Абласны фестываль-кірмаш працаўнікоў вёскі "Дажынкі-2022" у Слаўгарадзе

Кіраўнік Адміністрацыі Прэзідэнта Ігар Сергяенка 15 кастрычніка прыняў удзел ва ўрачыстай цырымоніі ўшанавання пераможцаў абласнога спаборніцтва за дасягненне лепшых паказчыкаў у развіцці аграпрамысловага комплексу на абласным фестывалі-кірмашы працаўнікоў вёскі "Дажынкі-2022" у Слаўгарадзе.

Ігар Сергяенка звярнуўся да ўсіх працаўнікоў аграпрамысловага комплексу Магілёўскай вобласці, а таксама да жыхароў Слаўгарада і раёна. "Шчыра віншую вас з гэтым цудоўным святам - фестывалем-кірмашом "Дажынкі-2022", - адзначыў ён. - Знаходзячыся сёння тут, чарговы раз пераконваешся, наколькі таленавітыя нашы людзі - у працы, творчасці і іншых напрамках жыццядзейнасці. Вы дастойна завяршылі важнейшы для вядучай галіны народнай гаспадаркі год. Уклад Магілёўскай вобласці ў агульны каравай ураджаю краіны - звыш 1 млн т сабранага збожжа пры сярэдняй ураджайнасці звыш 30 ц/га. Гэта вынік каманднай работы ўсіх аграрыяў Магілёўшчыны. За плячамі стаіць упартая праца ўпраўленцаў усіх узроўняў, кіраўнікоў і спецыялістаў гаспадарак, механізатараў, камбайнераў, кіраўнікоў розных пакаленняў, у тым ліку прысутных тут ветэранаў, якія ўнеслі свой уклад у развіццё і станаўленне сельскай гаспадаркі рэгіёна".

Кіраўнік Адміністрацыі Прэзідэнта падкрэсліў, што атрыманы рэгіёнам ураджай звыш 1 млн т - гэта сур'ёзны вынік і высокая планка, ніжэй за якую апускацца нельга. "Гэта рубеж для ўсіх вас на будучыя гады, тым больш рэзервы для гэтага ёсць - за кошт добрасумленнага стаўлення да працы, укаранення новых тэхналогій, аптымізацыі і зніжэння затрат. У гэтым перспектыва далейшага развіцця хлебаробскай працы Магілёўшчыны", - сказаў ён.

Традыцыйна высокіх ураджаяў дабіліся працаўнікі Шклоўскага, Кіраўскага, Магілёўскага і Горацкага раёнаў. Сярод лепшых гаспадарак - вядомыя ў краіне прадпрыемствы СП "Газавік-Сіпакова", ААТ "Рассвет імя Арлоўскага", ЗАТ "Зара", СВК "Гігант". Ігар Сергяенка адзначыў асаблівую ролю ў гэтай уборачнай кампаніі камбайнераў - людзей, якія самааддана працавалі для дасягнення высокіх паказчыкаў, у бітве за ўраджай ішлі адпачываць толькі са святлом ліхтароў.

"Сёння практычна кожны трэці з 327 камбайнераў Магілёўшчыны намалаціў звыш 1 тыс. т збожжавых, - адзначыў Ігар Сергяенка. - Вядомы ў краіне экіпаж пад кіраўніцтвам Мікалая Дарэчкіна разам з Яўгенам Сарбаевым, якія сёння ўзнялі сцяг абласных "Дажынак", у ліку лідараў - 5 тыс. т збожжа. Здорава, што ад такіх спецыялістаў не адстае сёння моладзь - маладзёжны экіпаж братоў Сяргея і Андрэя Драздоў намалаціў 4 тыс. т збожжа. А ў цэлым працоўная дынастыя гэтай сям'і налічвае 200 гадоў сумарнага працоўнага стажу. На такіх працаўніках трымаецца сёння наша зямля".

На думку Кіраўніка Адміністрацыі Прэзідэнта, такі багаты хлебны каравай - таксама заслуга вадзіцеляў на адвозцы збожжа і аператараў зернесушыльных комплексаў, спецыялістаў усіх узроўняў, работнікаў перапрацоўчай прамысловасці, гараджан, якія прымалі ўдзел ва ўборцы ўраджаю. "Жыццё працягваецца, і сёння нашы людзі займаюцца і завяршаюць уборку іншых, не менш важных для краіны, відаў сельскагаспадарчых культур, - сказаў на заканчэнне ён. - Хацеў бы яшчэ раз павіншаваць усіх са святам, пажадаць новых поспехаў у рэалізацыі амбіцыйных планаў".

Ігар Сергяенка зачытаў прывітальны адрас Кіраўніка дзяржавы і ўручыў яго старшыні Магілёўскага аблвыканкама Анатолю Ісачанку. Падзяку Прэзідэнта і падарункавы сертыфікат на трактар "Беларус" ён перадаў калектыву работнікаў СП "Газавік-Сіпакова" Шклоўскага раёна, а таксама ўручыў шэраг узнагарод. Так, Ганаровай граматай Адміністрацыі Прэзідэнта ўзнагароджаны дырэктар Магілёўскай абласной дзяржаўнай інспекцыі па насенняводстве, каранціне і ахове раслін Сяргей Марфель і старшыня СВК "Калгас імя Суворава" Крычаўскага раёна Міхаіл Малашанка; падзяка Кіраўніка Адміністрацыі Прэзідэнта аб'яўлена дырэктару КСУП "Ніва-Барсукі" Івану Рыняку і дырэктару філіяла ААТ "Чырвоны харчавік-АграСэрвіс" Бабруйскага раёна Міхаілу Стрыжэўскаму.