Наведванне вытворчых пляцовак холдынга "Гарызонт"

Прэзідэнт Беларусі Аляксандр Лукашэнка 31 снежня ў час наведвання холдынга "Гарызонт" даў афіцыйны старт масавай рабатызаванай вытворчасці тэлевізараў са штучным інтэлектам, якая не мае аналагаў у краінах СНД і Еўропе.

Новы завод функцыянуе па прынцыпе lights out фактычна без удзелу чалавека. Усе ключавыя аперацыі выконваюць прамысловыя робаты і аўтаматызаваныя сістэмы, інтэграваныя ў скразную сістэму лічбавага кіравання вытворчым цыклам. Прадукцыя завода - гэта не проста тэлевізары, а аўтаматызаваныя ўстройствы новага пакалення, якія аб'ядноўваюць у сабе функцыі мультымедыйнага цэнтра, інтэлектуальнага памочніка і цэнтра кіравання "разумным домам".

Аляксандр Лукашэнка растлумачыў, чаму вырашыў у пераднавагодні дзень наведаць холдынг "Гарызонт". "Мне прапанавалі варыянты. Я сказаў: "Я паеду ў будучыню". Вы - будучыня краіны. Такія прадпрыемствы, як вы, - будучыня краіны, - адзначыў Кіраўнік дзяржавы. - Вядома, мы вас будзем грузіць. І будзем іншых грузіць, каб яны прыязджалі сюды і бачылі, куды будзе развівацца краіна, у якім напрамку. Тое, аб чым вы сёння мне расказваеце, я нават асэнсаваць не магу. Гэта настолькі ўнікальнае і новае".

Яшчэ адной прычынай, чаму Прэзідэнт вырашыў прыехаць на "Гарызонт", стала настальгія. Упершыню ён наведваў гэта прадпрыемства яшчэ ў дзевяностых. "Калі мне прапанавалі прадпрыемствы, (вырашыў, што. - Заўвага) на "Гарызонт" я паеду. Гэта маё прэзідэнцкае юнацтва, настальгія - нікуды ад яго не дзецца", - дадаў Аляксандр Лукашэнка.

Як далажылі Прэзідэнту, на сучасным рабатызаваным тэлевізійным заводзе сабралі ўсе лепшыя тэхналогіі, абучылі спецыялістаў. Усяго ў холдынг "Гарызонт" уваходзяць 17 прадпрыемстваў. Па выніках пяцігодкі дасягнуты трохразовы рост вытворчасці і выручкі, высокія экспартныя паказчыкі. Паводле слоў кіраўніка холдынга, на наступную пяцігодку прадпрыемства ставіць задачу нарасціць вытворчасць на 36%, павялічыць экспарт амаль на 40%, прадукцыйнасць працы - практычна на 50%, а сярэднюю зарплату - на 37%.

Пры гэтым холдынг нясе і значную сацыяльную нагрузку, уключаючы дашкольныя, аздараўленчыя, спартыўныя ўстановы.

"Дзякуй за сацыяльную сферу. Трэнд быў у Беларусі - усе хацелі вызваліцца ад сацыяльнай сферы. Рынак - "гэта няпрофільнае, давайце аддадзім..." - заўважыў Кіраўнік дзяржавы.

"Ты малайчына, што гэта ўсё захаваў. Гэта вялікая нагрузка - велізарны "цэх". Гэта добры прыклад, што гэта трэба ўсё захаваць", - дадаў Аляксандр Лукашэнка, звяртаючыся да генеральнага дырэктара ААТ "Кіруючая кампанія холдынга "Гарызонт" Юрыя Прэдкі.

Кіраўнік дзяржавы таксама звярнуў увагу, што "Гарызонт" і ўсе прадпрыемствы, якія ўваходзяць у холдынг, маюць добры эканамічны вынік. "Пад гэта мы вам будзем усяляк дапамагаць. Таму што калі рубель уклаў, вы вернеце дзесяць рублёў. І сабе, і дзяржаве будзе карысць", - адзначыў ён.

