Памер шрыфту:
A
A
A
Колер сайта:
К
К
К
Настройкі
Афіцыйны інтэрнэт-партал Прэзідэнта Рэспублікі Беларусь
Прэзідэнт Рэспублікі Беларусь

Эканоміка

У цэлым за 2010-2018 гады ВУП рэспублікі павялічыўся ў супастаўных цэнах на 17,5% пры росце прадукцыйнасці працы за названы перыяд на 26,8%.

Валавы ўнутраны прадукт на душу насельніцтва па парытэце пакупной здольнасці ў рэспубліцы вырас з 16,9 тыс. долараў ЗША ў 2010 годзе да 19,8 тыс. долараў ЗША ў 2018 годзе.

Згодна з Дакладам аб чалавечым развіцці 2018, падрыхтаваным ПРААН, Беларусь па зводным індэксе чалавечага развіцця заняла ў сусветным штогадовым рэйтынгу 53-е месца і ўвайшла ў групу краін з вельмі высокім узроўнем чалавечага развіцця.

АСНОЎНЫЯ САЦЫЯЛЬНА-ЭКАНАМІЧНЫЯ ПАКАЗЧЫКІ

ВУП, млн. рублёў
(2011-2015 гг. - млрд. рублёў)

Аб'ём знешняга гандлю
млрд. долараў ЗША

Прадукцыя прамысловасці
млн. рублёў
(2011-2015 гг. - млрд. рублёў)

Прадукцыя сельскай гаспадаркі
(у гаспадарках усіх катэгорый)
млн. рублёў
(2011-2015 гг. - млрд. рублёў)


АСНОЎНЫЯ ГАЛІНЫ ЭКАНОМІКІ БЕЛАРУСІ

Да асноўных галін эканомікі Беларусі адносяцца апрацоўчая прамысловасць, сельская гаспадарка, будаўніцтва, гандаль, транспартная дзейнасць, інфармацыя і сувязь.

Прамысловасць

Нягледзячы на абмежаванасць уласных паліўна-энергетычных рэсурсаў і важнейшых відаў сыравіны, а таксама на знешнія эканамічныя шокі апошніх гадоў, Беларусь захавала свой прамысловы патэнцыял.

Развіццё прамысловасці ў значнай ступені вызначае асноўныя эканамічныя тэндэнцыі ў нашай краіне. Тут вырабляецца чвэрць ВУП, сканцэнтравана каля 37% усіх асноўных сродкаў рэспублікі, працуе 23,7% ад агульнай колькасці занятых у эканоміцы.

У сусветным рэйтынгу краін па індэксе канкурэнтаздольнасці прамысловасці Беларусь займае 46 пазіцыю, з вялікім адрывам апярэджваючы краіны СНД, акрамя Расійскай Федэрацыі.

Аснову прамысловай вытворчасці рэспублікі складае апрацоўчая прамысловасць. На яе долю ў 2018 годзе прыпадала 88,6% агульнага аб'ёму вытворчасці прадукцыі.

Вядучымі галінамі апрацоўчай прамысловасці з'яўляюцца харчовая прамысловасць (25,7%), вытворчасць нафтапрадуктаў (17,6%), машынабудаванне (16,2%), хімічная вытворчасць (10,5%).

Структура апрацоўчай прамысловасці па відах эканамічнай дзейнасці (2018):


Вытворчасць прадуктаў харчавання, напіткаў і тытунёвых вырабаў
25,7%
Вытворчасць тэкстыльных вырабаў, адзення, вырабаў са скуры і футры
4,1%
Вытворчасць вырабаў з дрэва і паперы; паліграфічная дзейнасць і тыражаванне запісаных носьбітаў інфармацыі
5,2%
Вытворчасць коксу і прадуктаў нафтаперапрацоўкі
17,6%
Вытворчасць хімічных прадуктаў
10,5%
Вытворчасць асноўных фармацэўтычных прадуктаў і фармацэўтычных прэпаратаў
1,3%
Вытворчасць гумавых і пластмасавых вырабаў, іншых неметалічных мінеральных прадуктаў
7,7%
Металургічная вытворчасць. Вытворчасць гатовых металічных вырабаў, акрамя машын і абсталявання
7,6%
Вытворчасць вылічальнай, электроннай і аптычнай апаратуры
1,8%
Вытворчасць электраабсталявання
2,8%
Вытворчасць машын і абсталявання, не ўключаныя ў іншыя групоўкі
8,1%
Вытворчасць транспартных сродкаў і абсталявання
3,5%
Вытворчасць іншых гатовых вырабаў; рамонт, мантаж машын і абсталявання
4,1%
Рэспубліка Беларусь з'яўляецца рэгіянальным лідарам па вытворчасці трактароў, іх у краіне вырабляецца звыш 80% ад агульнага аб'ёму вытворчасці краін Еўразійскага эканамічнага саюза. Наша краіна з'яўляецца таксама буйным вытворцам сельскагаспадарчых машын - камбайнаў, розных відаў кормаўборачнай тэхнікі і агрэгатаў.

