Сустрэча са старшынёй Нацыянальнай асамблеі Рэспублікі Эквадор Габрыэлай Рывадэнэйра

Аляксандр Лукашэнка мае намер у гэтым годзе наведаць з візітам Эквадор. Аб гэтым Прэзідэнт Беларусі Аляксандр Лукашэнка заявіў 28 сакавіка на сустрэчы са старшынёй Нацыянальнай асамблеі Рэспублікі Эквадор Габрыэлай Рывадэнэйра.

"Мне вельмі прыемна, што прадстаўнік такой геаграфічна далёкай, але вельмі блізкай па духу краіны сёння знаходзіцца ў Беларусі", - адзначыў Кіраўнік дзяржавы. Аляксандр Лукашэнка падзяліўся ўражаннямі ад візіту ў гэту краіну ў 2012 годзе: "Хоць я пабываў у многіх краінах, але Эквадор не магу параўнаць ні з адной з іх па ўнікальнасці і своеасаблівасці".

Прэзідэнт Беларусі звярнуў увагу, што беларускі бок цяпер рыхтуецца да візіту на самым высокім узроўні ў Эквадор. У прыватнасці,прапрацоўваюцца многія пытанні, перш за ўсё гандлёва-эканамічнага плана. "Мы павінны рэалізаваць нашы дамоўленасці, дасягнутыя ў час перагавораў на вышэйшым узроўні з Прэзідэнтам Эквадора Рафаэлем Карэа. І думаю, мы вельмі хутка зможам падрыхтаваць праграму гэтага візіту", - адзначыў ён.

Аляксандр Лукашэнка лічыць важным, што паміж Беларуссю і Эквадорам наладжваюцца вельмі цесныя міжпарламенцкія сувязі. Прэзідэнт упэўнены, што гэтыя кантакты стануць асновай для развіцця ўсяго спектра беларуска-эквадорскага супрацоўніцтва - у палітыцы, гандлі, інвесціраванні, пашырэнні сумесных праектаў, аб якіх бакі раней дамаўляліся. Разам з тым Кіраўнік дзяржавы звярнуў увагу на дзейнасць Лацінаамерыканскай міжпарламенцкай асамблеі: "Я спадзяюся на ваша садзейнічанне ў пашырэнні інтарэсаў Беларусі ў гэтым парламенцкім вымярэнні".

Пры гэтым Прэзідэнт выказаў меркаванне, што дабрабыт беларускага і эквадорскага народаў будзе залежаць і ад таго, наколькі абедзве краіны змогуць умацаваць гандлёва-эканамічнае супрацоўніцтва, якое з'яўляецца фундаментам двухбаковых сувязей.

"Таму так дасканала ў час падрыхтоўкі візіту на вышэйшым узроўні ў Эквадор ідзе прапрацоўка гандлёва-эканамічных пытанняў. Думаю, у час вашых сустрэч у Мінску можна будзе грунтоўна пагаварыць аб гэтых пытаннях", - выказаў упэўненасць Кіраўнік дзяржавы.

Кіраўнік эквадорскага парламента перадала Аляксандру Лукашэнку самыя цёплыя пажаданні ад Прэзідэнта Эквадора Рафаэля Карэа, які чакае візіту беларускага лідара. "Спадзяёмся, у гэтым годзе візіт адбудзецца, і ён прынясе вялікі поспех нашым адносінам", - заўважыла яна.

На перагаворах Аляксандра Лукашэнкі з Габрыэлай Рывадэнэйра быў абмеркаваны шырокі спектр беларуска-эквадорскага ўзаемадзеяння.