Віншаванне Эміру Дзяржавы Катар шэйху Таміму бен Хамаду аль-Тані

    Прэзідэнт Беларусі Аляксандр Лукашэнка павіншаваў Эміра Дзяржавы Катар шэйха Таміма бен Хамада аль-Тані і яго намесніка шэйха Абдалу бен Хамада аль-Тані з Нацыянальным днём.

    "Паміж Мінскам і Дохай склаліся адносіны сапраўднага сяброўства і даверу, аб чым сведчыць наша цёплая сустрэча на палях форуму ў Казахстане месяц таму, - гаворыцца ў віншаванні Эміру Катара. - Прыемна адзначыць, што 2022 год з'яўляецца асаблівым для Катара ў сувязі з правядзеннем важнага турніру - чэмпіянату свету па футболе". У Беларусі, паводле слоў Прэзідэнта, з захапленнем сачылі за тым, як у Катары на працягу некалькіх гадоў будавалі для гэтага спартыўнага свята новыя сучасныя стадыёны, атэлі і транспартную інфраструктуру.

    "Мы рады, што катарскае кіраўніцтва, нягледзячы на цяжкасці і неверагодны націск у час чэмпіянату, здолела прадэманстраваць усяму свету свае эканамічныя і архітэктурныя дасягненні, старажытную гісторыю і багатую культурную спадчыну", - падкрэсліў Кіраўнік дзяржавы.

    Беларусь імкнецца развіваць узаемадзеянне з Катарам па розных напрамках, уключаючы сферы гандлю, інвестыцый, харчовай бяспекі і перадавых тэхналогій, звярнуў увагу Аляксандр Лукашэнка. Ён пацвердзіў гатоўнасць беларускага боку прыняць з візітам шэйха Таміма бен Хамада аль-Тані ў зручны для яго час для абмеркавання пытанняў пашырэння двухбаковага супрацоўніцтва.

    У віншавальным пасланні шэйху Абдалу бен Хамаду аль-Тані гаворыцца: "Катарскі народ можа ганарыцца сваім кіраўніцтвам, якое прыкладае ўсе намаганні для забеспячэння высокага ўзроўню жыцця і міру для сваіх грамадзян, а таксама для ўмацавання іміджу дзяржавы на міжнароднай арэне".

    "Перакананы, кожная краіна мае права на ідэнтычнасць, павагу да сваёй культуры і традыцый, уласны шлях развіцця. Падкрэсліваю, Беларусь з'яўляецца надзейным сябрам і прадказальным партнёрам для Катара", - дадаў Аляксандр Лукашэнка.