Уручэнне дзяржаўных узнагарод

Прэзідэнт Беларусі Аляксандр Лукашэнка напярэдадні Дня народнага адзінства, які адзначаецца 17 верасня, уручыў дзяржаўныя ўзнагароды дзеячам розных сфер.

"Ушаноўваем беларусаў, якія сваімі талентам, працавітасцю дасягнулі вялікіх вышынь у вытворчай і творчай дзейнасці, у служэнні Радзіме і свайму народу, - адзначыў Кіраўнік дзяржавы. - У Год гістарычнай памяці лічу важным падкрэсліць, што дзень 17 верасня вярнуўся ў наш святочны каляндар не толькі як напамін аб каштоўнасці свабоды і незалежнасці, але і як даніна эпосе, якая падарыла нам, беларусам, права заняць сваё месца на карце свету".

"Мы будзем помніць аб гэтым, як і тое, што мы адбыліся як народ, нацыя, дзяржава, перамаглі ў Вялікай Айчыннай вайне, адрадзілі краіну з попелу і нават апярэдзілі некаторых у асваенні космасу, ядзернай энергетыцы, біятэхналогіях дзякуючы людзям працы. Людзям, якія заўсёды ставілі інтарэсы дзяржавы вышэй за асабістыя. Такім, як вы", - падкрэсліў беларускі лідар.

Звяртаючыся да ўдзельнікаў урачыстага мерапрыемства, Аляксандр Лукашэнка адзначыў, што яны ішлі да сваіх заслужаных дзяржаўных узнагарод - ордэнаў, медалёў, ганаровых званняў, як часта бывае ў жыцці, праз узлёты і падзенні, праз цяжкасці і перашкоды, але заўсёды сумленна і дастойна. У кожнага за плячыма свая жыццёвая гісторыя і свой шлях.

"Усіх вас аб'ядноўвае адзін лёс - лёс нашай Беларусі, слаўны летапіс якой мы з вамі прадаўжаем", - падкрэсліў Прэзідэнт.

Аляксандр Лукашэнка адзначыў, што ў яго вачах кожная гісторыя заслугоўвае асобнага расказу, асобных слоў удзячнасці. Але не ўсе, на жаль, можна агучыць.

Выступаючы з прамовай, Кіраўнік дзяржавы заявіў, што хоча ўдзяліць увагу зусім юнаму грамадзяніну Беларусі, які прысутнічае на цырымоніі. "Чалавеку з велізарным сэрцам", - падкрэсліў Прэзідэнт.

Ім аказаўся васьмікласнік Багдан Шэлег з аграгарадка Макраны Маларыцкага раёна. Падлетак выратаваў падчас пажару дзвюх маленькіх сясцёр, літаральна вынес дзяўчынак з агню на абпаленых руках. Здарэнне адбылося ў лютым гэтага года. Узгаранне ў доме адбылося пад раніцу, бацькі былі на працы.

"Гэта будучыня. Такія героі павінны быць у Беларусі", - падкрэсліў Аляксандр Лукашэнка на цырымоніі ўручэння дзяржаўных узнагарод.

Кіраўнік дзяржавы павіншаваў усіх з надыходзячым святам - Днём народнага адзінства - і пажадаў, каб заслужаныя ўзнагароды і званні сталі чарговай прыступкай да новых прафесійных і творчых перамог у іх жыцці.

Ордэна Айчыны ІІ ступені ўдастоены генеральны дырэктар дзяржаўнага вытворчага аб'яднання "Беларуснафта" - генеральны дырэктар рэспубліканскага унітарнага прадпрыемства "Вытворчае аб'яднанне "Беларуснафта" Аляксандр Ляхаў.

Ордэнам Айчыны ІІІ ступені ўзнагароджаны Надзвычайны і Паўнамоцны Пасол Рэспублікі Беларусь у Расійскай Федэрацыі (2018-2022 гады) Уладзімір Сямашка, Старшыня Вярхоўнага Суда Валянцін Сукала.

Ордэна Працоўнай Славы ўдастоены два прадстаўнікі Мінскага трактарнага завода - электрагазазваршчык Святаслаў Вецерац, аператар сталеліцейнага цэха Андрэй Свірыдаў, а таксама дырэктар унітарнага аграрнага прадпрыемства "Моладава-Агра" Іванаўскага раёна Сцяпан Халько.

Ордэнам "За службу Радзіме" ІІІ ступені ўзнагароджаны начальнік Інстытута пагранічнай службы Сяргей Жылінскі.

Ордэна Пашаны ўдастоены генеральны дырэктар ААТ "Мастоўдрэў" Сяргей Асосаў, начальнік Барысаўскага цэха адкрытага акцыянернага таварыства "Белдругасчормет" Мікалай Дакука, майстар Віцебскага цэха вытворчага унітарнага прадпрыемства "Віцебскдругасчормет" Юрый Раслякоў.

Медаль "За выратаванае жыццё" ўручана вучню Макранскай сярэдняй школы Маларыцкага раёна Багдану Шэлегу.

Прадстаўнікі розных сфер таксама ўдастоены медалёў "За працоўныя заслугі", Францыска Скарыны, адзначаны ганаровымі званнямі ў сферы культуры і мастацтва, адукацыі, будаўнічай галіны і архітэктуры, спорту.

Народнай артысткай Беларусі стала артыст-вакаліст, вядучы майстар сцэны заслужанага калектыву "Беларускі дзяржаўны акадэмічны музычны тэатр" Маргарыта Александровіч.