Удзельная вага вытворчасці калійных угнаенняў складае амаль 16% (або шостую частка сусветнай вытворчасці).

КЛЮЧАВЫЯ ГРУПЫ БЕЛАРУСКІХ ТАВАРАЎ:

грузавыя аўтамабілі, пагрузчыкі, кар'ерныя самазвалы;
трактары, збожжаўборачныя і кормаўборачныя камбайны;
халадзільнікі, мікрахвалевыя печкі, электрычныя і газавыя пліты;
мэбля;
угнаенні;
паліва;
ільновалакно;
хімічныя валокны і ніці;
мясныя прадукты;
малочныя прадукты.

Машынабудаванне

Машынабудаванне рэспублікі ўключае вытворчасць электраабсталявання, машын і абсталявання, вылічальнай, электроннай і аптычнай апаратуры, а таксама транспартных сродкаў і абсталявання. На яго долю прыпадае больш як 16% апрацоўчай прамысловасці рэспублікі.

ВЫТВОРЧАСЦЬ ТРАНСПАРТНЫХ СРОДКАЎ

Беларусь спецыялізуецца на вытворчасці грузавых аўтамабіляў, аўтобусаў, кар'ерных самазвалаў. Ключавымі прадпрыемствамі з'яўляюцца ААТ "Мінскі аўтамабільны завод" - кіруючая кампанія холдынга "БЕЛАЎТАМАЗ" і ААТ "БЕЛАЗ" - кіруючая кампанія "БЕЛАЗ-ХОЛДЫНГ" (г. Жодзіна). ААТ "БЕЛАЗ" займае трэць сусветнага рынку велікагрузных кар'ерных самазвалаў і ўваходзіць у групу вядучых сусветных вытворцаў кар'ернай тэхнікі.

Вядучым беларускім вытворцам збожжаўборачных і кормаўборачных камбайнаў, вядомых пад брэндам "ПАЛЕССЕ", з'яўляецца холдынг "Гомсельмаш". Кампанія мае шырокую геаграфію экспарту - гэта краіны СНД, Еўрасаюз, Кітай, Лацінская Амерыка, а таксама развітую тавараправодную сетку, шэраг сумесных прадпрыемстваў і зборачных вытворчасцей.

Вытворчасць легкавых аўтамабіляў - гэта напрамак аўтамабільнай галіны Беларусі, які імкліва развіваецца. Сёння асноўным вытворцам легкавых аўтамабіляў у рэспубліцы з'яўляецца завод поўнага цыкла СЗАТ "БелДжы", вытворчая магутнасць выпуску аўтамабіляў якога складае да 60 тысяч у год.

ВЫТВОРЧАСЦЬ ЭЛЕКТРААБСТАЛЯВАННЯ

Электратэхнічная прамысловасць уключае ў сябе прадпрыемствы галіны, якія выпускаюць розную прадукцыю: электрычныя трансфарматары, кабельна-правадніковыя вырабы, электрарухавікі, абсталяванне для прыёму, уліку і размеркавання электрычнай энергіі.

Холдынг "Мінскі электратэхнічны завод імя Казлова" вырабляе электратэхнічнае абсталяванне сусветнага ўзроўню.

Дзякуючы пастаяннай мадэрнізацыі вытворчасці і павышэнню кваліфікацыі кадраў, завод стаў буйнейшым вытворцам электрычных трансфарматараў і заслужыў прызнанне на ўнутраным і міжнародным рынках. Цяпер прадпрыемства пастаўляе прадукцыю ў 16 краін свету і па праву займае аднУ з лідзіруючых пазіцый у сваёй галіне.

