Аляксандр Лукашэнка ў свята Ражджаства Хрыстовага наведаў Храм-помнік Усіх Святых

  • 5
Прэзідэнт Рэспублікі Беларусь Аляксандр Лукашэнка ў свята Ражджаства Хрыстовага наведаў Храм-помнік Усіх Святых у Мінску.

Кіраўнік дзяржавы разам з Мітрапалітам Мінскім і Слуцкім Паўлам, Патрыяршым Экзархам усяе Беларусі запаліў калядную свечку ў прыдзеле ў гонар Іаана Хрысціцеля. З нагоды свята яны таксама абмяняліся падарункамі. Аляксандр Лукашэнка падарыў Мітрапаліту сервіз з відарысамі Мінскага Свята-Духава кафедральнага сабора.

У сваю чаргу прадстаяцель Беларускай праваслаўнай царквы падарыў Прэзідэнту факсімільную копію старажытнага Евангелля.

Выхаванцы нядзельнай школы Усіхсвяцкага прыхода віталі Кіраўніка дзяржавы вершамі. Аляксандр Лукашэнка таксама паслухаў калядныя песнапенні ў выкананні мужчынскага хору гэтага прыхода.

Размова Аляксандра Лукашэнкі з Мітрапалітам Паўлам прадоўжылася за чаяпіццем.

Да наведвання храма Аляксандр Лукашэнка разам з малодшым сынам Мікалаем усклалі кветкі да помніка Патрыярху Аляксію II.