Каментарый да Указа № 491 ад 30 снежня 2019 г.

    Ветэранам Вялікай Айчыннай вайны і асобным катэгорыям грамадзян будзе аказана аднаразовая матэрыяльная дапамога ў сувязі са святкаваннем у наступным годзе 75-годдзя Перамогі савецкага народа. Адпаведны Указ № 491 падпісаў Прэзідэнт Беларусі Аляксандр Лукашэнка.

    Мяркуецца, што агульная колькасць атрымальнікаў грашовай дапамогі складзе каля 20 тыс. чалавек. Яе плануецца выплачваць з 1 красавіка па 1 мая 2020 года.
     
    Матэрыяльная дапамога будзе аказвацца дыферэнцыравана. Героям Савецкага Саюза будзе выплачана Br2,5 тыс. Дапамогу ў памеры Br1,7 тыс. акажуць інвалідам і ўдзельнікам вайны, асобам, якія прымалі ўдзел у баявых дзеяннях па абароне Айчыны да 3 верасня 1945 года і ў размініраванні тэрыторый і аб'ектаў пасля вызвалення ад нямецкай акупацыі ў 1943-1945 гадах.
     
    Узнагароджаным ордэнамі або медалямі СССР за самаадданую працу i бездакорную воiнскую службу ў тыле, працаваўшым на аб'ектах проціпаветранай абароны, будаўніцтве абарончых збудаванняў, ваенных аб'ектаў у межах тылавых граніц дзеючых франтоў, на прыфрантавых участках дарог, на прадпрыемствах, ва ўстановах і арганізацыях у гады блакады Ленінграда і ўзнагароджаным медалём "За абарону Ленінграда", асобам, узнагароджаным знакам "Жыхару блакаднага Ленінграда", выплацяць Br900.

    Дапамогу ў памеры Br700 акажуць членам сем'яў ваеннаслужачых, партызан і падпольшчыкаў, якія загінулі або прапалі без вестак у гады вайны, былым вязням фашысцкіх канцлагераў, турмаў і гета, інвалідам з дзяцінства ў выніку ранення, кантузіі, калецтва, звязаных з баявымі дзеяннямі ў перыяд вайны або з наступствамi ваенных дзеянняў.