Намеснік Кіраўніка Адміністрацыі Прэзідэнта Вольга Чупрыс правяла прыём грамадзян у Шчучыне

Намеснік Кіраўніка Адміністрацыі Прэзідэнта Вольга Чупрыс 30 мая правяла прыём грамадзян у Шчучыне.

"Такія выезды на месцы Адміністрацыя Прэзідэнта практыкуе часта, - адзначыла Вольга Чупрыс. - Мне здаецца, што сустрэчы на месцах найбольш запатрабаваны і правільна, каб паглядзець, як жывуць людзі, як працуе мясцовая ўлада. Калі сустракаешся з людзьмі падчас такіх выездаў, рэальна бачыш карціну ў тым ці іншым невялікім мястэчку, аддаленым ад цэнтра. Мы заўсёды пасля такіх выездаў робім агляды, абагульняем атрыманы матэрыял. Далей ён кладзецца ў аснову для ўдасканалення заканадаўства".

Намеснік Кіраўніка Адміністрацыі Прэзідэнта прывяла нядаўнія прыклады, калі на аснове вынікаў такіх выездаў па ініцыятыве Адміністрацыі Прэзідэнта былі распрацаваны змяненні ў заканадаўства.

Як падкрэсліла Вольга Чупрыс, па зваротах людзей на прыкладзе Шчучынскага раёна відаць, што жыхары ідуць са сваімі пытаннямі, калі можна звярнуцца да кіраўніка на месцы. "Напрыклад, сёння была ўзнята тэма, якая датычыцца работы натарыята, - пракаменціравала Вольга Чупрыс. - Па выніках сённяшняй сустрэчы, думаю, будзе прынята рашэнне, якое дасць магчымасць удасканаліць узаемадзеянне сістэмы натарыята і органаў унутраных спраў у частцы правядзення натарыяльных дзеянняў адносна асоб, якія знаходзяцца пад вартай".

Паводле слоў Вольгі Чупрыс, парадак дня сённяшняга прыёму грамадзян традыцыйны і разам з тым паказальны. Прэзідэнт не раз гаварыў, што такія невялікія гарадкі павінны мець умовы жыцця, як у вялікім горадзе. Каб людзі хацелі тут заставацца, ствараць сем'і, працаваць. "Таму, калі трэба, выедзем на месца, убачым на свае вочы і разам з мясцовай уладай прымем рашэнне, што неабходна зрабіць, а дзе людзі самі павінны паўдзельнічаць у паляпшэнні якасці свайго жыцця, - адзначыла Вольга Чупрыс. - Цяпер вельмі шмат павінна стварацца такіх сувязей, калі ўзаемадзейнічаюць мясцовая ўлада і грамадзяне. Менавіта тады будзе добры вынік".