Сустрэча са старшынёй Калегіі ЕЭК Тыгранам Саркісянам

Прэзідэнт Рэспублікі Беларусь Аляксандр Лукашэнка 24 сакавіка абмеркаваў на сустрэчы са старшынёй Калегіі ЕЭК Тыгранам Саркісянам прыярытэтныя напрамкі развіцця інтэграцыйных працэсаў на еўразійскай эканамічнай прасторы.

Аляксандр Лукашэнка адзначыў, што ў ЕАЭС, створаным за даволі кароткі прамежак часу, дастаткова поспехаў, але па аб'ектыўных, суб'ектыўных прычынах, хапае і праблем. "Напружвацца давядзецца ўсім, ад камісіі ЕЭК да прэзідэнтаў і прэм'ер-міністраў, каб вывесці на высокі ўзровень функцыянавання Еўразійскі эканамічны саюз", - лічыць Прэзідэнт Беларусі.

У той жа час Аляксандр Лукашэнка з аптымізмам глядзіць у будучае ЕАЭС. Паводле слоў беларускага лідара, само жыццё прымушае вельмі хутка рухацца ў плане станаўлення такога саюза, дзе будзе забяспечана свабода рынкаў, руху капіталу, рабочай сілы. Прэзідэнт упэўнены, што нацыянальныя праблемы краін ЕАЭС не павінны перашкаджаць развіццю агульных інтарэсаў і вырашэнню тых пытанняў, якія стаяць перад інтэграцыйным аб'яднаннем.

"У нас дарогі назад няма. Нам трэба ўдасканальваць Еўразійскі эканамічны саюз, ствараць саюз не горшы за ЕС. У адваротным выпадку мы перад нашымі людзьмі будзем выглядаць балбатунамі", - падкрэсліў беларускі лідар.

На сустрэчы былі абмеркаваны сярэднетэрміновыя і тактычныя задачы, якія стаяць перад ЕАЭС з улікам сусветных трэндаў. У далейшым пасля зацвярджэння ўсімі кіраўнікамі дзяржаў-членаў гэтыя напрамкі лягуць у аснову дакумента - стратэгіі развіцця саюза. У свеце адбываюцца сур'ёзныя трансфармацыі, еўразійская інтэграцыя сутыкаецца з новымі выклікамі. Краінам ЕАЭС, як падкрэслівалася ў час сустрэчы, будзе лягчэй пераадольваць іх сумеснымі намаганнямі. Дапаможа ў гэтым вопыт, набыты за час станаўлення адзінай эканамічнай прасторы, у тым ліку за год беларускага старшынства ў ЕАЭС.