Падпісаны Закон "Аб змяненні кодэксаў па пытаннях адміністрацыйнай адказнасці"

Прэзідэнт Беларусі Аляксандр Лукашэнка падпісаў Закон "Аб змяненні кодэксаў па пытаннях адміністрацыйнай адказнасці". Гэта першая маштабная карэкціроўка гэтых кодэксаў з моманту іх прыняцця ў 2021 годзе.

Прадугледжваюцца меры адміністрацыйнага ўздзеяння за шэраг новых правапарушэнняў: незаконныя аперацыі з лічбавымі знакамі (токенамі), парушэнне патрабаванняў да ахопу тэрыторый паслугамі сотавай сувязі і іх якасці, невыкананне парадку набыцця службовых легкавых аўтамабіляў і г.д.

Асобны блок прысвечаны абароне традыцыйных каштоўнасцей. Уводзіцца адказнасць за прапаганду гомасексуальных адносін, змены полу, педафіліі і бяздзетнасці ў выглядзе штрафу ў памеры да 900 рублёў, а пры ўчыненні ў адносінах да непаўналетняга - да 1350 рублёў або адміністрацыйнага арышту.

Закон таксама ўзмацняе прафілактыку правапарушэнняў сярод падлеткаў. Прапісана асобная глава, якая рэгулюе парадак прымянення мер выхаваўчага ўздзеяння ў адносінах да непаўналетніх (выканаўцы, працэдура, тэрміны).

Пашыраны падставы для вызвалення ад адказнасці. Напрыклад, пры добраахвотнай кампенсацыі шкоды, прычыненай навакольнаму асяроддзю, або выпраўленні памылак у статыстычных дакументах.

Зроблены дадатковыя крокі ў бок дэбюракратызацыі адміністрацыйнага працэсу. Цяпер скаргу на дзеянне службовых асоб, якія вядуць працэс, можна будзе падаць у электронным выглядзе. Некаторыя справы можна будзе разглядаць без асабістай прысутнасці грамадзяніна, калі ён пісьмова хадайнічае аб гэтым.

Яшчэ каля 150 артыкулаў кодэксаў карэкціруюцца ў мэтах прывядзення ў адпаведнасць з галіновым заканадаўствам і ўдасканалення з улікам практыкі прымянення на аснове больш як 500 прапаноў, што паступілі, звязаных з удакладненнем падведамнасці спраў, правоў і абавязкаў удзельнікаў працэсу, складу правапарушэнняў.