Адкрыццё зборачнай вытворчасці беларускай сельгастэхнікі ў Таджыкістане

Прэзідэнты Беларусі і Таджыкістана Аляксандр Лукашэнка і Эмамалі Рахмон 16 мая афіцыйна адкрылі зборачную вытворчасць беларускай сельгастэхнікі, якая размешчана ў горадзе Гісары.

Кіраўнікі дзяржаў з гэтай нагоды адкрылі памятны знак на тэрыторыі прадпрыемства, азнаёміліся з вытворчасцю, абмеркавалі перспектывы яе развіцця, сустрэліся з работнікамі.

"У верасні я буду тут (на верасень 2018 года ў Таджыкістане запланавана пасяджэнне Савета кіраўнікоў дзяржаў СНД), і я пагляджу ўжо, як вы гандлюеце. У верасні вы ўжо даложыце нам, на якія рынкі выйшлі. Мы ж хочам стварыць тут апорную пляцоўку, каб разам выходзіць на іншыя рынкі", - заявіў Аляксандр Лукашэнка, звяртаючыся да кіраўніцтва ААТ "МТЗ" і прадпрыемства ў Гісары.

Гаворачы аб перспектывах развіцця вытворчасці і продажаў, Прэзідэнт Таджыкістана Эмамалі Рахмон адзначыў наяўнасць вялікай колькасці праектаў з міжнароднымі фінансавымі інстытутамі, якія дапамагаюць аграрнаму сектару ў краіне набываць тэхніку.

Кіраўнікам дзяржаў далажылі аб планах па лакалізацыі вытворчасці ў Гісары. Аляксандр Лукашэнка падтрымаў работу ў гэтым напрамку, каб частка вузлоў для збіраемай тэхнікі выраблялася непасрэдна ў Таджыкістане.

Размова таксама ішла аб практычнай падрыхтоўцы таджыкскіх спецыялістаў на канвеернай вытворчасці ў Беларусі. "Гэта (вытворчасць) - пачатак. І адсюль павінны пайсці інжынеры для Таджыкістана", - сказаў Прэзідэнт Беларусі.

Ён таксама адзначыў магчымасці выкарыстання тэхнікі МТЗ для патрэб камунальнай гарадской гаспадаркі і даручыў даставіць у Таджыкістан узоры адпаведнага навяснога абсталявання.

Аляксандр Лукашэнка адзначыў, што па шляху на зборачную вытворчасць беларускай сельгастэхнікі ў Гісары абмяркоўваў гэту тэму ў Эмамалі Рахмонам. У Таджыкістане таксама бываюць суровыя маразы ў зімовы перыяд, але мясцовыя сады выжываюць. "Няўжо ў Гомельскай і Брэсцкай абласцях мы не зможам, раянаваўшы, вырошчваць гэтыя культуры (якія растуць у Таджыкістане). Я адчуваю, што ў нас гэтыя сарты будуць расці", - адзначыў Прэзідэнт.

Ён даў даручэнне закласці па садзе ў кожнай з названых абласцей і выдзеліць пад іх дастатковую колькасць зямлі. "Трэба паспрабаваць. Клімат мяняецца. Мы кавуны вырошчваем у цэнтральнай Беларусі", - сказаў Аляксандр Лукашэнка.

Эмамалі Рахмон таксама даручыў арганізаваць адпаведную работу разам з беларускімі спецыялістамі і паабяцаў садзейнічанне, у тым ліку ў плане падрыхтоўкі неабходнай колькасці саджанцаў.

Цікава, што чарэшневы сад беларуска-таджыкскай дружбы з'явіцца і ў Таджыкістане. Пад яго ўжо адведзена месца і заказаны саджанцы.

Пасля наведвання прадпрыемства Прэзідэнт Таджыкістана запрасіў Кіраўніка беларускай дзяржавы ў госці ў свае загарадныя рэзідэнцыі "Варзоб" і "Такоб", размешчаныя ў маляўнічых горных месцах недалёка ад Душанбэ. Аляксандр Лукашэнка агледзеў прыродныя выдатныя мясціны і разам з Эмамалі Рахмонам прыняў удзел у неафіцыйным абедзе.

Візіт Аляксандра Лукашэнкі ў Таджыкістан завяршыўся. У аэрапорце Кіраўніка беларускай дзяржавы праводзіў асабіста Эмамалі Рахмон. У час кароткай размовы прэзідэнты падвялі вынікі візіту.