"Мы не пашкадуем сродкаў на тое перспектыўнае, што вы ў тым ліку будзеце ствараць. Гэта такі сімвалічны візіт, прыезд да вас, каб паказаць, што вы ў авангардзе нашай прамысловай вытворчасці. І на такіх, як вы, мы будзем рабіць стаўку", - падкрэсліў беларускі лідар.

Аляксандр Лукашэнка зрабіў акцэнт на развіцці высокіх тэхналогій і штучнага інтэлекту, чаму ў Беларусі садзейнічае ў тым ліку айчынная ІТ-школа. "Можа, нам і хацелася б (у тым ліку і вашаму генеральнаму дырэктару) затармазіць час, каб чалавек займаў цэнтральнае месца ў гэтай вытворчасці. Але жыццё не спыніш. Калі мы затармозім, спынімся з гэтым штучным інтэлектам, краіны пойдуць далёка наперад, а мы будзем плесціся ў хвасце. А так мы ў авангардзе", - канстатаваў ён.

"Свет развіваецца, і вы не згубіліся. Вы ідзяце ў трэндзе, як цяпер моладзь кажа. Гэта нельга страціць, гэта будучыня. Але пажадана, каб усё гэта вы рабілі самі", - дадаў беларускі лідар.

У якасці аднаго з прыкладаў перспектыўных і важных распрацовак ААТ "H Холдынг" Прэзідэнт назваў аўтаматызаваную даільную ўстаноўку на аснове рабатызаванага маніпулятара з элементамі штучнага інтэлекту, макет якой яму прадставілі.

Прадукт пакуль не гатовы да масавай вытворчасці, але працэс ідзе. Гэтай распрацоўкай на прадпрыемстве заняліся ініцыятыўна. І Прэзідэнт прызнаўся, што для яго было дзіўна, калі ён даведаўся аб гэтай распрацоўцы, што "Гарызонт" будзе даіць кароў.

"Зробіце - не пашкадуем нічога для вас. Таму што для нас гэта важна, - сказаў Аляксандр Лукашэнка. - Гэта наша будучыня, калі мы хочам прадаўжаць забяспечваць уласную харчовую бяспеку. Калі, мужыкі, вы гэта зробіце, вы зробіце вялікую справу. Нам патрэбны вынік".

"Малочныя прадукты ўсе любяць - пачынаючы ад сыркоў і заканчваючы марожаным. А ўсё гэта малако. Харчовая бяспека", - дадаў Кіраўнік дзяржавы.

Аляксандр Лукашэнка на прадпрыемстве паразмаўляў з прадстаўнікамі працоўнага калектыву, навучэнцамі дзіцячага цэнтра "Гарызонт" і іх бацькамі.

Яны ў першую чаргу выказалі ўдзячнасць Прэзідэнту за праводзімую ім палітыку і захаванне міру ў Беларусі.

Прэзідэнт звярнуў увагу, што на фоне складанай абстаноўкі ў свеце і ў суседніх з Беларуссю краінах людзі пачалі больш цаніць мір і разумець, наколькі празорлівыя былі старэйшыя пакаленні, якія лічылі мірнае неба над галавой самым важным прыярытэтам. "Сёння і мы ўжо гаворым аб тым, каб было мірнае неба над галавой. Гэта галоўнае", - заўважыў Аляксандр Лукашэнка.

У свеце ёсць шмат прыкладаў, калі з-за ўзброеных канфліктаў знішчаецца вытворчая інфраструктура. Адзін з іх - удар расійскім "Арэшнікам" па заводзе "Поўдзеньмаш" ва Украіне. "Велізарнае прадпрыемства, якое было ўнікальнае ў Савецкім Саюзе, там 5-7 паверхаў пад зямлёй (усё рыхтаваліся да ядзернай вайны). І вось "Арэшнік" нанёс па "Поўдзеньмашы" адзін удар, і такога велізарнага прадпрыемства, унікальнага ў свеце, не стала за адну хвіліну. Я ўжо не гавару, колькі людзей загінула", - сказаў Кіраўнік дзяржавы.

"Калі ёсць мір, мы ўсё зробім, што нам патрэбна. Чаго ў нас няма, мы купім. Але для гэтага патрэбны мір, гэта - аснова. Таму мы будзем рабіць усё для таго, каб вы маглі працаваць, жыць спакойна і ствараць будучыню. Мы будзем старацца гэта ўсё для вас зрабіць", - падкрэсліў Аляксандр Лукашэнка.

