Віншаванне работнікам і ветэранам радыё, тэлебачання і сувязі з прафесійным святам

Прэзідэнт Беларусі Аляксандр Лукашэнка павіншаваў работнікаў і ветэранаў радыё, тэлебачання і сувязі з прафесійным святам.

"Вынаходства радыё 130 гадоў таму стала магутным імпульсам для тэхналагічнага і інфармацыйнага прагрэсу, запусціўшы новы этап у развіцці чалавецтва - глабальнасці, даступнасці і імгненнай хуткасці перадачы навін", - гаворыцца ў віншаванні.

Кіраўнік дзяржавы адзначыў, што сродкі масавай інфармацыі, а таксама сучасная сувязь і цяпер трансфармуюцца: "Адбываецца чарговы тэхналагічны пералом, які патрабуе інтэлектуальных і тэхнічных рэсурсаў. Беларусь дзякуючы прадуманай дзяржаўнай стратэгіі валодае дастатковымі магчымасцямі для ўкаранення інавацый".

Прэзідэнт падкрэсліў, што айчынныя тэлеканалы і радыёстанцыі пастаянна працуюць над стварэннем якаснага нацыянальнага кантэнту, карыстаюцца важкім аўтарытэтам у краіне і за яе межамі. "Калектывы рэдакцый і журналісты не раз паказвалі прыклад грамадзянскай мужнасці ў крытычных сітуацыях, абараняючы сваю краіну, праўду і справядлівасць. Перакананы, што і ў далейшым вы захаваеце лепшыя традыцыі і заўсёды будзеце працаваць на карысць Беларусі і яе народа", - дадаў ён.

Аляксандр Лукашэнка пажадаў работнікам і ветэранам радыё, тэлебачання і сувязі моцнага здароўя, шчасця, добрых рэйтынгаў і пакарэння новых прафесійных вяршынь.