ААТ "Беларускабель" - гэта сучаснае прадпрыемства, якое вырабляе кабельную і правадніковую прадукцыю. Сфера прымянення выпускаемых вырабаў ахоплівае такія галіны эканомікі, як радыёэлектроніка, авіяцыйная тэхніка, прыборабудаванне, будаўніцтва, сувязь, тэлекамунікацыі і электратэхніка, газа- і нафтаперапрацоўчая прамысловасць.

ААТ "Брэсцкі радыётэхнічны завод" вырабляе шчыты паверхавыя для прыёму, уліку і размеркавання электрычнай энергіі, персанальныя камп'ютары, электранагравальныя прыборы, камплектуючыя вырабы для вытворцаў электрычных і газавых пліт.

ААТ "Брэсцкі электрамеханічны завод" серыйна выпускае прыборы ўліку электрычнай энергіі адна- і трохфазных сетак.

ВЫТВОРЧАСЦЬ ВЫЛІЧАЛЬНАЙ, ЭЛЕКТРОННАЙ І АПТЫЧНАЙ АПАРАТУРЫ

Буйное шматпрофільнае прадпрыемства - холдынг "БелОМА" - спецыялізуецца ў галіне лазерных, оптыка-электронных і оптыка-механічных прыбораў і сістэм.

ААТ "Мінскі механічны завод імя С.І.Вавілава - кіруючая кампанія холдынга "БелОМА" мае вялікі вытворчы патэнцыял. Тут выпускаюцца прыцэлы, біноклі, прыборы начнога бачання і шмат іншага. Інавацыйны праект БелОМА - вытворчасць айчынных цеплавізараў.

ААТ "Гомельскі завод вымяральных прыбораў" з'яўляецца адным з вядучых прадпрыемстваў прыборабудаўнічай галіны Рэспублікі Беларусь, якое спецыялізуецца на выпуску аналітычных прыбораў, прызначаных для кантролю і рэгулявання тэхналагічных працэсаў і маніторынгу навакольнага асяроддзя, а таксама электродных сістэм для патэнцыяметрычных вымярэнняў.

Яшчэ адно прадпрыемства прыборабудаўнічай галіны - ААТ "Завод "Эвістар" - спецыялізуецца на пастаўцы камплектуючых (электрамеханізмы, электрамагніты, электрапрыводы, шклоачышчальнікі, варыятары, ператваральнікі) для прадпрыемстваў сельскагаспадарчага мышанабудавання.

ВЫТВОРЧАСЦЬ НАФТАПРАДУКТАЎ, ХІМІЧНАЯ ВЫТВОРЧАСЦЬ І ВЫТВОРЧАСЦЬ ГУМАВЫХ І ПЛАСТМАСАВЫХ ВЫРАБАЎ

Нафтаперапрацоўчая прамысловасць Беларусі прадстаўлена ААТ "Нафтан" (г. Наваполацк) і ААТ "Мазырскі нафтаперапрацоўчы завод". Гэта сучасныя комплексы па выпуску нафтапрадуктаў высокай якасці, якія пастаўляюцца ў краіны Еўрапейскага саюза, Паўднёвай Амерыкі, Украіну, Расійскую Федэрацыю і іншыя краіны СНД.

Буйнейшыя ў Беларусі прадпрыемствы – экспарцёры мінеральных угнаенняў – ААТ "Беларуская калійная кампанія, ААТ "Гомельскі хімічны завод", ААТ "Беларуськалій" і ААТ "Гродна Азот".

ААТ "Беларуськалій" – адзін з вядучых сусветных вытворцаў калійных угнаенняў. Больш як 90% яго прадукцыі ідзе на экспартуецца ў Паўднёвую і Паўночную Амерыку, Паўднёва-Усходнюю Азію, Еўропу (больш чым у 100 краін свету, у тым ліку Індыю, Кітай).

ААТ "Белшына" – адно з буйнейшых прадпрыемстваў у Еўропе па выпуску шын.