Кіраўнік дзяржавы заклікаў усіх цаніць тое, што ёсць у Беларусі, і ўсім разам прымнажаць існуючыя дасягненні. Тым больш што ёсць такія пазітыўныя прыклады сучаснага, эфектыўнага развіцця, як холдынг "Гарызонт", за якімі - будучыня.

"Не імкніцеся кудысьці, не трэба. Там нас не чакаюць. А калі чакаюць, то памыць посуд, яшчэ нешта, - сказаў Аляксандр Лукашэнка. - Некаторыя збеглі, цяпер просяцца назад. Збегчы проста, а вярнуцца складаней. Хоць мы робім усё для таго, каб тыя, хто ачумеў у свой час, маглі вярнуцца дадому і працаваць. На "Гарызонце" таксама былі такія. Але нарэшце зразумелі, што галоўнае - гэта наша зямля. І вось гэтыя канвееры, рабатызаваныя комплексы павінны стаяць у нас".

Прэзідэнт станоўча выказаўся аб існуючай на "Гарызонце" традыцыі перыядычна прыводзіць у цэхі дзяцей і знаёміць іх з вытворчасцю. Паколькі менавіта за такімі флагманскімі прадпрыемствамі - будучыня краіны, і сюды будуць імкнуцца на работу прадстаўнікі маладога пакалення. Наконт гэтага Кіраўнік дзяржавы таксама згадаў аб пытаннях дэмаграфічнай бяспекі і праблемах, з якімі сутыкаюцца многія еўрапейскія краіны, у тым ліку і Беларусь. "Насельніцтва пачало змяншацца там, і мы ў гэты трэнд трапілі", - заўважыў Аляксандр Лукашэнка. Паводле яго слоў, з боку дзяржавы будуць прадугледжаны дадатковыя меры, каб павялічыць нараджальнасць, каб у сем'ях было мінімум па трое дзяцей. "Будуць трое - хаця б трое - тады краіна будзе жыць і развівацца", - сказаў беларускі лідар.

У час размовы з журналістамі Прэзідэнт выказаўся пра атаку ўкраінскіх дронаў на рэзідэнцыю Прэзідэнта Расіі Уладзіміра Пуціна.

"Вядома, гэта жудасны тэрарызм на самым высокім дзяржаўным узроўні. Калі гэта так, як гэта цяпер падносіцца", - сказаў Аляксандр Лукашэнка. 

"Я якраз думаю аб тым, каму гэта трэба было, да чаго гэта магло прывесці. Ну, каму трэба, - я падазраю, хто там стаіць за Уладзімірам Аляксандравічам Зяленскім. Думаю, што калі ён да гэтага і мае дачыненне, то ён не ведаў, што ён робіць. Гэта па-першае", - сказаў Прэзідэнт. 

Аляксандр Лукашэнка звярнуў увагу, што ў Расіі ёсць і былі ўсе магчымасці для таго, каб нанесці ўдар па той ці іншай рэзідэнцыі Зяленскага, калі ён там будзе. "Я вам нават больш скажу. Калі прымянілі першы раз "Арэшнік", некаторыя гарачыя галовы (мне Пуцін расказваў, мы абмяркоўвалі) прапаноўвалі яму: вось па гэтых тэрарыстах і гэтак далей трэба нанесці другі ўдар, а тое і па цэнтрах прыняцця рашэнняў. Пуцін катэгарычна з парога адхіліў гэту ідэю", - падзяліўся беларускі лідар. 

Прэзідэнт канстатаваў, што ў ходзе гэтага канфлікту так склалася сітуацыя, што ні адзін з бакоў не атакаваў першую асобу другога боку: "Не тое, што яны дамовіліся не страляць адзін у аднаго, а так склалася сітуацыя ў гэтай вайне, што ніхто нікога не спрабаваў забіць з кіраўнікоў дзяржаў. Ніхто гэтага не рабіў. І тут - спроба нанясення ўдару па адной з рэзідэнцый Прэзідэнта". 

