Пасланне Папу Рымскаму Францыску з нагоды калядных і навагодніх свят
Прэзідэнт Беларусі Аляксандр Лукашэнка накіраваў пасланне Папу Рымскаму Францыску з нагоды калядных і навагодніх свят.
"Адносіны Беларусі і Ватыкана заўсёды маюць для нас асаблівае значэнне. Мы многае робім разам для абароны найважнейшых агульначалавечых каштоўнасцей - сумеснымі намаганнямі дасягнуты адчувальныя вынікі ў барацьбе з гандлем людзьмі, падтрымцы традыцыйнай сям'і", - гаворыцца ў віншаванні.
Кіраўнік дзяржавы падкрэсліў, што дзейнасць Святога Прастола адгукаецца ў сэрцах многіх жыхароў Беларусі, дзе каталіцызм з'яўляецца другой па велічыні канфесіяй. А беларускім Урадам робяцца паслядоўныя крокі па стварэнні спрыяльных умоў для дзейнасці Рымска-каталіцкай царквы, заахвочвання актыўнасці прадстаўнікоў Ватыкана, нацэленай на садзейнічанне міру і згодзе.
Аляксандр Лукашэнка адзначыў, што разлічвае на малітву Папы Рымскага ў падтрымку Беларусі і асабістую сустрэчу з пантыфікам. Прэзідэнт таксама перадаў кіраўніку Рымска-каталіцкай царквы ўдзячнасць за ўклад у развіццё адкрытых і дружалюбных беларуска-ватыканскіх адносін.