Віншаванне работнікам 1-й гарадской клінічнай бальніцы Мінска
Прэзідэнт Беларусі Аляксандр Лукашэнка павіншаваў работнікаў і ветэранаў 1-й гарадской клінічнай бальніцы Мінска з 90-годдзем з дня заснавання ўстановы аховы здароўя.
Кіраўнік дзяржавы адзначыў, што, створаная ў 1931 годзе як вучэбная база для медыцынскага факультэта Белдзяржуніверсітэта, бальніца ўжо праз тры гады была прызнана лепшай у рэспубліцы і адной з вядучых у СССР. У час Вялікай Айчыннай вайны ўрачы, рызыкуючы сабой, ратавалі параненых чырвонаармейцаў, лячылі мірнае насельніцтва, нагадаў беларускі лідар.
"Сёння ваш вялікі і дружны калектыў свята захоўвае і развівае лепшыя традыцыі папярэднікаў. Супрацоўнікі 1-й бальніцы па-ранейшаму з'яўляюцца спецыялістамі выдатнай кваліфікацыі і высокіх маральных якасцей, кіраўнікі валодаюць актыўнай грамадзянскай пазіцыяй і важкім аўтарытэтам у свеце медыцыны, - гаворыцца ў віншаванні. - Вы заўсёды гатовы дзяліцца з калегамі напрацаваным вопытам, а веды і ўменні без астатку аддаяце пацыентам".
Аляксандр Лукашэнка звярнуў увагу, што цяпер бальніца, як і ўся айчынная ахова здароўя, змагаецца не толькі з захворваннямі па сваім лячэбным профілі, але і з пандэміяй каранавіруса. "Прыміце шчырыя словы ўдзячнасці за кожнае выратаванае жыццё, самаадданую працу, вернасць прафесіі і клятве беларускага ўрача. Жадаю моцнага здароўя, новых поспехаў, шчасця і дабрабыту", - дадаў Прэзідэнт.