Віншаванне з Днём Канстытуцыі

Дарагія суайчыннікі!

Сардэчна віншую вас з Днём Канстытуцыі.

Гэта свята мае асаблівае значэнне для нашай суверэннай дзяржавы, для кожнага грамадзяніна.

Прыняцце Асноўнага Закона паклала пачатак пазітыўным працэсам станаўлення і ўмацавання інстытутаў дзяржаўнай улады і грамадства, стала неабходнай умовай для дынамічнага развіцця эканамічнага, сацыяльнага і культурнага патэнцыялу Беларусі.

Канстытуцыяй гарантаваны грамадзянам фундаментальныя правы і свабоды, закладзена трывалая аснова прагрэсіўнай дэмакратычнай нарматворчасці, вызначана, што менавіта народ з'яўляецца носьбітам суверэнітэту і адзінай крыніцай улады.

Сёння мы цвёрда можам сказаць: Канстытуцыя паказала сваю жыццёвую сілу. Рэспубліка Беларусь упэўнена рухаецца наперад, развіваючы эканоміку і сацыяльную сферу, умацоўваючы свае міжнародныя пазіцыі. У краіне павышаюцца аб'ёмы прамысловай і сельскагаспадарчай вытворчасці, значна паляпшаецца

становішча ў адукацыі, ахове здароўя, жыллёвым будаўніцтве, адраджаюцца гарады і вёскі.

Нам трэба яшчэ многае зрабіць для кардынальнага павышэння якасці жыцця людзей і далейшага ўздыму эканомікі. Поспех у вырашэнні гэтых важнейшых задач залежыць ад кожнага з нас, ад нашай працы, дастойнага служэння Айчыне.

Наша сіла - у адзінстве народа і ўлады.

Жадаю ўсім аптымізму, дабра, дабрабыту, здароўя і шчасця.

Аляксандр Лукашэнка

15 сакавіка 2008 года