Падпісаны Закон, накіраваны на стварэнне дадатковых умоў для занятасці насельніцтва

Прэзідэнт Беларусі Аляксандр Лукашэнка падпісаў Закон "Аб змяненні законаў па пытаннях занятасці насельніцтва", які нацэлены на стварэнне дадатковых умоў для занятасці грамадзян краіны.

У адпаведнасці з Законам узмоцнены патрабаванні да назначэння і атрымання дапамогі па беспрацоўі (у мэтах выключэння ўтрыманскіх настрояў). Яна будзе назначацца грамадзянам пры выкананні наступных умоў: трэба зарэгістравацца ў службе занятасці на працягу месяца з даты звальнення, а таксама не менш за пяць гадоў да рэгістрацыі беспрацоўным знаходзіцца ў працоўных адносінах з выплатай узносаў у фонд сацыяльнай абароны насельніцтва.

Максімальны перыяд знаходжання на ўліку ў службе занятасці скарачаецца з 18 да 12 месяцаў, перыяд выплаты дапамогі па беспрацоўі змяншаецца ўдвая - з шасці да трох месяцаў.

Акрамя таго, уводзіцца інстытут кватавання рабочых месцаў для інвалідаў. Квоты будуць устанаўлівацца ў парадку і памерах, вызначаных урадам, для наймальнікаў усіх форм уласнасці (акрамя грамадскіх аб'яднанняў інвалідаў, некамерцыйных і бюджэтных арганізацый).

Законам прадугледжана пашырэнне пераліку катэгорый беспрацоўных, якім прадастаўляюцца дадатковыя гарантыі занятасці. Да іх аднесены грамадзяне перадпенсійнага ўзросту (за пяць гадоў да дасягнення пенсійнага ўзросту), а таксама тыя, хто перастаў знаходзіцца ў ЛПП, і асобы, якія хворыя на алкагалізм, наркаманію і прайшлі медыцынскую рэабілітацыю.

Пашыраны магчымасці грамадзян для атрымання садзейнічання службы занятасці ў пошуку работы, а наймальнікаў - у падборы кадраў.

Для беспрацоўных прадугледжана магчымасць электроннай рэгістрацыі, а таксама рэгістрацыі не толькі па месцы жыхарства, але і па месцы знаходжання.

Наймальнікам прадастаўляецца права заяўляць у Агульнарэспубліканскі банк вакансій звесткі аб бягучай і перспектыўнай патрэбнасці ў работніках на дзеючыя і новыя рабочыя месцы.