Нарада па пытаннях удасканалення заканадаўства аб адабранні і прадастаўленні зямельных участкаў
- 1
Прэзідэнт Беларусі Аляксандр Лукашэнка паставіў задачу ўдасканаліць заканадаўства аб адабранні і прадастаўленні зямельных участкаў. Такое даручэнне Кіраўнік дзяржавы даў 19 студзеня на нарадзе па гэтай праблематыцы.
Аляксандр Лукашэнка падкрэсліў, што належнае выкарыстанне зямельных участкаў - гэта найважнейшае пытанне, якому ён удзяляе сур'ёзную ўвагу. "Наша задача - падыходзіць да ўсіх змяненняў узважана. Я не кажу, што немагчыма карэкціраваць нейкія нормы заканадаўства: і дэкрэты, і ўказы Прэзідэнта, і законы падлягаюць карэкціроўцы, паколькі жыццё ідзе, усё мяняецца. Але я хацеў бы ведаць прычыну і якія змяненні адбыліся, што мы зноў бяромся за гэты дакумент, - сказаў Прэзідэнт. - Перадача зямлі павінна прыносіць дзяржаве эканамічную выгаду. Пры гэтым трэба выключыць залішнія адміністрацыйныя бар'еры і празмерную бюракратыю".
Кіраўнік дзяржавы нагадаў, што ў Беларусі існавалі розныя падыходы да рэгулявання зямельнага заканадаўства: спачатку гэтыя пытанні строга кантраляваліся, а потым губернатарам была дадзена магчымасць прымаць рашэнні на месцах, прадастаўляючы землі інвестарам. Аднак гэта паслабленне прывяло да неналежнага выканання заканадаўства і, як вынік, занядбання тэрыторый. "Таму я быў вымушаны адмовіцца ад практыкі прадастаўлення зямельных участкаў губернатарамі і вярнуць гэта права Прэзідэнту. Яшчэ раз падкрэсліваю: хто-хто, а губернатары ведаюць маё стаўленне да зямлі", - адзначыў Аляксандр Лукашэнка. - Гэта багацце краіны. Губіць яго нікому не дазволена, таму што яно не нам належыць і нават не нашым дзецям. Яно належыць будучым пакаленням".
Прэзідэнт пацікавіўся, ці
накіраваны абмяркоўваемы на нарадзе праект дакумента, што прадугледжвае
карэкціроўку ўказа "Аб адабранні і прадастаўленні зямельных участкаў", на
вырашэнне задач па забеспячэнні захаванасці зямельных рэсурсаў як нацыянальнага
здабытку дзяржавы. "Ці спросціць ён працэдуры прадастаўлення зямельных участкаў
і змянення іх мэтавага прызначэння? Ці не створаць усе прапанаваныя карэкціроўкі
пралазы для махінацый з зямлёй? Улічваючы звароты грамадзян, звязаныя з
адабраннем зямельных участкаў для дзяржаўных патрэб, хачу даведацца, наколькі
прымаемыя меры паслужаць вырашэнню ўзнікаючых сітуацый? - сказаў беларускі
лідар. - Цяпер востра стаіць пытанне аб уключэнні ў гаспадарчы абарот зямельных
участкаў, занятых інвестарамі, якiя не выконваюць свае абавязацельствы. Асабліва
ў Мінскай вобласці. Неабходна навесці парадак з такімі інвестарамі".
На нарадзе было адзначана, што з пачатку 2017
года дзейнічае новы Лясны кодэкс, які змяніў падыходы да арганізацыі лясной
гаспадаркі. Прэзідэнт даручыў далажыць, як улічаны ў праекце ўказа палажэнні
гэтага дакумента, якім чынам цяпер будуць прадастаўляцца зямлі, што раней
адносіліся да лясоў першай і другой групы, і ці праводзяцца мерапрыемствы па
распрацоўцы новых лесаўпарадкавальных праектаў.
Асобна Кіраўнік дзяржавы пацікавіўся праводзімымі мерамі па
высечцы дрэў паблізу ліній электраперадачы. Паводле яго слоў, суцэльная высечка
або паўтарэнне мінулагодняй сітуацыі, калі ў выніку валкі без электрычнасці
засталіся многія населеныя пункты, недапушчальны. "Мне прынеслі ўжо дакумент -
уздоўж кальцавой дарогі трэба высекчы 220 дрэў. Чым яны перашкаджаюць лініі
электраперадачы? Колькі дрэў да гэтага часу ўпала на гэту лінію электраперадачы?
Хацеў бы пачуць тлумачэнні такіх прапаноў, - падкрэсліў Аляксандр Лукашэнка. - Я
хачу, каб вы былі гаспадарамі на сваёй зямлі і ставіліся да дрэў, якія выраслі
дзякуючы Богу, як да вамі пасаджаных".
Старшыня Дзяржаўнага камітэта па маёмасці Андрэй Гаеў далажыў,
што праектам указа прапануецца, не змяняючы канцэптуальна існуючыя падыходы да
адабрання і прадастаўлення зямельных участкаў, спрасціць гэтыя працэдуры,
прадугледзець механізмы абароны правоў землекарыстальнікаў, а таксама ўзмацніць
адказнасць за прымаемыя рашэнні па зямельных пытаннях.
Па выніках нарады Прэзідэнт даў шэраг даручэнняў па
ўдасканаленні заканадаўства. У прыватнасці, размова ішла аб неабходнасці
рацыяналізаваць парадак работы з пустуючымі і старымі дамамі.
Аляксандр Лукашэнка таксама паставіў задачу распрацаваць
парадак адабрання зямельных участкаў з недабудаванымі аб'ектамі. Асаблівую ўвагу
Кіраўнік дзяржавы звярнуў на больш глыбокую і своечасовую прапрацоўку мэт
прадастаўлення зямельных участкаў і прызначэння ўзводзімых аб'ектаў.