Заява Прэзідэнта Рэспублікі Беларусь Аляксандра Лукашэнкі для СМІ па выніках сустрэчы прэзідэнтаў краін мытнай "тройкі", Украіны і высокіх прадстаўнікоў Еўрасаюза

Удзельнікі сустрэчы ў Мінску, праведзенай у фармаце Мытны саюз - Украіна - Еўрапейскі саюз, сышліся на думцы аб неабходнасці дээскалацыі канфлікту, вызвалення заложнікаў, вырашэння праблем з бежанцамі, гуманітарнага садзейнічання пры абмеркаванні сітуацыі на ўсходзе Украіны. Аб гэтым заявіў 26 жніўня Прэзідэнт Рэспублікі Беларусь Аляксандр Лукашэнка пасля завяршэння перагавораў.

Расказаць аб выніках сустрэчы ў Мінску да прадстаўнікоў сродкаў масавай інфармацыі выйшаў Прэзідэнт Беларусі Аляксандр Лукашэнка без сваіх калег і прадстаўнікоў ЕС. Паводле слоў беларускага лідара, прэзідэнтамі і прадстаўнікамі ЕС было вырашана, што ён коратка праінфармуе аб тым, што адбылося ў Мінску.

Аляксандр Лукашэнка адзначыў, што адбылася сур'ёзная размова па ўсім комплексе пытанняў, связаных з крызісам ва Украіне. Ён са шкадаваннем канстатаваў, што сітуацыя там зайшла настолькі далёка, што без прынцыповых рашэнняў на вышэйшым узроўні ніякія асобныя захады, тэхнічныя дамоўленасці не прывядуць да ўрэгулявання.

"Вядома, усім нам хацелася б прарыву - неадкладных кардынальных рашэнняў, канкрэтных дамоўленасцей па спыненні кровапраліцця, пачатку палітычнага дыялогу ва Украіне з удзелам усіх бакоў канфлікту, урэгуляванні эканамічных спрэчак. Але ўжо сам факт сённяшняй сустрэчы - гэта несумненны поспех, крок у адзіна правільным напрамку", - лічыць беларускі лідар.

Аляксандр Лукашэнка адзначыў, што ўдзельнікі сустрэчы ў першую чаргу ставілі перад сабой задачу выпрацаваць прымальны для ўсіх канцэптуальны алгарытм дзеянняў як аснову для дасягнення ў далейшым канкрэтных дамоўленасцей па ўсіх напрамках. "Перагаворы былі няпростыя, але дыялог быў прадметны і вельмі адкрыты. Важна і цэнна ўжо тое, што гэты дыялог адбыўся. У ходзе амаль чатырохгадзіннай сустрэчы выказаліся ўсе. Вядома, павінен адзначыць, што пазіцыі бакоў адрозніваюцца, часам кардынальна. Але важна, што ўсе сыходзіліся ў адным - трэба шукаць кампраміс", - сказаў Прэзідэнт Беларусі.

"Пры абмеркаванні канфлікту на ўсходзе Украіны ўсе сышліся на думцы аб неабходнасці дээскалацыі, вызвалення заложнікаў, вырашэння праблем з бежанцамі, гуманітарнага садзейнічання і іншых пытанняў. Вельмі важна прадухіліць гуманітарную катастрофу, асабліва цяпер, напярэдадні зімовага перыяду", - адзначыў Кіраўнік беларускай дзяржавы.

Аляксандр Лукашэнка расказаў, што падрабязна былі прааналізаваны пагрозы і рызыкі, якія могуць узнікнуць для Расійскай Федэрацыі, іншых краін Мытнага саюза ў сувязі з падпісаннем Украінай пагаднення аб асацыяцыі з Еўрасаюзам, усе аспекты гэтага працэсу: магчымы ўплыў тарыфных, нетарыфных змяненняў, тэхнічных стандартаў, санітарных і ветэрынарных норм і мытнага адміністравання.

Асобную ўвагу ўдзельнікі сустрэчы ўдзялілі праблемам у энергетычнай сферы - па транзіце вуглевадароднай сыравіны і яе пастаўках. "У гэтым сэнсе фармат сённяшняй сустрэчы ў Мінску - Мытны саюз - Украіна - ЕС - лагічны і, напэўна, аптымальны. Упершыню на такім высокім узроўні адбыўся дыялог двух наймагутнейшых інтэграцыйных аб'яднанняў нашага кантынента. Яшчэ і з гэтага пункта гледжання праведзеныя ў сталіцы Беларусі перагаворы сталі, па сутнасці, першым крокам у патрэбным напрамку", - адзначыў беларускі лідар.

Аляксандр Лукашэнка адзначыў, што па выніках сустрэчы сфарміраваліся пэўныя дамоўленасці.

Так, удзельнікі перагавораў падтрымалі прапанову Прэзідэнта Украіны Пятра Парашэнкі зрабіць Мінск рэгулярнай пляцоўкай для сустрэч кантактнай групы АБСЕ - Украіна - Расія.

Падтрымана таксама прапанова Прэзідэнта Казахстана Нурсултана Назарбаева прадоўжыць абмяркоўваць праблемныя пытанні, звязаныя з Украінай, у тым фармаце, які быў у беларускай сталіцы.

Прэзідэнты Расіі і Украіны дамовіліся аб двухбаковай сустрэчы і абмеркаванні найбольш надзённых пытанняў.

"Ведаючы, што ў галіне гандлёва-эканамічных адносін працуе група Украіна - Расія - ЕС, мы прапанавалі інтэнсіфікаваць яе работу, каб ужо да 12 верасня рабочая група выпрацавала прапановы па зняцці заклапочанасці Мытнага саюза, Расійскай Федэрацыі адносна пагаднення аб асацыяцыі Украіны з Еўрапейскім саюзам", - сказаў Кіраўнік беларускай дзяржавы.