Металургічны комплекс

Металургічны комплекс рэспублікі ўключае ў сябе каля 20 буйных і сярэдніх арганізацый металургічнай вытворчасці, якія выпускаюць стальныя трубы, металакорд, розныя віды дроту і больш за 60 арганізацый па вытворчасці гатовых металічных вырабаў - зборных будаўнічых металаканструкцый, розных металічных інструментаў, рэзервуараў, цыстэрнаў, бакаў, катлоў, крапежных вырабаў і іншых.

Буйнейшы вытворца сталі і прадукцыі з яе - холдынг "Беларуская металургічная кампанія".

У склад холдынга ўваходзяць ААТ "Беларускі металургічны завод" - кіруючая кампанія холдынга "Беларуская металургічная кампанія" (г.Жлобін), ААТ "Завод "Легмаш", ААТ "Палессеэлектрамаш", ААТ "Кобрынскі інструментальны завод "СІТОМА", ААТ "Рэчыцкі метызны завод", ААТ "Магілёўскі металургічны завод", ААТ "Мінскі падшыпнікавы завод", ААТ "Белколермет", ААТ "Белдругчормет", ВУП "Брэстдругчормет", ВУП "Віцебскдругчормет", ВУП "Гомельдругчормет", ВУП "Гроднадругчормет", ВУП "Магілёўдругчормет", ААТ "БЕЛНІІЛІТ", СУП "Жлобінметалургбуд", ААТ "Жлобінскі кар'ер фармовачных матэрыялаў", СУП "Папаратнае", ГВУП "Металурггандаль", ВУП "Колермет", ГУП "Металургтранс", ВГУП "Сэрвісны цэнтр "БМЗ".

Энергетыка

Паліўна-энергетычны комплекс (ПЭК) Беларусі ўключае сістэмы здабычы, транспарціроўкі, захоўвання і вытворчасці ўсіх відаў энерганосьбітаў. Каля 85% энергарэсурсаў, задзейнічаных у эканоміцы краіны, імпартуюцца. Ядро ПЭК – электраэнергетыка. Гэта адна з вядучых галін эканомікі, у тут сканцэнтраваны традыцыйна высокі ўзровень тэхнічнага і інжынернага патэнцыялу Беларусі. Газазабеспячэнне і транспарціроўку газу па тэрыторыі Беларусі забяспечвае ААТ "Газпрамтрансгаз Беларусь".

У будучым значную частку ПЭК у Беларусі зойме атамная энергетыка. У 2008 годзе было прынята рашэнне аб будаўніцтве ў краіне ўласнай атамнай электрастанцыі магутнасцю да 2000 МВт, што дасць магчымасць знізіць сабекошт выпускаемай электраэнергіі да 20%.

Вытворчасць прадуктаў харчавання, напіткаў і тытунёвых вырабаў

Сёння вытворчасць прадуктаў харчавання ў рэспубліцы - гэта сучасная галіна, якая дынамічна развіваецца, прадпрыемствамі якой выпускаецца больш за чвэрць прадукцыі апрацоўчай прамысловасці, што ў поўнай меры забяспечвае харчовую бяспеку краіны. Дзякуючы праведзенай маштабнай мадэрнізацыі і ўкараненню сучасных вытворчых тэхналогій прадпрыемствы галіны выпускаюць высакаякасную прадукцыю, якая карыстаецца стабільным попытам на ўнутраным рынку і за мяжой.

Асноўныя напрамкі развіцця галіны - вытворчасць малочных прадуктаў, мяса і мясапрадуктаў (больш як 50% у аб'ёме вытворчасці прадуктаў харчавання, напіткаў і тытунёвых вырабаў). Акрамя таго, у рэспубліцы ажыццяўляецца вытворчасць цукру і кандытарскіх вырабаў, перапрацоўка і кансерваванне рыбы і рыбных прадуктаў, фруктаў і агародніны.

