Першы намеснік Кіраўніка Адміністрацыі Прэзідэнта Уладзімір Пярцоў наведаў VII пазачарговы з'езд РГА "Белая Русь"

РГА "Белая Русь" адыгрывае ключавую ролю ў фарміраванні грамадзянскай самасвядомасці і кансалідацыі грамадства. Аб гэтым заявіў Першы намеснік Кіраўніка Адміністрацыі Прэзідэнта Беларусі Уладзімір Пярцоў пасля прыняцця праграмы РГА "Белая Русь" на 2026-2030 гады ў час VII пазачарговага з'езда аб'яднання ў Мінску.

Першы намеснік Кіраўніка Адміністрацыі Прэзідэнта адзначыў, што праграма "Белай Русі" сугучная з праграмай сацыяльна-эканамічнага развіцця краіны. "А па-іншаму быць і не можа. У нас агульнанацыянальныя задачы. "Белая Русь" адыгрывае ключавую ролю ў фарміраванні грамадзянскай самасвядомасці і кансалідацыі нашага грамадства", - сказаў Уладзімір Пярцоў.

"З'яўляючыся суб'ектам рэалізацыі Дырэктывы № 12, на вас у тым ліку ўскладзена вялікая адказнасць за выбудоўванне дыялогу з людзьмі. Неабходна задзейнічаць патэнцыял РГА для ўдзелу ў дыскусійных пляцоўках і праграмах, у рэспубліканскіх і рэгіянальных сродках масавай інфармацыі, каб простай мовай даносіць праграму сацыяльна-эканамічнага развіцця нашай краіны, праграму "Белай Русі" насельніцтву. Упэўнены, што з тымі навыкамі, якія ў вас ёсць, з вашым глыбокім разуменнем кожнага пункта гэтых праграм у вас атрымаецца стварыць той самы станоўчы рэзананс", - падкрэсліў Уладзімір Пярцоў.

Ён сказаў, што настаў час выходзіць за рамкі дзяржсектара. "Актыўней звярніце ўвагу на прадстаўнікоў прыватнага сектара эканомікі. У вас ёсць магчымасці для таго, каб ісці да прыватнікаў. У вас ёсць шмат добрых ініцыятыў. Ёсць і тыя, хто на месцах можа прыйсці да іх і выбудаваць той самы гарызантальны, канструктыўны дыялог, уключаючы ва ўсе вашы грамадскія ініцыятывы супрацоўнікаў і гэтых прадпрыемстваў. Так у нас будзе ўсеагульная кансалідацыя грамадства", - рэзюмаваў Першы намеснік Кіраўніка Адміністрацыі Прэзідэнта.