Нацыянальны акадэмічны Вялікі тэатр балета Рэспублікі Беларусь (да 1996 Дзяржаўны акадэмічны Вялікі тэатр оперы і балета) створаны ў 1933 годзе. Аднак гісторыя прафесійнага балета на тэрыторыі Беларусі бярэ свой пачатак з сярэдзіны XVIII стагоддзя, калі ў маёнтках князёў Радзівілаў у Нясвіжы і Слуцку, А. Тызенгаўза ў Гродне, М. К. Агінскага ў Слоніме, С. Г. Зорыча ў Шклове былі створаны першыя ў гісторыі Беларусі балетныя калектывы і школы.

У апошняй чвэрці XVIII стагоддзя на землі Беларусі пранікаюць эстэтычныя ідэі Ж. Ж. Новера. На змену «дывертысментнаму» перыяду прыходзіць «дзейсны» балет з яскрава выяўленым сюжэтам, са спецыяльна напісанай музыкай, са зладжанай кампазіцыяй танцаў. Новераўскія рэформы захопліваюць не толькі сцэны музычных тэатраў Нясвіжа, Гродна, Ружан, Слоніма, Шклова, але і становяцца асновай харэаграфічнай практыкі ў тэатрах Вільні і Варшавы.

Балетныя трупы князёў Радзівілаў у Нясвіжы і Слуцку, А. Тызенгаўза ў Гродне, М. К. Агінскага ў Слоніме, С. Г. Зорыча ў Шклове па напрамку рэпертуара, мастацкаму афармленню спектакляў і творчаму складу былі аналагічнымі балетным трупам прыдворных тэатраў Заходняй Еўропы і Расіі. «Мы ведаем па вопісах, запісках і паперах, што прадстаўленні, якія даваліся ў шклоўскім маёнтку Зорыча, пераўзыходзілі па хараству прыдворныя спектаклі рускія, былыя польскія, імператарскія аўстрыйскія ў Шэнбруне і французскія спектаклі ў Версалі», – так пісаў рэжысёр і даследчык рускага тэатра В. Р. Сахноўскі.

Аб адоранасці беларускіх артыстаў, аб адзінстве школы танца і ў цэлым аб высокім прафесійным узроўні балета на тэрыторыі Беларусі сведчыць факт перадачы ў канцы XVIII стагоддзя цэлай прыгонніцкай балетнай трупы са шклоўскага прыгоннага тэатра С. Г. Зорыча ў распараджэнне Дырэкцыі Санкт-Пецярбургскіх імператарскіх тэатраў. Нароўні са сталічнымі танцоўшчыкамі Санкт-Пецярбурга ўдзельнічалі беларускія артысты на чале з Кацярынай Азарычавай і Красцьянам Буткевічам.

Сягоння калектыў тэатра складаецца больш чым са 100 высокапрафесійных танцоўшчыкаў, большасць з якіх з’яўляюцца выпускнікамі Беларускага дзяржаўнага харэаграфічнага каледжа. Сярод салістаў тэатра ёсць народныя і заслужаныя артысты, лаўрэаты дзяржаўных прэмій, лаўрэаты і дыпламанты міжнародных конкурсаў артыстаў балета.

Работа па фарміраванні нацыянальнага рэпертуара тэатра пастаянна спалучаецца з творчым асваеннем балетаў класічнай спадчыны і стварэннем арыгінальных і сучасных спектакляў. Пастаноўшчыкі і артысты тэатра беражліва ўзнаўляюць спектаклі, якія створаны класікамі заходнееўрапейскай і рускай харэаграфіі — Ж. Перо, А. Бурнанвілем, М. Пеціпа, А. Горскім, Л. Івановым. Асваенне лексікі сучаснай харэаграфіі звязана, перш за ўсё, з этапнымі для гісторыі беларускага балета пастаноўкамі харэографа Валянціна Елізар’ева (з 1973 года — галоўны балетмайстар, з 1996 — мастацкі кіраўнік і дырэктар тэатра). Створаныя В. Елізар’евым балеты “Кармэн-сюіта”, “Стварэнне свету”, “Спартак”, “Шчаўкунок”, “Карміна Бурана”, “Балеро”, “Рамэо і Джульета”, “Страсці”, “Жар-птушка”, “Вясна свяшчэнная”, “Легенда аб Уленшпігелі” сталі візітнай карткай калектыву на радзіме і за мяжой.

За апошнія 15 гадоў калектыў Нацыянальнага балета Беларусі пабываў больш чым у 30 краінах свету, прычым у многіх краінах гастраляваў неаднаразова. Напэўна, на геаграфічнай карце хутка застанецца зусім мала дзяржаў, дзе хаця б адзін раз не выступаў Беларускі балет: ад Партугаліі і Іспаніі да Японіі і Кітая, ад Нарвегіі і Вялікабрытаніі да Турцыі і Тайланда — усюды тэатр знайшоў сваіх палымяных паклоннікаў. Акрамя гастроляў, трупа на працягу аднаго тэатральнага сезону дае каля 150 спектакляў на асноўнай сцэне.

Афіцыйны сайт тэатра: www.balet.by

АФIША

У сувязі з рэканструкцыяй і рэстаўрацыяй памяшкання тэатра спектаклі будуць праходзіць на сцэне Палаца Рэспублікі. 

Адрас Палаца Рэспублікі:
Кастрычніцкая плошча, 1. Праезд — метро «Кастрычніцкая», метро «Купалаўская», аўтобусам № 100 да прыпынку «Кастрычніцкая плошча». .

Адрас тэатра: г. Мінск, пл. Парыжскай Камуны, 1. Праезд да прыпынку «Оперны тэатр» ці «вуліца Камуністычная» аўтобусамі №№ 24, 38, 57, 91; тралейбусамі №№ 12, 29, 37, 40, 46, 53.

Заказ і дастўка  білетаў па тэл. 8-029-315-45-74

Кантакты

Тэлефоны:
+375 (17) 234 16 16 (прыёмная),
+375 (17) 234 80 74 (білетны стол),
+375 (17) 234 06 66

E-mail: pr@balet.by.