Інтэрв'ю амерыканскай тэлекампаніі NBC

Прэзідэнт Беларусі Аляксандр Лукашэнка 14 кастрычніка ў Астане, дзе прымаў удзел у саміце СНД, даў інтэрв'ю амерыканскай тэлекампаніі NBC.

Кіраўніку дзяржавы было зададзена пытанне адносна таго, як Прэзідэнт Расіі Уладзімір Пуцін рэагуе на сітуацыю, якая складваецца ва Украіне. "Ці не здаецца Вам, што ён напружаны, можа, ён нервуецца?" - пацікавіўся журналіст, адзначыўшы, што Расія пакуль не атрымлівае ва Украіне перамогу.

"Ён жа Прэзідэнт велізарнай краіны. Заўсёды ты адчуваеш нейкае напружанне. Гэта я Вам гавару як Прэзідэнт. Што датычыцца ўкраінскага канфлікту - тое, што Вы гаворыце, ён там не атрымлівае перамогу. Ну ў гэтай вайне і вы не атрымліваеце перамогу. Пяцьдзясят дзяржаў сёння ваююць фактычна супраць Расіі на тэрыторыі Украіны. Там таксама з вашага боку няма перамогі. Таму трэба шукаць шляхі выхаду з існуючай сітуацыі. І павінен вам сказаць, у адрозненне ад вас - заходнікаў - Прэзідэнт Пуцін не раз прапаноўваў варыянты. Проста яго, відаць, не хочуць слухаць і чуць цяпер. А трэба было б. Гэта і наша пазіцыя. І, вы ведаеце, бесперспектыўнасць развіцця ў цяперашняй сітуацыі (як гэта складваецца сітуацыя ва Украіне) прызнаюць і некаторыя члены НАТА. І не некаторыя, а шмат такіх", - заявіў беларускі лідар.

У сувязі з гэтым Аляксандр Лукашэнка прывёў прыклад Турцыі. З Прэзідэнтам гэтай краіны Рэджэпам Таіпам Эрдаганам Кіраўнік дзяржавы сустракаўся напярэдадні на палях саміту НУМДА ў Астане. "Дамовіліся, што ў хуткім часе мы на высокім узроўні правядзём перагаворы, у тым ліку будзем закранаць пытанне Украіны. Такі візіт будзе з майго боку ў Анкару. Я заўважыў, што і Прэзідэнт Эрдаган - адна з ключавых краін у НАТА - яны не ў захапленні ад таго, што адбываецца. І пастаянна нават не намякаюць, а патрабуюць ужо, што трэба садзіцца за стол перагавораў і дамаўляцца. Трэба было ЗША падключыцца да гэтага працэсу ў такім рэчышчы, а не накіроўваць ва Украіну ўсё большую і большую колькасць самых сучасных відаў зброі", - сказаў Прэзідэнт.

"Тым больш, ход сітуацыі на фронце ніякія віды зброі, у тым ліку амерыканскія, не зменяць", - дадаў беларускі лідар.

Кіраўніку дзяржавы было зададзена пытанне наконт таго, ці вялікая верагоднасць, што Прэзідэнт Расіі вырашыць выкарыстоўваць ядзерную зброю.

"Самае галоўнае, свайго субяседніка і нават праціўніка не заганяйце ў кут. Таму не трэба пераходзіць тыя лініі, як расіяне кажуць, "чырвоныя лініі". Нельга іх пераходзіць. Што датычыцца ядзернай зброі, любая зброя для нечага ж ствараецца. Ёсць зброя - зразумела, што яна ствараецца для прымянення. Расія выразна абазначыла сваю пазіцыю: не дай бог, будзе нападзенне на тэрыторыю Расійскай Федэрацыі, у гэтым выпадку Расія можа пры неабходнасці выкарыстоўваць усе віды зброі", - адзначыў Кіраўнік беларускай дзяржавы.

"Што датычыцца падтэксту Вашага пытання, ніколі, у тым ліку і Прэзідэнт Пуцін, кіраўніцтва Расіі не ставіла перад сабой мэту прымяніць ядзерную зброю ва Украіне. Такой неабходнасці няма", - падкрэсліў Аляксандр Лукашэнка.