Што датычыцца самой рэзідэнцыі расійскага лідара ў Наўгародскай вобласці, Аляксандр Лукашэнка расказаў, што гэта загарадны дом, куды прыязджалі многія замежныя госці: "Помню, Пуцін мне расказваў пра візіт Гельмута Коля - германскага лідара. Там (у гэтай рэзідэнцыі. - Заўвага) можна ўбачыць, што такое Расія". 

Такім чынам, канстатаваў Прэзідэнт Беларусі, яго расійскі калега фактычна і не бывае ў гэтай рэзідэнцыі. "Што, украінцы не ведалі аб гэтым, што там Прэзідэнт фактычна не бывае? Ведалі. Тады навошта было беспілотнікі накіроўваць у гэта месца? Навошта? Сэнсу ж ніякага няма", - адзначыў ён. 

З другога боку, нават калі гэта была б жылая рэзідэнцыя, то гэта атака таксама не змяніла б сітуацыю на полі бою, упэўнены беларускі лідар. 

"Таму я думаю аб тым, хто за гэтым стаіць. Зразумела, хто. Мае дачыненне да гэтага Уладзімір Аляксандравіч (Зяленскі. - Заўвага) ці не? Думаю, што калі мае дачыненне, то няшмат. Гэта сведчыць аб высокай небяспецы, што Украіна малакіруемая ўжо, калі ён не стаіць за гэтым. Ну а навошта гэта трэба? Вось я над чым разважаю, на чым сканцэнтраваны сёння, - сказаў Прэзідэнт. - А тое, што гэта дзікасць, глупства… Гэта вар'яцтва. Гэта не трэба было рабіць абсалютна. Таму што гэта ні да чаго не прывядзе. Гэта факт. Вось так я расцэньваю гэта".

"Але час пакажа, што тут было, што за гэтым стаіць", - дадаў Кіраўнік дзяржавы.

Аляксандр Лукашэнка адзначыў, што яшчэ хоча дадаткова асэнсаваць тое, што адбылося, сабраць больш інфармацыі і зрабіць адпаведныя высновы, але для гэтага яшчэ патрэбны некаторы час.

"Можа, яны хацелі справакаваць Пуціна ў момант, калі ўжо мір вось побач. Каб сарваць гэты перагаворны працэс. Ёсць такі пункт гледжання. Што Пуцін там пойдзе на нейкую эскалацыю, што ён адмовіцца ад мірнага нейкага шляху. А сёння раніцай я ўжо заўважыў: нічога падобнага. У гэтым увесь Пуцін. Ён не мітусіцца. І ён мае рацыю. Не трэба спяшацца. Ёсць мірны трэк - ідзём па ім", - заявіў Кіраўнік дзяржавы.

"Ну калі хтосьці не хоча і будзе такія правакацыі прадаўжаць, чым гэта закончыцца - таксама зразумела. Таму я б усё ж такі... Хацеў сказаць "параіць"... Ну што ім раіць? Ім рай, не рай - яны ўсё роўна робяць па-свойму ва Украіне. Але проста папярэдзіць хачу, што гэта закончыцца бядой. У Расіі ёсць чым бахнуць па цэнтрах прыняцця рашэнняў, што каменя на камені не застанецца", - звярнуў увагу Аляксандр Лукашэнка.

"Трэба спыніцца, трэба, каб у будучым годзе ўсё ж такі дамовіліся аб міры. І я вельмі хацеў бы, каб у гэтым плане Дональд Трамп быў шчыры. Каб гэта не было ігрой ці спектаклем, дзе адну і тую ж ролю іграе Трамп і Захад у цэлым або еўрапейскія дзяржавы. Штосьці я так падазраю, калі так, што там нашы "браты-англічане" стаяць за гэтым. Цалкам магчыма", - сказаў Кіраўнік дзяржавы.

"Такія моманты, калі ажыццяўляецца тэрарыстычная атака на Прэзідэнта, - гэта рэдкасць. І не бывае, каб хтосьці вялікі гэта не адобрыў. Гэта з вопыту", - заявіў Прэзідэнт.

