Першы намеснік Кіраўніка Адміністрацыі Прэзідэнта Максім Рыжанкоў сустрэўся з намеснікам кіраўніка міжнароднага аддзела ЦК Кампартыі Кітая Чэнь Чжоу
- 5
Беларусь гатова да ўзаемадзеяння з кітайскім бокам па любых напрамках, якія ўяўляюць узаемны інтарэс. Аб гэтым заявіў Першы намеснік Кіраўніка Адміністрацыі Прэзідэнта Максім Рыжанкоў на сустрэчы з намеснікам загадчыка міжнароднага аддзела Цэнтральнага камітэта Камуністычнай партыі Кітая Чэнь Чжоу.
Максім Рыжанкоў цёпла прывітаў прадстаўніка ЦК КПК, адзначыўшы дружалюбны характар узаемаадносін, якія склаліся паміж гэтай кітайскай структурай і Адміністрацыяй Прэзідэнта. Дарэчы, паміж імі яшчэ ў 2012 годзе быў падпісаны адпаведны мемарандум.
Як заўважыў Максім Рыжанкоў, бакі не выпадкова сустрэліся праз 12 гадоў, каб "надаць наступны актыўны віток двухбаковаму ўзаемадзеянню".
"Мы вельмі рады прыезду такіх гасцей, як вы. Думаю, вам таксама важна ўбачыць тую краіну, з якой Кітай супрацоўнічае настолькі актыўна і цесна", - дадаў ён.
Асаблівы імпульс адносінам Беларусі і Кітая надаюць дружалюбныя адносіны лідараў дзвюх дзяржаў, грунтуючыся на рашэннях якіх бакі могуць актыўна рухацца наперад і супрацоўнічаць па ўсіх напрамках, звярнуў увагу Максім Рыжанкоў.
"Мы гатовы да абмеркавання абсалютна любых пытанняў, руху і ўзаемадзеяння з кітайскім бокам па любых напрамках, якія ўяўляюць узаемны інтарэс", - падкрэсліў ён.
У сваю чаргу Чэнь Чжоу адзначыў, што галоўная мэта візіту кітайскай дэлегацыі - рэалізацыя дамоўленасцей, дасягнутых Сі Цзіньпінам і Аляксандрам Лукашэнкам, а таксама паглыбленне ўзаемаразумення для развіцця двухбаковых адносін. Ён падкрэсліў, што лідары дзвюх краін "стаяць ля руля беларуска-кітайскіх адносін, паміж імі ўстаноўлены высокі ўзровень узаемнага даверу і асабістая дружба".
"Менавіта пад кіраўніцтвам лідараў нашых краін цяпер двухбаковыя адносіны павысіліся да ўзроўню ўсепагоднага ўсебаковага стратэгічнага партнёрства", - дадаў прадстаўнік ЦК КПК. Паводле яго слоў, адносіны бакоў цяпер характарызуюцца атмасферай узаемнага даверу, паскоранымі тэмпамі развіваецца супрацоўніцтва, дынамічна ідзе рэгіянальнае ўзаемадзеянне.