Кіраўнік Адміністрацыі Прэзідэнта Ігар Сергяенка прыняў удзел у пасяджэнні Жабінкаўскага райвыканкама

Для захавання гістарычнай памяці важна не колькасць мерапрыемстваў, а іх змест. Аб гэтым заявіў 20 красавіка Кіраўнік Адміністрацыі Прэзідэнта Ігар Сергяенка ў час пасяджэння Жабінкаўскага райвыканкама.

"Адна з умоў суверэнітэту - захаванне гістарычнай памяці. У нас была трылогія гадоў малой радзімы. Год народнага адзінства прайшоў у 2021-м. Год гістарычнай памяці вынікаў з папярэдніх, як і цяперашні - Год міру і стварэння. Вывучалі меркаванне аблвыканкамаў, грамадскіх арганізацый, парламента, урада. Перад Годам гістарычнай памяці ў большасці склалася меркаванне, што мы павінны вярнуцца да гісторыі, культурных і духоўных каштоўнасцей, каб яшчэ раз усвядоміць і прапусціць праз сябе, а самае галоўнае - прывіваць і выхоўваць на гэтым дзяцей і моладзь", - сказаў Ігар Сергяенка.

На пасяджэнні Жабінкаўскага райвыканкама падвялі вынікі Года гістарычнай памяці. Кіраўнік Адміністрацыі Прэзідэнта адзначыў, што за гэты час у раёне выкарыстоўвалі новыя формы ўзаемадзеяння з людзьмі, працавалі над новымі праектамі. "Галоўнае не колькасць мерапрыемстваў, а змест. Каб кожнага юнака ці дзяўчыну ў мемарыяльным комплексе "Драмлёва" або на партызанскай стаянцы, якую вы плануеце зрабіць, кранала, прымушала задумацца", - дадаў Ігар Сергяенка.

У сувязі з гэтым зайшла размова і аб стварэнні рэспубліканскага патрыятычнага цэнтра на Кобрынскім умацаванні Брэсцкай крэпасці. Студэнт Брэсцкага дзяржаўнага тэхнічнага ўніверсітэта ў час Паслання Прэзідэнта беларускаму народу і парламенту ўзняў пытанне аб'яўлення аб'екта маладзёжнай будоўляй. "Нешта ўжо ў гэтым напрамку зроблена. 50 працэнтаў сродкаў, заробленых на суботніку, будзе выдзелена на праектныя работы. Зразумела, што гэта стане ўсенароднай будоўляй. Гэта той аб'ект, дзе моладзі варта прыкласці свае намаганні", - лічыць Кіраўнік Адміністрацыі Прэзідэнта.

Таксама 20 красавіка ў Жабінцы Ігар Сергяенка ўручыў маладзёжныя білеты вучням сярэдняй школы нумар 1 і гарадскога ліцэя, якія папоўнілі рады БРСМ. Кіраўнік Адміністрацыі Прэзідэнта заклікаў маладых людзей шанаваць сваю краіну і берагчы створанае рукамі многіх пакаленняў.