Сустрэча з Міністрам замежных спраў Расіі Сяргеем Лаўровым

Прэзідэнт Беларусі Аляксандр Лукашэнка абмеркаваў 29 мая на сустрэчы з Міністрам замежных спраў Расіі Сяргеем Лаўровым падрыхтоўку да маючага адбыцца пасяджэння Вышэйшага дзяржаўнага савета Саюзнай дзяржавы.

Аляксандр Лукашэнка цёпла вітаў Сяргея Лаўрова, падкрэсліўшы, што Беларусь для яго не чужая краіна. "Я ў гэтым абсалютна ўпэўнены. Прыводзіў і заўсёды прыводжу як прыклад і ўзор для ўсіх нашых ведамстваў, і беларускіх, і расійскіх, супрацоўніцтва паміж міністэрствамі замежных спраў Беларусі і Расіі. Вы заўсёды знаходзіце ўзаемаразуменне, заўсёды плануеце і выконваеце планы ў адрозненне ад многіх планаў, якія ў нас існуюць у розных, у тым ліку інтэграцыйных, структурах", - адзначыў Прэзідэнт.

"Сёння вельмі важная сустрэча - мы сустракаемся напярэдадні пасяджэння Вышэйшага дзяржаўнага савета. Нам трэба яшчэ раз абмеркаваць, магчыма, нават і дэталі гэтага мерапрыемства. Удакладніць, калі трэба, дату. У беларускага боку пакуль няма ніякіх змяненняў адносна гэтага. Калі ёсць якія-небудзь у расійскага боку пытанні, мы гатовы абмеркаваць, таму што ведаю, што вы перажываеце няпросты перыяд фарміравання і ўваходжання ў нармальны рытм работы ўрада. Гэта таксама вельмі важна момант", - сказаў Кіраўнік дзяржавы.

Паводле слоў Прэзідэнта Беларусі, другая прычына важнасці гэтай сустрэчы ў тым, каб абмеркаваць міжнародны парадак дня і намеціць перспектывы супрацоўніцтва.

У сваю чаргу Сяргей Лаўроў перадаў у адрас Кіраўніка беларускай дзяржавы прывітанне і найлепшыя пажаданні ад Прэзідэнта Расіі Уладзіміра Пуціна.

Міністр адзначыў, што ў яго ўжо адбыліся падрабязныя перагаворы з кіраўніком МЗС Беларусі Уладзімірам Макеем. "Мы абмяркоўвалі перш за ўсё падрыхтоўку да пасяджэння ВДС. У нас пакуль няма ніякіх перашкод, якія вымушалі б мяняць падыход да гэтага мерапрыемства. Але, вядома, тыя, хто за яго непасрэдна адказвае, павінны яшчэ пацвердзіць і даты, і парадак дня. Важна, што выносіцца на зацвярджэнне вельмі сур'ёзны стратэгічны дакумент - прыярытэтныя напрамкі і далейшыя задачы развіцця Саюзнай дзяржавы да 2022 года ўключна. І, вядома ж, мы па лініі міністэрстваў замежных спраў дамовіліся трымаць пад кантролем усю работу, у якой задзейнічаны і іншыя ведамствы ўрадаў нашых краін. Разгледзелі мы і шэраг іншых пытанняў нашага ўзаемадзеяння", - дадаў Сяргей Лаўроў.

На сустрэчы з Аляксандрам Лукашэнкам пацверджаны намер прыкладаць далейшыя намаганні для ўмацавання і развіцця ЕАЭС, у тым ліку ў плане пашырэння геаграфіі партнёрскіх адносін як з асобнымі краінамі, так і інтэграцыйнымі аб'яднаннямі. Абмеркаваны таксама эканамічныя праекты, якія, паводле ацэнкі Міністра, развіваюцца вельмі паспяхова. "Гаварылі аб неабходнасці пераадольваць тыя праблемы, якія непазбежна ўзнікаюць, калі настолькі вялікі аб'ём сувязей у гандлі, эканоміцы, інвестыцыйнай сферы, прамысловай кааперацыі", - адзначыў Сяргей Лаўроў па выніках сустрэчы.