Даклад спецыяльнага пасланніка Віктара Шэймана

Прэзідэнт Беларусі Аляксандр Лукашэнка 16 сакавіка прыняў з дакладам спецыяльнага пасланніка Кіраўніка дзяржавы Віктара Шэймана, які курыруе развіццё супрацоўніцтва з краінамі Афрыканскага кантынента.

"Генералаў былых не бывае, і вышэйшых службовых асоб таксама. Афрыка застаецца за табой як спецыяльным пасланнікам Прэзідэнта", - адзначыў Кіраўнік дзяржавы, звяртаючыся да Віктара Шэймана.

Аляксандр Лукашэнка пацікавіўся, як вядзецца работа над сумеснымі праектамі ў Афрыцы, у тым ліку па выніках праведзенага нядаўна візіту ў Зімбабвэ. Пытанне сумеснай работы ў гэтым напрамку таксама абмяркоўвалася на сустрэчах з кіраўніцтвам ААЭ, Расіі і Кітая. "Мне хацелася б ведаць. Пасля візіту ў Зімбабвэ, у Эміраты, пасля перагавораў з расіянамі, мы дамаўляліся з кітайцамі аб некаторых сумесных праектах у Афрыцы. І ў тым ліку ў Зімбабвэ. Як рухаюцца гэтыя пытанні? Мы ж абяцалі дапамагчы ім у ахове здароўя - сістэму наладзіць. Мацярынская, дзіцячая смяротнасць. Тут мы ім павінны вельмі сур'ёзна дапамагчы. З дзіцячым харчаваннем. У бліжэйшы час прыязджаюць іх людзі. У тым ліку жонка Прэзідэнта (Зімбабвэ. - Заўвага). У нас будуць працаваць, весці перагаворы", - сказаў Кіраўнік дзяржавы.

Ён таксама спытаў, як ідуць справы ў рэальным сектары эканомікі, як развіваецца супрацоўніцтва з іншымі краінамі Афрыканскага кантынента. "Многія пасля гэтага візіту зацікаўлены ў нашай рабоце. Словам, вось гэты комплекс, і ў тым ліку недахопы якія ёсць? - пацікавіўся Прэзідэнт. - Я гляджу ў СМІ нехта ўкідвае або сапраўды ў нас ёсць праблемы з пастаўкамі нашай тэхнікі на афрыканскі рынак? Каб у нас там парадак быў, жалезны парадак. Каб афрыканцы разумелі, што мы людзі добрасумленныя і адказныя. Каб мы там залішне нічога не патрабавалі".