"Уладзіміру Аляксандравічу (Зяленскаму. - Заўвага) не трэба гэтым шляхам ісці. І так загубіў квітнеючую частку Еўропы. Ну, даб'е канчаткова. Не трэба яму гэтым шляхам ісці. Трэба, пакуль не позна, дамовіцца", - падкрэсліў Аляксандр Лукашэнка.

Прэзідэнт расказаў, як перасцерагаў свайго расійскага калегу Уладзіміра Пуціна ад небяспекі замаху на жыццё.

"Сёння ноччу я падумаў аб тым, што… Успомніў размову з Пуціным. Па-мойму, гэта было перад БРІКС у Паўднёвай Афрыцы. Чамаданы збірае. Я гавару: "Ты куды?" - "Ды ты што, не ведаеш? У нас жа БРІКС" (адказаў Пуцін. - Заўвага)". Кажу: "Ты што, сабраўся туды ляцець?" Такая сяброўская, братэрская размова. Старэйшаму брату: "Ты сабраўся туды ляцець?" - "Ну вось, прасілі, мяне ж там чакаюць". Я гавару: "Ты што! Вайна ідзе!" - "Ну, яны ж не такія шалёныя ўжо, не настолькі шалёныя". Я гавару: "І ты што, лічыш, што там усе ў цвярозым розуме? Няма чаго туды ехаць!" Паляцеў Лаўроў тады. Можа, не таму, што я націснуў. Але я яму выказаў сваё меркаванне", - падзяліўся падрабязнасцямі Аляксандр Лукашэнка.

"Але гэта не проста была такая, ведаеш, вясковая размова. Наша разведка (малайцы яны, апошнім часам працуюць нядрэнна) нас інфармавала. На ўзроўні там размоў, плётак з Захаду, што рыхтуецца тэрарыстычны акт супраць Прэзідэнта Расіі. І я яму часта гавару: "Ну вайна ідзе, ну не трэба туды лятаць. Калі камусьці трэба - яны да цябе прыляцяць, - сказаў Прэзідэнт Беларусі. - Вось ён паклікаў нас у Піцер. Яго бліжэйшыя сябры прыляцелі туды. Прыляцяць і іншыя. І Сі Цзіньпін прыляціць, і з Ірана, з іншых краін прыляцяць людзі. Але трэба неяк больш акуратна. Гэтым людзям давяраць нельга. Але, кажу, табе (Уладзіміру Пуціну. - Заўвага) лепш відаць, ты ў гэтай сферы працаваў, гэта ваша сфера (чэкісцкая), табе лепш відаць. Вось такая нейкая была не бесклапотнасць, а страта нейкай пільнасці".

"І я сёння падумаў аб тым, што наколькі я меў рацыю, калі папярэджваў яго і перасцерагаў. Вядома ж, усе яны на Захадзе разумеюць: устараніць Пуціна - усё будзе інакш. Да гэтага трэба ставіцца сур'ёзна. Я пра гэта расказваю ўпершыню сёння, таму што не трэба быць бестурботным. Яны падманвалі, і гэта ён прызнае, пастаянна", - сказаў беларускі лідар.

Аляксандр Лукашэнка ў сувязі з гэтым нагадаў аб сітуацыі ў самым пачатку процістаяння ў 2022 годзе. "Першыя месяцы і нават тыдні, калі расійскія войскі былі ў Кіеве. І тады католікі, яўрэі - яны былі, два гэтыя магутныя кланы, наперадзе: "Ох, трэба заканчваць вайну…" І Пуцін кажа: "Так, трэба заканчваць". Па мордзе надавалі адзін аднаму, давайце спынімся. - "Так, Уладзімір Уладзіміравіч, ну трэба вывесці вось войскі і ўсё, мы замірыліся, мы спыніліся (запэўнівалі Прэзідэнта Расіі. - Заўвага)". Спыніліся? Не спыніліся. Гэта значыць, ім верыць нельга", - прывёў прыклад Кіраўнік дзяржавы.

Напрыканцы сустрэчы Прэзідэнту на "Гарызонце" ўручылі сімвалічныя і арыгінальныя падарункі - планшэт уласнай вытворчасці і выраб выхаванцаў дзіцячага цэнтра.