Буйнейшымі прадпрыемствамі па вытворчасці прадуктаў харчавання і напіткаў з'яўляюцца ААТ "Савушкін прадукт", Беларуска-германскае СП "Санта-Брэмар" ТАА, ААТ "Слуцкі сыраробны камбінат", ААТ "Бабуліна крынка" - кіруючая кампанія холдынга "Магілёўская малочная кампанія "Бабуліна крынка", Ваўкавыскае ААТ "БЕЛЛАКТ",РВГУП "Малочны гасцінец", ААТ "Спартак", ААТ "Камунарка", ААТ "Брэсцкі мясакамбінат", ААТ "Бярозаўскі сыраробны камбінат", ААТ "Мілкавіта", ААТ "Ваўкавыскі мясакамбінат", ААТ "Малочны свет", ААТ "Гродзенскі мясакамбінат", ААТ "Мінскі мясакамбінат".

Сельская гаспадарка

Доля сельскагаспадарчай вытворчасці складае каля 6-7% аб'ёму ВУП. Пры гэтым у сельскагаспадарчым сектары працуе больш як 8% ад агульнай колькасці занятых у эканоміцы краіны.

Беларусь практычна поўнасцю забяспечвае сябе прадуктамі харчавання: імпарт складае менш як 10% усяго аб'ёму спажывання.

Акрамя таго, у краіне сканцэнтравана 21,2% сусветных пасеваў ільну. Сярод 22 вядучых вытворцаў ільновалакна Беларусь уваходзіць у першую пяцёрку.

Вытворчасць сельскагаспадарчай прадукцыі на душу насельніцтва ў рэспубліцы адпавядае ўзроўню развітых краін і па многіх пазіцыях (вытворчасць бульбы, цукровых буракоў, мяса, малака, яек) перавышае паказчыкі, дасягнутыя ў краінах СНД.

Па вытворчасці малака на душу насельніцтва Рэспубліка Беларусь займае адну з лідзіруючых пазіцый у свеце і апярэджвае такія краіны, як Расійская Федэрацыя, Украіна, Казахстан. Вытворчасць малака на душу насельніцтва ў краіне дасягнула 775 кг. У сусветнай вытворчасці малака Рэспубліка Беларусь займае 0,9%.

Беларусь уваходзіць у 15 краін - буйнейшых сусветных экспарцёраў малочнай прадукцыі, прычым па сметанковым масле займае сёмы радок сусветнага рэйтынгу, па маслёнцы, ёгурце, кефіры - восьмы, па малаку і вяршках згушчаных і сухіх - трынаццаты, па малочнай сыроватцы - пятнаццаты.

Пры вытворчасці мяса ў забойнай вазе на душу насельніцтва (129 кг) наша краіна, як і па малаку, апярэджвае Расійскую Федэрацыю, Украіну, Казахстан. Пры гэтым на аднаго жыхара Рэспублікі Беларусь вырабляецца мяса ў два разы больш, чым у Расійскай Федэрацыі, Украіне, Казахстане.

Доля Рэспублікі Беларусь у сусветнай вытворчасці мяса складае 0,4%.

Мы ўваходзім у 30 краін - лідараў па экспарце мяса, пры гэтым па мясе птушкі займаем сямнаццаты радок сусветнага рэйтынгу, па ялавічыне - васямнаццаты.

Паводле даных Харчовай і сельскагаспадарчай арганізацыі ААН (ФАО), па валавым зборы (у вартасным выражэнні) ільновалакна Беларусь знаходзіцца на 3-м месцы ў свеце, журавін - на 7-м, жыта - на 5-м, цукровых буракоў, клубніц - на 15-м месцы.

Транспарт і лагістыка

Беларусь – важнейшая транспартная артэрыя еўразійскай прасторы. Штогод праз тэрыторыю краіны праходзіць звыш 100 млн т еўрапейскіх грузаў, з іх амаль 90% – паміж Расійскай Федэрацыяй і ЕС. Пры гэтым рэспубліка ў поўнай меры забяспечвае аператыўнасць і бяспеку транзіту. Транспартныя паслугі аказваюцца чыгуначным, аўтамабільным, паветраным, рачным і трубаправодным відамі транспарту.

Інфармацыйна-камунікацыйныя тэхналогіі

Інфармацыйна-камунікацыйным тэхналогіям адводзіцца роля неабходнага інструменту развіцця высокатэхналагічнага сектара эканомікі, які стварае ўмовы для пераходу да лічбавай эканомікі, удасканалення інстытуцыянальнага і фарміравання спрыяльнага бізнес-асяроддзя.

