Сустрэча са старшынёй Камітэта нацыянальнай бяспекі Казахстана Карымам Масімавым

Прэзідэнт Беларусі Аляксандр Лукашэнка 8 верасня на сустрэчы са старшынёй Камітэта нацыянальнай бяспекі Казахстана Карымам Масімавым абмеркаваў перспектывы развіцця супрацоўніцтва паміж краінамі па лініі спецслужбаў.

Гаворачы аб супрацоўніцтве спецслужбаў Беларусі і Казахстана, Аляксандр Лукашэнка адзначыў, што ў гэтай сферы наладжана плённае ўзаемадзеянне. "Усё, аб чым Вы дамовіцеся з нашым старшынёй (кіраўніком КДБ. - Заўвага), мы будзем свята выконваць. Мы будзем разам працаваць там, дзе гэта выгадна і патрэбна для нас і Казахстана, - сказаў Кіраўнік дзяржавы. - Хацелася б, каб па лініі спецслужбаў, як гэта бывае ва ўсіх краінах, у нас устанавіўся дадатковы канал сувязі, па якім мы будзем абмяркоўваць і прымаць рашэнні па адчувальных пытаннях".

У Беларусі і Казахстана склаліся традыцыйна дружалюбныя і цесныя адносіны ва ўсіх сферах. Аляксандр Лукашэнка адзначыў, што на саміце АДКБ у Душанбэ мае намер сустрэцца з Прэзідэнтам Казахстана Касым-Жамартам Такаевым і абмеркаваць развіццё супрацоўніцтва паміж краінамі. "Вам вельмі пашанцавала з Прэзідэнтам. Вучыцца ў вас трэба вось гэтай дружнай рабоце ў імя народа, у імя дзяржавы", - заявіў беларускі лідар.

"Дарэчы сённяшняя наша сустрэча. Я ўсё збіраю інфармацыю: у мяне два буйныя мерапрыемствы ў гэтым годзе, можна сказаць, знакавыя. Заўтра мы сустракаемся з Прэзідэнтам Расіі. Зразумела, што мы будзем абмяркоўваць сітуацыю і ў нашым Еўразійскім эканамічным саюзе, і асабліва сітуацыю, звязаную з Афганістанам, уплыў афганскага фактару на Цэнтральную Азію, Расію. Вядома, і беларусы ад гэтага не засталіся і не застануцца ўбаку", - адзначыў Аляксандр Лукашэнка.

Прэзідэнт падкрэсліў, што па афганскім пытанні беларускі бок мае намер прытрымлівацца выпрацаванай лініі ў АДКБ. "Вам разам з Расіяй лепш відаць, што там адбываецца. Вы, будзем казаць шчыра, больш адчуваеце тыя падзеі, якія адбываюцца на Блізкім Усходзе, у Цэнтральнай, Паўднёвай Азіі. Афганістан ні адна бяда не абміне, таму што гіганцкая краіна, дамаганні і погляды туды звернуты сур'ёзныя. Мы гэта бачым па Беларусі: нам часам няпроста ў цэнтры Еўропы. Таму вельмі важна, што мы сустракаемся", - заявіў Аляксандр Лукашэнка.

У сваю чаргу Карым Масімаў падзякаваў Кіраўніку беларускай дзяржавы за магчымасць сустрэчы. Ён расказаў, што перад паездкай у Беларусь быў на прыёме ў першага Прэзідэнта Казахстана Нурсултана Назарбаева і цяперашняга Кіраўніка дзяржавы Касым-Жамарта Такаева. "Яны прасілі перадаць Вам вялікае прывітанне. Нурсултан Абішавіч сказаў: "Майму старому сябру вялікае прывітанне перадавай". Жамарт Кемелевіч таксама даручэнні даў, якія я хацеў бы з Вамі абмеркаваць напярэдадні вашай сустрэчы, якая будзе ў Душанбэ 16 верасня па лініі АДКБ, па ўзаемадзеянні", - адзначыў старшыня КНБ.

"Я думаю, нам ёсць шмат чаго абмеркаваць, паколькі мы дружалюбныя краіны, у нас мэты і задачы адзіныя, мы павінны адзін аднаму дапамагаць", - падкрэсліў Карым Масімаў.