Сустрэча з прэзідэнтам кітайскай карпарацыі "СІЦІК Груп" Ван Цзюнам

Беларусь разлічвае на рэалізацыю новых буйных праектаў з удзелам кітайскай карпарацыі "СІЦІК Груп". Аб гэтым Прэзідэнт Беларусі Аляксандр Лукашэнка заявіў 20 ліпеня на сустрэчы з прэзідэнтам карпарацыі Ван Цзюнам.

"У бліжэйшы час, хутчэй за ўсё, у верасні, мы правядзём перагаворы на вышэйшым узроўні ў Пекіне з маім калегам Сі Цзіньпінам. У нас ёсць шырокі парадак дня, шмат пытанняў, якія мы павінны ўзгадніць і вырашыць. Не ўтаю, што мы вельмі разлічваем, што да гэтага часу з вашай кампаніяй нашы міністэрствы і ведамствы, прадпрыемствы і холдынгі не толькі знойдуць тэмы для перагавораў, але і падрыхтуюць праекты дакументаў па рэалізацыі сур'ёзных праектаў у дзвюх краінах, і перш за ўсё ў Беларусі", - сказаў Прэзідэнт Беларусі.

Кіраўнік дзяржавы адзначыў, што ў Беларусі ўжо многае зроблена з удзелам карпарацыі "СІЦІК Груп". "Ваша кампанія - адна з буйнейшых у свеце, і мне дае вялікае задавальненне супрацоўніцтва з такой кампаніяй. Вы ведаеце аб стратэгічным характары ўзаемаадносін КНР і Беларусі. І работа вашай кампаніі ў Беларусі арганічна ўплятаецца ў тканіну гэтых адносін", - сказаў Прэзідэнт.

Нягледзячы на пратакольны характар сустрэчы, Аляксандр Лукашэнка прапанаваў абмеркаваць і шэраг канкрэтных праектаў, пытанняў і праблем, якія, магчыма, існуюць у бакоў пры рэалізацыі сумесных праектаў. "Думаю, гэта трэба сёння зрабіць, каб не было наперадзе нейкіх праблем і недагаворванняў. Калі ёсць праблемы, мы гатовы іх вырашыць вельмі хутка", - запэўніў беларускі лідар.

Як адзначыў на сустрэчы Аляксандр Лукашэнка, менавіта такія партнёры, як карпарацыя "СІЦІК Груп", ствараюць эканоміку, фундамент двухбаковых адносін, даюць магчымасць рухацца далей і паглыбляць усебаковае стратэгічнае партнёрства.

Прэзідэнт заклікаў кітайскіх партнёраў ставіцца да беларускага народа і Беларусі як да вельмі блізкай дзяржавы, нягледзячы на геаграфічную аддаленасць дзвюх краін. Кіраўнік беларускай дзяржавы таксама падкрэсліў важнасць таго, каб любы сумесны праект і прадукт ствараўся з высокай дабаўленай вартасцю, з мінімальнымі выдаткамі і выкарыстаннем самых высокіх тэхналогій. Акрамя таго, партнёры павінны адразу бачыць і прапрацоўваць патэнцыяльныя рынкі збыту прадукцыі. Яшчэ адзін акцэнт зроблены на хутчэйшай рэалізацыі намечаных планаў.

У сваю чаргу Ван Цзюн адзначыў, што ўсе работы, якія праведзены яго кампаніяй па праектах у Беларусі, выконваюцца даволі паспяхова. Кіраўніцтва "СІЦІК Груп" бачыць шырокія магчымасці для развіцця супрацоўніцтва з Беларуссю. Заяўлена аб намеры аказваць садзейнічанне ў пашырэнні партнёрства не толькі па сваёй лініі, але і дапамагаць у прыцягненні ў Беларусь у якасці партнёраў вядучых кітайскіх карпарацый. Пры гэтым Беларусь разглядаецца як плацдарм для будучага развіцця бізнесу ў Еўропе.