У мэтах стварэння спрыяльных умоў для павышэння канкурэнтаздольнасці галін эканомікі, заснаваных на новых і высокіх тэхналогіях, удасканалення ўмоў для правядзення распрацовак сучасных тэхналогій і павелічэння іх экспарту, прыцягнення ў гэту сферу айчынных і замежных інвестыцый у Беларусі быў створаны Парк высокіх тэхналогій (ПВТ).

Першыя кампаніі-рэзідэнты былі зарэгістраваны ў Парку ў чэрвені 2006 года. Сёння ПВТ - адзін з вядучых інавацыйных ІТ-кластараў у Цэнтральнай і Усходняй Еўропе. У ПВТ створана ўнікальнае спрыяльнае асяроддзе для развіцця бізнесу ў галіне інфармацыйных тэхналогій, у якім беспрэцэдэнтныя падатковыя льготы спалучаюцца з наяўнасцю добра падрыхтаваных спецыялістаў для ІТ-галіны.

Беларускія спецыялісты ўдзельнічаюць у ІТ-праектах любой складанасці, пачынаючы з сістэмнага аналізу, кансалтынгу, падбору апаратных сродкаў і заканчваючы канструяваннем і распрацоўкай складаных сістэм.

Спажыўцамі беларускага праграмнага забеспячэння, створанага рэзідэнтамі ПВТ, з'яўляюцца вядомыя сусветныя карпарацыі, такія як Microsoft, HP, Coca-Cola, Colgate-Palmolive, Google, Toyota, Citibank, MTV, Expedia, Reuters, Samsung, HTC, Mitsubishi, BritishPetroleum, BritishTelecom, Лонданская фондавая біржа, Сусветны банк і іншыя.

Кампаніі - рэзідэнты ПВТ уваходзяць у спіс буйнейшых распрацоўшчыкаў і пастаўшчыкоў праграмнага забеспячэння «Software 500», публікуемы ўплывовым выданнем сусветнай ІТ-індустрыі SoftwareMagazine, і паспяхова канкурыруюць на высокатэхналагічных рынках Паўночнай Амерыкі і Заходняй Еўропы.

З развіццём інфармацыйна-камунікацыйных тэхналогій узрастае ўклад вытворчасці тавараў і паслуг, звязаных з ІКТ, у стварэнне дабаўленай вартасці. Доля валавой дабаўленай вартасці сектара ІКТ у валавым унутраным прадукце Рэспублікі Беларусь вырасла з 2,8% ў 2011 годзе да 5,6% ў 2018 годзе.

Доля экспарту камп'ютарных паслуг у агульным аб'ёме экспарту паслуг Рэспублікі Беларусь вырасла з 2011 года ў 3,7 раза і склала ў 2018 годзе 18% (у 2017 годзе - 15,3%). Каля 90% беларускага экспарту камп'ютарных паслуг забяспечваецца рэзідэнтамі Парка высокіх тэхналогій.

Паводле ацэнкі Міжнароднага саюза электрасувязі ў рэйтынгу, апублікаваным у 2017 годзе, Рэспубліка Беларусь па індэксе развіцця інфармацыйна-камунікацыйных тэхналогій заняла 32-е месца ў рэйтынгу са 176 краін.

У адпаведнасці са справаздачай ААН "Электронны ўрад. Агляд 2018: Электронны ўрад як падтрымка ўстойлівага развіцця" Рэспубліка Беларусь заняла 38-е месца ў рэйтынгу па індэксе гатоўнасці да электроннага ўраду са 193 краін свету, перамясціўшыся на 11 пазіцый уверх у параўнанні з рэйтынгам 2016 года. Яна ўпершыню ўвайшла ў топ-40.

У рэспубліцы сеткамі сотавай рухомай электрасувязі ахоплена 98,2% тэрыторыі, на якой пражывае 99,9% насельніцтва. Вядзецца актыўнае развіццё сетак сотавай рухомай электрасувязі чацвёртага пакалення.

На 1 студзеня 2019 г. колькасць абанентаў сотавай рухомай электрасувязі склала 11,6 мільёна.

Доступ да сеткі Інтэрнэт мелі 78,4% дамашніх гаспадарак (сярэдняе значэнне гэтага паказчыка ў свеце складае 53,6%).

