Калектыў Адміністрацыі Прэзідэнта Беларусі прыняў удзел у рэспубліканскім суботніку
Калектыў Адміністрацыі Прэзідэнта Беларусі 16 красавіка прыняў удзел у рэспубліканскім суботніку ў мемарыяльным комплексе ў вёсцы Літавец Дзяржынскага раёна.
Работнікі Адміністрацыі Прэзідэнта ўсклалі вянкі і кветкі да мемарыяльнага комплексу і ўшанавалі бязвінна знішчаных у час Вялікай Айчыннай вайны мірных жыхароў мінутай маўчання.
"У Год гістарычнай памяці арганізуем шэраг розных мерапрыемстваў, адзін з напрамкаў - правесці сістэматызацыю ўсіх нашых памятных мясцін, такіх як вёска Літавец, пахаванняў, месцаў баявых дзеянняў. Увекавечваючы памяць, мы павінны ўспамінаць людзей, якія пралівалі кроў, гінулі за нашу Радзіму", - сказаў Кіраўнік Адміністрацыі Прэзідэнта Ігар Сергяенка.
Паводле яго слоў, трэба прыводзіць сюды моладзь і больш расказваць аб гераічным і трагічным мінулым краіны. "Сёння нам расказала экскурсавод, дырэктар Дзяржынскага гісторыка-краязнаўчага музея Галіна Вашкевіч, аб трагічных днях 1941 года. 29 вёсак за ўвесь час вайны ў раёне былі знішчаны. Тры вёскі, у тым ліку Літавец, не адрадзіліся. Тут дзейнічаў партызанскі атрад, які аказваў супраціўленне ворагу. У 1943 годзе карная аперацыя абарвала жыцці 196 чалавек, якія пражывалі ў вёсцы ціхім, спакойным, мірным жыццём да вайны, а затым змагаліся з фашыстамі, - расказаў кіраўнік Адміністрацыі Прэзідэнта. - Такіх вёсак сотні на тэрыторыі Беларусі. На могілках вёсак у мемарыяльным комплексе ў Хатыні адлюстравана кароткая гісторыя гэтага населенага пункта".
Працоўны дэсант добраўпарадкоўвае мемарыяльны комплекс, прыбіраючы прылеглую тэрыторыю і высаджваючы саджанцы елкі. "Усе настроены на актыўную работу. Суботнік - гэта традыцыя. Заўсёды, калі прыходзіць вясенні час, фарбаванне аб'ектаў, пасадка дрэў, будаўнічыя работы - гэта ў нейкім сэнсе ачышчэнне, адраджэнне прыроды перад набліжэннем лета. Трэба дапамагчы гэтым працэсам", - звярнуў увагу Ігар Сергяенка.
"Як заўсёды, настрой добры, рабочы, але крыху прысутнічае сум - месца незвычайнае, кранальнае, сакральнае. Я бачыў, у некаторых калег падчас расказу экскурсавода пра гэта месца нават выступілі слёзы", - сказаў Намеснік Кіраўніка Адміністрацыі Прэзідэнта Ігар Луцкі.
Ён адзначыў, што для беларусаў важна захаваць такія знакавыя мясціны: "Гэта наша памяць. Трэба часцей тут бываць, прыязджаць на экскурсіі. Сёння навядзём тут парадак, пасадзім невялікі лес. Нягледзячы на такое надвор'е, наадварот, мы будзем весялей працаваць, каб было цёпла".
"Суботнік - гэта таксама наша традыцыя. Праца на карысць краіны - хто ж супраць? Некаторыя пагаворваюць з-за мяжы, што гэта парушэнне працоўнага заканадаўства. Проста смешна. Яны ў сваім жыцці ніколі не працавалі, напэўна, для іх гэта парушэнне, а для нас - высакародная справа", - дадаў Ігар Луцкі.
Вёска Літавец была знішчана падчас карнай аперацыі "Якаб" 14 студзеня 1943 года. У 1956 годзе на месцы вёскі паставілі невялікі помнік, а на паўднёвай ускраіне - помнік партызанам атрада "Баявы". У 1986 годзе на месцы вёскі аўтарская група пад кіраўніцтвам Святланы Баравой узвяла мемарыяльны комплекс.