Сустрэча з Кіраўніком Чачэнскай Рэспублікі Рамзанам Кадыравым

Прэзідэнт Беларусі Аляксандр Лукашэнка 21 чэрвеня сустрэўся з Кіраўніком Чачэнскай Рэспублікі Расійскай Федэрацыі Рамзанам Кадыравым, які прыбыў у Беларусь на адкрыццё II Еўрапейскіх гульняў.

"Дарагі Рамзан, вітаю цябе ў роднай табе Беларусі. Няма неабходнасці расказваць пра маё стаўленне да чачэнскага народа. Нават у складаны час, я ужо часта аб гэтым гавару, яны нараджалі ў нас у Брэсце, маім імем называлі сваіх дзяцей. Я гэта вельмі цаню. І я нядаўна, назначаючы Міністра ўнутраных спраў, а ён у нас каўказец, расказваў аб маіх пачуццях да каўказскага насельніцтва. Гэта сапраўды моцныя людзі, з якіх мы бяром прыклад у пэўных момантах", - сказаў Кіраўнік беларускай дзяржавы.

Аляксандр Лукашэнка адзначыў, што ў яго ёсць мара калі-небудзь пабываць у гарах Чачні, Дагестана і іншых каўказскіх рэгіёнаў. "У мяне ёсць сябры. Праўда, у Інгушэціі жывуць. Але ўсё роўна гэта блізкія вам людзі. І я яму (сябру. - Заўвага) гавару: ты мяне адвязі на радзіму і пакажы вежу (сямейныя вежы). Для мяне сапраўды (цікава. - Заўвага) пабываць у такіх мясцінах без помпы, без лішніх людзей, паглядзець, што гэта за каўказскія горы, дзе жывуць мужныя людзі", - сказаў Прэзідэнт.

Аляксандр Лукашэнка таксама ўручыў Рамзану Кадыраву ордэн Дружбы народаў. Указ аб узнагароджанні быў падпісаны яшчэ ў жніўні 2018 года. Кіраўнік Чачэнскай Рэспублікі ўдастоены гэтай узнагароды за значны асабісты ўклад ва ўмацаванне дружалюбных адносін і ўсебаковага супрацоўніцтва з Беларуссю.

"Да цябе ў нас стаўленне асаблівае. Рамзан, вялікі табе дзякуй за тое, што ўмееш трымаць слова. Я заўсёды гавару: "Ён сапраўдны мужык: паабяцаў - зрабіў". Дзякуй за нашых людзей, якіх мы наўрад ці б да гэтага часу ўбачылі ў Беларусі, якіх ты вызваліў. Ты сапраўды не проста сябар - ты брат для мяне, для нашага народа", - падкрэсліў Аляксандр Лукашэнка. - Тое, што я хачу табе сёння ўручыць ордэн Дружбы (народаў. - Заўвага), - гэта, павер, мае асаблівае гучанне. Гэта не проста даніна нейкай палітычнай модзе. Ты сапраўды заслужыў як чалавек, які прынёс нашаму народу, а не толькі асобным людзям, вялікае шчасце. А для мяне гэта велізарны падарунак".

Рамзан Кадыраў раней унёс асабісты ўклад у вызваленне грамадзян Беларусі з лівійскага палону.

У сваю чаргу Рамзан Кадыраў падзякаваў за стаўленне да яго і адзначыў пазітыўныя змяненні ў Беларусі з часу яго мінулага прыезду. Ён адзначыў, што ўзаемаадносіны Беларусі з Чачнёй развіваюцца ў самых розных сферах. "У нас у рэспубліцы, і на Каўказе, у Расіі ў цэлым вас любяць, паважаюць і чакаюць", - сказаў Кіраўнік Чачні.