Аб мерах па аказанні дзяржаўнай падтрымкі

Прэзідэнт Беларусі Аляксандр Лукашэнка 1 кастрычніка падпісаў Указ № 375 "Аб мерах па аказанні дзяржаўнай падтрымкі".

У адпаведнасці з дакументам прадугледжваецца комплексная карэкціроўка заканадаўства па пытаннях аказання грамадзянам дзяржаўнай падтрымкі пры будаўніцтве жылля.

У прыватнасці, змяненні ўносяцца ва ўказы: ад 6 студзеня 2012 года № 13 "Аб некаторых пытаннях прадастаўлення грамадзянам дзяржаўнай падтрымкі пры будаўніцтве (рэканструкцыі) або набыцці жылых памяшканняў"; ад 4 жніўня 2017 года № 240 "Аб дзяржаўнай падтрымцы грамадзян пры будаўніцтве (рэканструкцыі) жылых памяшканняў"; ад 10 снежня 2018 года № 473 "Аб долевым будаўніцтве"; ад 30 жніўня 2005 года № 405 "Аб некаторых мерах па будаўніцтве жылых дамоў (кватэр) у сельскай мясцовасці"; ад 2 верасня 1996 года № 346 "Аб некаторых мерах па развіцці жыллёвага будаўніцтва ў вёсцы".

Прапанаваныя змяненні выпрацаваны з улікам зваротаў грамадзян, юрыдычных асоб і органаў дзяржаўнага кіравання, а таксама практыкі прымянення ўказаў Кіраўніка дзяржавы.

Указам прадугледжваецца аказанне дзяржаўнай падтрымкі грамадзянам, якія паляпшаюць жыллёвыя ўмовы не па месцы пастаноўкі на ўлік маючых патрэбу. Напрыклад, дзяржпадтрымка будзе прадастаўляцца грамадзянам, якія знаходзяцца на ўліку маючых патрэбу: у абласных цэнтрах і г.Мінску - пры будаўніцтве жылля ў гарадах (за выключэннем абласных цэнтраў і г.Мінска), пасёлках гарадскога тыпу і сельскіх населеных пунктах; у гарадах абласнога і раённага падпарадкавання - у пасёлках гарадскога тыпу і сельскіх населеных пунктах; у пасёлках гарадскога тыпу - у сельскіх населеных пунктах.

Пры гэтым жыхарам абласных цэнтраў і г.Мінска, якія будуюць (рэканструююць) жыллё ў невялікіх населеных пунктах (да 20 тыс. чалавек), прадастаўляецца права на пазачарговае атрыманне дзяржаўнай падтрымкі (да прыняцця Указа - у парадку агульнай чаргі).

Прадугледжваецца дадатковая абарона інтарэсаў шматдзетных сем'яў і сем'яў, якія выхоўваюць дзяцей-інвалідаў. У прыватнасці, павелічэнне да 23 гадоў узросту дзяцей, пры якім шматдзетнай сям'і прадастаўляецца права на атрыманне фінансавай дапамогі дзяржавы ў пагашэнні льготных крэдытаў або субсідыі на пагашэнне асноўнага доўгу па камерцыйных крэдытах (да прыняцця Указа - 18 гадоў); прадастаўленне шматдзетным сем'ям, якія пражываюць у сельскіх населеных пунктах, дзяржаўнай падтрымкі з разліку 30 кв.м на члена сям'і, калі і муж, і жонка працуюць у такіх населеных пунктах; павелічэнне памеру дзяржаўнай падтрымкі для сем'яў, у якіх дзеці набылі інваліднасць у перыяд будаўніцтва жылля.

У адпаведнасці з дакументам прадугледжана дадатковая абарона інтарэсаў крэдытаатрымальнікаў і членаў іх сем'яў. У прыватнасці, павелічэнне да 6 месяцаў тэрміну вяртання грамадзянамі ў бюджэт прадастаўленых ім субсідый пры адмове іх ад будаўніцтва жылля (да прыняцця Указа - 3 месяцы); у выпадку смерці крэдытаатрымальнікаў - магчымасць для паўналетніх членаў іх сем'яў дакрэдытавацца і атрымаць субсідыі ў поўным аб'ёме (па прынятых рашэннях); магчымасць пераводу доўгу па льготных крэдытах на аднаго з былых мужа ці жонку з захаваннем за імі права на атрыманне фінансавай дапамогі і адтэрміноўкі ў пагашэнні крэдыту.

Акрамя таго, у мэтах узгаднення норм дзеючых указаў па пытаннях аказання грамадзянам дзяржаўнай падтрымкі пры будаўніцтве жылля ў іх уносяцца змяненні і дапаўненні (у тым ліку тэхнічныя).