Наведванне цырымоніі адкрыцця VI Сусветных гульняў качэўнікаў

Прэзідэнт Беларусі Аляксандр Лукашэнка ў час рабочага візіту ў Кыргызстан наведаў афіцыйную цырымонію адкрыцця VI Сусветных гульняў качэўнікаў на стадыёне "Бішкек-Арэна".

Сусветныя гульні качэўнікаў - гэта міжнародны рух, створаны для захавання і папулярызацыі этнічных відаў спорту і культурных практык качавых народаў Цэнтральнай Азіі. Першыя Гульні адбыліся ў 2014 годзе ў Кыргызстане. З таго часу фармат спаборніцтваў перарос з рэгіянальнай падзеі ў маштабную міжнародную платформу міжкультурнага дыялогу, атрымаўшы прызнанне ААН.

У турнірах і фестывалях Сусветных гульняў качэўнікаў рэгулярна прымаюць удзел дэлегацыі з дзясяткаў краін свету. У гэтым годзе чакаецца ўдзел амаль 4 тыс. атлетаў і прадстаўнікоў 90 краін. Дэлегацыю Беларусі ўзначаліў намеснік міністра спорту Аляксандр Баравуля. У склад беларускай зборнай увайшлі спартсмены, якія выступаюць у спаборніцтвах па самба, барацьбе на паясах і армрэслінгу. Аляксандр Лукашэнка стоячы прывітаў беларускіх спартсменаў, якія выйшлі на "Бішкек-Арэну".

Мерапрыемства ўключае не толькі спаборніцтвы па традыцыйных качавых відах спорту, але і дэманстрацыю рамёстваў і этнакультурныя праграмы. На Гульнях таксама праходзяць парады каманд, майстар-класы па рамёствах, выставы нацыянальнай кухні і фальклорныя паказы.

Калі гаварыць пра спартыўны складнік, то асноўнымі дысцыплінамі з'яўляюцца конныя гульні, гонкі і паядынкі, паясная барацьба, паляванне з лоўчымі птушкамі, стральба з лука, спаборніцтвы па зборцы юртаў, настольныя і народныя гульні і інш.

На палях мерапрыемства Прэзідэнт Беларусі правёў шэраг сустрэч з замежнымі калегамі. Кіраўнік беларускай дзяржавы пагутарыў з Прэзідэнтам Узбекістана Шаўкатам Мірзіёевым, Прэм'ер-міністрам Індыі Нарэндрам Модзі, Прэзідэнтам Азербайджана Ільхамам Аліевым, Прэзідэнтам Таджыкістана Эмамалі Рахмонам, Прэм'ер-міністрам Пакістана Шахбазам Шарыфам, Прэзідэнтам Манголіі Ухнаагійн Хурэлсухам, старшынёй Савета Міністраў Тога Форам Эсазімна Гнасінгбэ.