Зацверджана Дзяржаўная інвестыцыйная праграма на 2019 год

    Зацверджана Дзяржаўная інвестыцыйная праграма на 2019 год. Адпаведны Указ падпісаў Прэзідэнт Беларусі Аляксандр Лукашэнка.

    Усяго ў дзяржінвестпраграму ўключаны 113 аб'ектаў. На іх фінансаванне ў бягучым годзе прадугледжваецца накіраваць Br511 млн, у тым ліку Br189 млн - за кошт дзяржаўных капітальных укладанняў, Br80 млн - за кошт сродкаў дзяржаўнага мэтавага бюджэтнага фонду нацыянальнага развіцця, Br80 млн - са сродкаў рэзервовага фонду Прэзідэнта Рэспублікі Беларусь, Br95 млн - са сродкаў рэспубліканскага дарожнага фонду і Br46 млн - са сродкаў на захаванне і пашырэнне сельскагаспадарчых угоддзяў.
     
    Перш за ўсё фінансавыя сродкі будуць сканцэнтраваны на аб'ектах, што ўводзяцца ў эксплуатацыю ў 2019 годзе, і на пераходных аб'ектах з высокай ступенню будаўнічай гатоўнасці.
     
    У адпаведнасці з Праграмай, у бягучым годзе намечана пачаць фінансаванне будаўніцтва і рэканструкцыі 26 аб'ектаў, у тым ліку корпуса хірургіі і транспланталогіі ў Мінску, інтэрната Гродзенскага дзяржаўнага ўніверсітэта на 1030 месцаў, абласнога анкалагічнага дыспансера ў Гродне, арэнднага дома для медыцынскіх работнікаў у вёсцы Андрэеўшчына Аршанскага раёна, 9 жылых дамоў для сем'яў, якія выхоўваюць дзяцей-сірот, аварыйнага моста цераз раку Піна на аўтамабільнай дарозе Р6 Івацэвічы - Пінск - Столін і пуцеправода-дублёра па вуліцы Якубоўскага ў Магілёве.
     
    Усяго ў бягучым годзе плануецца ўвесці ў эксплуатацыю 42 аб'екты.