На сённяшні дзень у Беларусі паслугамі сеткі Інтэрнэт карыстаюцца 79% насельніцтва ва ўзросце 6-72 гадоў, з іх амаль 80% выкарыстоўваюць сетку Інтэрнэт штодзённа.

Рэспубліка Беларусь першая сярод краін СНД завяршыла поўны пераход на лічбавае эфірнае вяшчанне.

Знешні гандаль

Разнастайнасць вырабляемай прадукцыі апрацоўчай прамысловасці вызначае профіль знешняга гандлю краіны і забяспечвае большую частку валютных паступленняў.

Больш як 60% вырабляемай прамысловай прадукцыі пастаўляецца на экспарт, што характэрна для краін з высокай ступенню развіцця і адкрытасці эканомікі.

Рэспубліка Беларусь зарэкамендавала сябе на сусветным рынку сельскагаспадарчай прадукцыі і прадуктаў харчавання. У 2018 годзе экспарт гэтай прадукцыі перасягнуў 5 млрд долараў, у агульным аб'ёме экспарту яе доля склала 15,6%.

Гандлёвыя адносіны Беларусь падтрымлівае амаль з усімі дзяржавамі свету. Асноўныя гандлёвыя партнёры рэспублікі - Расійская Федэрацыя (паводле даных за 2018 год - 49,2% ад усяго аб'ёму тавараабароту), Украіна (7,6%), Кітай (5%), Германія (4,6%), Злучанае Каралеўства Вялікабрытаніі і Паўночнай Ірландыі (4,7%), Польшча (3,5%), Нідэрланды (2,4%), Літва (2,1%), Турцыя (1,4%), Італія (1,3%), Казахстан (1,2%).

Расце месца і роля краіны на міжнародным рынку паслуг. У параўнанні з 2010 годам іх экспарт павялічыўся больш як у 1,8 раза.

Значны рост дэманстравалі камп'ютарныя паслугі, экспарт якіх павялічыўся больш як у 7 разоў у параўнанні з 2010 годам. Аб'ём экспарту гэтага віду паслуг у 2018 годзе перасягнуў 1,5 млрд долараў, а ўдзельная вага ў агульным аб'ёме экспарту вырасла з 4,5% да 18%.

Рэспубліка Беларусь уваходзіць у лік сусветных лідараў па экспарце ІТ-паслуг на душу насельніцтва. У рэйтынгу Топ-100 лепшых аўтсорсінгавых кампаній свету-2017 - шэсць ІТ-кампаній з беларускімі офісамі. Вядомасць нашай краіне прынеслі такія прадукты, як Viber і World of Tanks.

Банкаўская сістэма

Банкаўская сістэма Беларусі – гэта прынятая ў міжнароднай практыцы двухузроўневая сістэма, якая складаецца з цэнтральнага банка – Нацыянальнага банка Рэспублікі Беларусь і камерцыйных банкаў другога ўзроўню.

Асноўнай мэтай дзейнасці Нацыянальнага банка з'яўляецца падтрыманне цэнавай стабільнасці, што азначае забеспячэнне ўстойліва нізкага ўзроўню інфляцыі.

На 1 верасня 2019 года на тэрыторыі Рэспублікі Беларусь дзейнічаюць 27 банкаў і нябанкаўскіх крэдытна-фінансавых арганізацый, якія маюць права на ажыццяўленне банкаўскіх аперацый.

У адпаведнасці з Указам Прэзідэнта Рэспублікі Беларусь ад 21 чэрвеня 2011 года № 261 створана ААТ "Банк развіцця Рэспублікі Беларусь" у мэтах развіцця сістэмы фінансавання дзяржаўных праграм і сацыяльна значных інвестыцыйных праектаў, экспартнага крэдытавання.
Прэзідэнт Падзеі Дакументы Дзяржава Беларусь
© 2019, Прэс-служба Прэзідэнта Рэспублікі Беларусь
Настройкі шрыфту
Шрыфт:
Trebuchet MS
Georgia
Iнтэрвал памiж лiтарамі:
Стандартны
Павялічаны
Вялікі
Каляровая схема:
Чорным
па белым
Белым
па чорным
Цёмна-сінім
па блакітным
Карычневым
па бэжавым
Вярнуць стандартныя настройкі
Закрыць