Прэзідэнт нагадаў, як некалькі дзён таму Расія нанесла высокадакладнай зброяй удары па Украіне ў адказ на дзеянні ў дачыненні да Крымскага моста. "Вы заўважылі, што гэта сіла. І вельмі вялікая. Але гэта яшчэ не ўсё. Расія валодае, гэта я дакладна ведаю, самымі сучаснымі відамі зброі. І не трэба ядзернай зброі. Расія справіцца без ядзернай зброі", - запэўніў Кіраўнік беларускай дзяржавы.

Але, заўважыў ён, паўстае пытанне, каму выгадна мусіраваць гэту тэму і навошта гэта патрэбна. "Загінуць ужо не тысячы, а сотні тысяч людзей (у выпадку выкарыстання ядзернай зброі. - Заўвага). З боку Украіны ў тым ліку", - сказаў ён.

Аляксандр Лукашэнка таксама звярнуў увагу, што ўжо на тэму ядзернай зброі сталі гаварыць і некаторыя лідары ядзерных дзяржаў. "Па-мойму, у Вялікабрытаніі не аднойчы Макрон пачаў гэту тэму закранаць. Ні ў якім выпадку нават размаўляць на гэту тэму нельга. Гэта канец планеты, калі толькі будзе прыменена ядзерная зброя хоць адной дзяржавай. Таму што гэта выкліча ланцуговую рэакцыю. У Расіі гэта цудоўна разумеюць. І ніхто, яшчэ раз падкрэсліваю, я гэта дакладна ведаю, ніхто не ставіць так пытанне і не ставіць сваёй мэтай прымяніць ядзерную зброю. Абсалютна дакладна вам гавару", - заявіў беларускі лідар.

"Трэба шукаць шляхі мірнага вырашэння гэтага канфлікту. Гэта выгадна для ўсіх, у тым ліку для ЗША", - упэўнены Аляксандр Лукашэнка.

"Вы ведаеце, галоўны ініцыятар, які робіць стаўку на прымяненне ядзернай зброі... Не здагадваецеся хто? Я вам скажу. Польшча. Яна правакуе вас - ЗША - на нейкія рухі ў плане ядзернай зброі. Не паддавайцеся на гэтыя хітрыкі. Вы буйная тэхналагічная краіна, не трэба скакаць пад дудку ашалелых палітыкаў", - заклікаў Кіраўнік беларускай дзяржавы.

"Ёсць ядзерная зброя - няхай яна знаходзіцца на складах там, дзе яна ёсць. Таму што калі толькі рушыць ядзерная зброя, дапусцім, у Польшчу - ланцуговая рэакцыя. З другога боку, пойдуць крокі ў адказ. Таму не трэба на гэта ісці. Трэба супакоіцца і сесці за стол перагавораў", - заявіў Аляксандр Лукашэнка.

Прэзідэнта спыталі, ці далучыцца Беларусь да расійскай ваеннай аперацыі. "Мы, як я ўжо шмат разоў гаварыў, удзельнічаем у ваеннай аперацыі, маючы на ўвазе, што мы падтрымліваем Расію ўсяляк. Наша падтрымка заключаецца ў тым, каб заходнія нашы граніцы, у дадзеным выпадку з Польшчай і Літвой, не былі парушаны і не быў нанесены цераз Беларусь удар у спіну расійскім войскам", - адзначыў Кіраўнік дзяржавы.

"Сёння наш удзел заключаецца ў тым, што мы лечым расіян і ўкраінцаў, кормім расіян і ўкраінцаў і больш за ўсё, у пераважнай большасці, даём прытулак бежанцам з Украіны. Іх у суткі да нас прыбывае па 400-500 чалавек. Мы іх ураўноўваем поўнасцю ў правах. Вось наш удзел, - заявіў Аляксандр Лукашэнка. - Але мы нікога там не забівалі і забіваць не збіраемся. Нас, па-першае, ніхто не просіць удзельнічаць у гэтай аперацыі, у дадзеным выпадку Расія. І мы не маем намеру туды ўцягвацца. Мы заўсёды аб гэтым гаварылі і гаворым. Ну, відаць, нас не хочуць слухаць і не хочуць пачуць. Ну, гэта справа ваша".

