Спачуванне Прэзідэнту Сербіі Аляксандру Вучычу

    Прэзідэнт Беларусі Аляксандр Лукашэнка накіраваў спачуванне Прэзідэнту Сербіі Аляксандру Вучычу ў сувязі са смерцю Патрыярха Сербскага Ірынея.

    "З глыбокім смуткам даведаўся пра смерць Яго Святасці Патрыярха Сербскага Ірынея. Пайшоў з жыцця вельмі мудры і высакародны чалавек, які цалкам прысвяціў сябе самаадданаму служэнню Богу, Радзіме і свайму народу. За час, калі ён узначальваў Сербскую праваслаўную царкву, Рэспубліка Сербія дасягнула значных вынікаў ва ўмацаванні суверэнітэту і незалежнасці, грамадзянскага міру і стабільнасці, захаванні духоўнай, культурнай і гістарычнай спадчыны. Ва ўсім гэтым бачу вялікую асабістую ролю Патрыярха Ірынея", - гаворыцца ў спачуванні.

    Аляксандр Лукашэнка адзначыў, што праваслаўная вера - адна з асноў блізкасці народаў дзвюх краін. "Вельмі ўдзячны Яго Святасці за тыя намаганні, якія былі прыкладзены ім дзеля пашырэння і развіцця дружбы і супрацоўніцтва паміж Беларуссю і Сербіяй. Памяць аб Патрыярху Ірынею назаўсёды застанецца ў нашых сэрцах", - падкрэсліў беларускі лідар.

    У сувязі з гэтай вялікай стратай Аляксандр Лукашэнка выказаў шчырыя спачуванні і словы падтрымкі ўсяму брацкаму сербскаму народу.