? Усё ёсць, выдатная база: зімовая, школы", - адзначыў Аляксандр Лукашэнка.

Прэзідэнт нагадаў, што ў краіне нават наладзілі вытворчасць лыж. Няхай яны і не прэміум-класа, для спаборніцтваў купляюцца найлепшыя мадэлі, але для трэніровак беларуская экіпіроўка цалкам падыходзіць, адзначыў ён. Акрамя таго, ёсць усё неабходнае абсталяванне, каб ствараць заснежаныя трасы. У Беларусі вырабляюць і ўласныя снежныя цягачы - ратракі, якія выкарыстоўваюцца для падрыхтоўкі гарналыжных схілаў і лыжных трас.

"Інакш кажучы, у нас ёсць усё. І спартсмены талковыя, могуць працаваць з дзеткамі, ёсць і сівавалосыя трэнеры. Але няма адказнасці за тыя грошы, якія ўкладае дзяржава. Крыху, выбачайце, сталі бессаромнымі спартсмены, і трэнеры. Ніводны ў Нарвегіі або нават у Расіі не застаўся б пасля гэтага (няўдалага выступлення на Алімпіядзе. - Заўвага). Нават у багатай Нарвегіі, дзе вялікая колькасць грошай ад нафты. Тое ж самае і ў Расіі. Пра Амерыку і гаварыць няма чаго: праваліўся на першых спаборніцтвах - выкінулі б трэнера. А на наступных спаборніцтвах не паказаў вынік - дні спартсмена былі б злічаны, - падкрэсліў Кіраўнік дзяржавы. - А ў нас можна перавальваючыся. А чаму? А таму што ніхто не плаціць за гэта так, як плацяць там".

"У нас дзяржава за ўсё адказвае, яна ўсё зробіць. Кантролю адпаведнага няма, - адзначыў Аляксандр Лукашэнка. - База ёсць, трэнеры ёсць - прымусіць працаваць. Будуць трэнеры працаваць - нашы хлопцы і дзяўчаты не горшыя, яны пакажуць добрыя вынікі".

Прэзідэнт заявіў, што ў краіне ёсць неабходная спартыўная інфраструктура для падрыхтоўкі спартсменаў, у прыватнасці, па зімовых відах спорту. А добрых атлетаў дзяржава гатова адпраўляць у лепшыя школы Еўропы.

"Патрэбна спагнанне: я ў цябе ўклаў, я табе дапамог як дзяржава - дайце аддачу. Не даяце - ідзіце. Гэта значыць трэба, каб была сістэма. Яна, здаецца, ёсць, як мне дакладваюць, але яна не спрацавала. І трэба строгае спагнанне, - падкрэсліў Аляксандр Лукашэнка. - Калі начальнікі не зробяць высновы, яны будуць зроблены мной".

"Вынікі мы яшчэ прааналізуем і паглядзім, якая школа, якія трэнеры паказалі якія вынікі, каб, шчыра скажу, разумець, мець з імі далей справу ці расстацца. Таму павінен быць аналіз, - сказаў Аляксандр Лукашэнка. - Галоўнае, што я ўбачыў: ёсць хлопцы, ёсць дзяўчаты добрыя. Але з імі працаваць трэба".

Разам з тым Кіраўнік дзяржавы лічыць, што некаторыя вобласці, напрыклад Брэсцкая і Гомельская, маглі выставіць больш спартсменаў. "Чаму, чаго не хапае? Што, нельга падрыхтаваць спартсмена на лыжаролерах у сезон, а потым хоць бы дзясятак-другі чалавек з адной і другой вобласці перакінуць у Віцебск? У нас жа школы ёсць, няхай займаюцца. Нікуды не вартая работа і органаў улады, і спартыўнай супольнасці. Інакш кажучы, ёсць аб чым пагаварыць пры справаздачы Міністэрства спорту, віцэ-прэм'ера і кіраўнікоў Нацыянальнага алімпійскага камітэта. Трэба цяпер разабрацца, пакінуць тых, хто хоча працаваць са спартсменамі, і тых, хто хоча бегчы на ​​лыжах".

