Віншаванне жыхарам Гродзенскай вобласці з 80-годдзем утварэння рэгіёна
Прэзідэнт Беларусі Аляксандр Лукашэнка павіншаваў жыхароў Гродзенскай вобласці з 80-годдзем утварэння рэгіёна.
"Прынёманскі край - сапраўдная жамчужына Беларусі, дзе ўнікальным чынам злучыліся маляўнічая прырода, самабытная культура, слаўныя традыцыі і старажытная, багатая гісторыя, - гаворыцца ў віншаванні. - Створаная восем дзесяцігоддзяў таму, у год вызвалення рэспублікі ад фашысцкіх захопнікаў, вобласць сёння паспяхова развіваецца дзякуючы ўпартай стваральнай працы жыхароў. Візітнай карткай рэгіёна сталі аграрная і турыстычная галіны, прамысловасць і атамная энергетыка".
Кіраўнік дзяржавы адзначыў, што Гродзенская вобласць заўсёды славілася значнымі поспехамі ў эканоміцы і сацыяльнай сферы, а гродзенцы - ветлівасцю, гасціннасцю і асаблівай адданасцю сваёй малой радзіме. Невыпадкова фінал Рэспубліканскага фестывалю нацыянальных культур праходзіць менавіта ў Гродне, дэманструючы адзінства і духоўную з'яднанасць беларускага народа, яго імкненне жыць у згодзе з усімі блізкімі і далёкімі суседзямі, дадаў Прэзідэнт.
"Перакананы, што вам пад сілу зрабіць быллю любую казку, рэалізаваць самы складаны праект. І мы яшчэ не раз пачуем аб вашых выдатных дасягненнях", - падкрэсліў беларускі лідар.
Аляксандр Лукашэнка пажадаў жыхарам Гродзенскай вобласці далейшых працоўных здзяйсненняў пад мірным небам Беларусі, а таксама добрага здароўя, шчасця, аптымізму і працвітання.