У інтэрв'ю Аляксандр Лукашэнка заявіў, што лічыць магчымым на працягу тыдня дамовіцца па канфлікце ва Украіне. "Усё залежыць ад ЗША і Вялікабрытаніі. Калі вы зразумееце і пагадзіцеся, што заўтра трэба сесці за стол і дамовіцца, паверце, на працягу тыдня дамовімся", - сказаў Кіраўнік дзяржавы.

Аляксандру Лукашэнку таксама было зададзена пытанне адносна паведамленняў украінскага боку аб масавых пахаваннях і катаваннях.

"Вы ведаеце, ідзе інфармацыйная вайна. Украінцы гавораць аб масавых пахаваннях, злачынствах расійскага боку. А расійскі бок аналагічна выкрывае масавыя злачынствы ўкраінскага боку. Звычайная інфармацыйная атака адзін на аднаго. У гэтай сітуацыі трэба разбірацца ў корані. Ідзе вайна. І ў выніку гэтай вайны, у ходзе гэтай вайны ўсякае магчыма, у тым ліку тое, аб чым вы сказалі", - адзначыў Прэзідэнт.

Ён падкрэсліў, што ў першую чаргу трэба спыніць вайну і шукаць выйсце са становішча, якое склалася, а не размаўляць аб тым, як дрэнна. "Мы ведаем, што дрэнна. Вайна - гэта заўсёды дрэнна, - заўважыў ён. - Я нядаўна сказаў аб тым, што свет заняты цяпер праблемай, і шукаюць адказ на пытанне, хто вінаваты. Слухайце, потым разбяромся, хто вінаваты. Кожны дзень гінуць людзі. Давайце спынім вайну і дамовімся. А потым будзем разбірацца, хто мае рацыю, а хто вінаваты. Напэўна, гэта нармальная формула".

Кіраўнік дзяржавы нагадаў, што працэс перагавораў быў пачаты, але затым спыніўся. "Зяленскаму (кіраўніку Украіны. - Заўвага) забаранілі весці перагаворы. Хто? Здагадайцеся з трох разоў. Ён несамастойны. А сёння фэйкі закідваць... Недзе мае рацыю - не мае рацыю. Абвінавачваць адзін аднаго... Не той шлях. Тысячы людзей кожны дзень гінуць. У тым ліку і грамадзянскія, ні ў чым не вінаватыя. Гэта праўда. Таму давайце спынім гэты канфлікт", - заклікаў беларускі лідар.

Аляксандр Лукашэнка адказаў на пытанне, як цяпер развіваюцца яго адносіны з Прэзідэнтам Расіі Уладзімірам Пуціным.

"Калі гаварыць пра нашы асабістыя адносіны з Прэзідэнтам Пуціным, ну, яны не заўсёды былі бязвоблачнымі. Вы ведаеце, што мы і спрачаліся, і сварыліся часам. Але як самыя блізкія сябры і надзейныя партнёры. Як я аднойчы сказаў, такога ўзроўню ўзаемаадносін, як паміж прэзідэнтамі Беларусі і Расіі, няма ні ў каго. Гэта па-першае. Па-другое, апошнім часам нашы адносіны толькі ўзмацніліся, умацаваліся. Мы абсалютна давяраем адзін аднаму. Таму праблем практычна няма ў зносінах", - расказаў беларускі лідар.

Журналіст NBC таксама папрасіў Кіраўніка беларускай дзяржавы апісаць цяперашні стан Уладзіміра Пуціна - тое, аб чым ён думае. "Гэта не тое, што вы думаеце на Захадзе і ў ЗША. Абсалютна адэкватны, здаровы, спартыўна падцягнуты чалавек. Як вы гэта бачыце знешне. Абсалютна адэкватны чалавек", - запэўніў Прэзідэнт Беларусі.