Сустрэча з Прэм'ер-міністрам Сербіі Анай Брнабіч

Беларусь гатова да пашырэння сумесных з Сербіяй праектаў у эканоміцы, культуры і спорце. Аб гэтым Прэзідэнт Беларусі Аляксандр Лукашэнка заявіў 31 кастрычніка на сустрэчы з Прэм'ер-міністрам Сербіі Анай Брнабіч, якая ўдзельнічала ў сустрэчы Асноўнай групы Мюнхенскай канферэнцыі па бяспецы.

Кіраўнік дзяржавы цёпла вітаў сербскую госцю і сказаў, што вельмі прыемна бачыць у Беларусі прадстаўніка брацкай і дружалюбнай нам Сербіі. Ён падкрэсліў, што ў Беларусі ўважліва сочаць за тым, што адбываецца ў Сербіі, і перажываюць за праблемы гэтай краіны, радуюцца, калі ўсё ідзе добра.

Аляксандр Лукашэнка падкрэсліў, што не проста так у ходзе свайго выступлення на сустрэчы Асноўнай групы Мюнхенскай канферэнцыі па бяспецы закрануў пытанне Балкан. "Нас насцярожваюць тыя працэсы, якія адбываюцца вакол Балкан. Мы глядзім на ацэнкі некаторых, у тым ліку заходніх палітыкаў, якія адкрыта пачынаюць пагаворваць аб нейкім канфлікце на Балканах, гавораць аб тым, што вы жывяце ў вельмі складаным рэгіёне, дзе перасякаюцца інтарэсы многіх дзяржаў", - заявіў Прэзідэнт.

"І гэта блізка Беларусі. І тут мы падобныя адзін на аднаго", - заўважыў ён. Кіраўнік дзяржавы, гаворачы пра добрыя адносіны паміж беларускім і сербскім народамі, запэўніў, што так будзе і ў далейшым. "Мы заўсёды будзем побач з вамі і заўсёды гатовы зрабіць максімум таго, на што здольны", - падкрэсліў ён. Разам з гэтым Аляксандр Лукашэнка выказаў упэўненасць, што Беларусь і Сербія павінны больш актыўна развіваць гандлёва-эканамічнае супрацоўніцтва, у тым ліку ствараць сумесныя прадпрыемствы, асабліва на сербскай тэрыторыі, і калі будзе гатоўнасць з сербскага боку, то Беларусь гатова пашыраць кантакты таксама ў галіне культуры і спорту.

Прэм'ер-міністр Сербіі Ана Брнабіч перадала Прэзідэнту Беларусі запрашэнне яго сербскага калегі наведаць Бялград.

"Вы аказалі б нам вялікую пашану, прыехаўшы ў нашу краіну", - сказала кіраўнік сербскага Урада. Пры гэтым яна падкрэсліла, што Прэзідэнт Сербіі ставіцца з асаблівай павагай да Аляксандра Лукашэнкі.

Ана Брнабіч выказала захапленне тым, наколькі адкрыта, шчыра і прама гаварыў Аляксандр Лукашэнка ў сваім выступленні ў час сустрэчы Асноўнай групы Мюнхенскай канферэнцыі па бяспецы.

Яна таксама падзякавала беларускаму лідару за цёплае стаўленне да сербскага народа і падкрэсліла, што Аляксандр Лукашэнка быў адзіным сусветным лідарам, які прыехаў у цяжкі для Сербіі перыяд у час бамбардзіроўкі, каб падтрымаць сербскі народ.

Паводле слоў Прэм'ер-міністра Сербіі, для яе выключна важна, што яе так цёпла і сардэчна прымалі ў ходзе гэтага візіту ў Мінск.