У час размовы з прадстаўнікамі СМІ Прэзідэнт заявіў, што Беларусь гатова прадаставіць пляцоўку для мірных перагавораў па ўрэгуляванні канфлікту ва Украіне: "Мы адкрыты. Вось сёння няхай прыязджаюць. Поўнасцю забяспечым і дапаможам у гэтым плане, каб прадухіліць вайну і мясарубку. Пакуль яшчэ гэта канфлікт. Канфлікт на стадыі ўзгарання. Трэба гэта спыніць. Вы ведаеце нашу пазіцыю. Я ў першы ж дзень аб гэтым сказаў".

"У першы дзень я прапанаваў (пляцоўку для перагавораў. - Заўвага). Яны павінны былі прыехаць заўтра. Уладзімір Пуцін мне патэлефанаваў і сказаў... Ну там розныя гульні ідуць. Хто ў Варшаву, хто ў Амерыку. Слухайце, Кіеў фактычна акружаны, а яны разглагольствуюць. Людзі гінуць, а яны яшчэ разглагольствуюць! Але пазіцыю Прэзідэнта Расіі вы ўчора чулі, яна агучана. Ён са мной размаўляў на гэту тэму. Я яму сказаў: калі ласка, дзверы адчынены - у любым месцы, хоць у Палацы Незалежнасці. Забяспечым усё: сустрэнем, скажам, пакажам, раскажам. І поўная бяспека. Прыязджайце", - заявіў Аляксандр Лукашэнка.

Прэзідэнт падкрэсліў, што трэба спыніць гэты канфлікт, пакуль гэта магчыма. "Заўтра будзе вайна, а паслязаўтра - мясарубка. Таму калі ў іх мазгі ёсць - гэтых розных ачумелых, няхай прымаюць рашэнне: садзімся за стол. Калі Расія трэці раз вось літаральна за апошнія дні падштурхоўвае іх і дае згоду, і яны ўжо згодны на ўмовы, якія сёння прапанаваны Расіяй, чаго мы марудзім, людзі ж гінуць! Гэта па-першае. Ну а заўтра, можа, і перагаворы нікому не спатрэбяцца. Можа, краіна-пераможца (вы, напэўна, не сумняваецеся, што можа адбыцца) проста размаўляць ні з кім не стане, - заўважыў Кіраўнік дзяржавы. - Таму, ну вар'яты! І, мне здаецца, зноў жа ёсць сілы, якія гэты рэжым (ва Украіне. - Заўвага) штурхаюць, штурхаюць, штурхаюць: давайце, не здавайцеся, зараз з Афганістана бандыты пад'едуць, зараз з Блізкага Усходу падкінем. Ды і сваіх прыватных ваенных кампаній хапае. Гэта прафесійныя воіны, прафесійныя забойцы. І калі яны туды ўцягнуцца, вы ўявіце, што будзе ва Украіне. Таму ні Расіі, а тым больш нам гэта небяспечней і не патрэбна".

Кіраўнік дзяржавы таксама звярнуў увагу, што Беларусь ужо спрабуюць прадставіць ледзь ці не як удзельніка вайны. "Нас жа ўжо ўсе - ад Японіі да Амерыкі - спрабуюць прыблытаць да гэтай вайны. Ужо нам аб'яўляюць санкцыі. Здаецца, там і гэтыя - шайка, як Пуцін сказаў, МАКаўская (Міжнародны алімпійскі камітэт. - Заўвага) нешта там заявіла, што мы ледзь ці не ў вайне ўдзельнічаем. Ну гэта шукалі падставу. Ясна, што там з-за акіяна патэлефанавалі, сказалі, як дзейнічаць. Так яны і пачынаюць дзейнічаць. Але гэта мы перажывём. Галоўнае, каб не гінулі людзі. Блізкія нам людзі, блізкая нам краіна", - рэзюмаваў Прэзідэнт.