Бел
Галоўная   /  Падзеі

Сустрэча з намеснікам Дзяржсакратара ЗША па палітычных пытаннях Дэвідам Хэйлам

17 верасня 2019 года

У Беларусі будуць рабіць усё для далейшага развіцця адносін са Злучанымі Штатамі Амерыкі. Аб гэтым Прэзідэнт Беларусі Аляксандр Лукашэнка заявіў 17 верасня на сустрэчы з намеснікам Дзяржаўнага сакратара ЗША па палітычных пытаннях Дэвідам Хэйлам.

"Прыемна Вас бачыць тут - не толькі ў Беларусі, але і ва Усходняй Еўропе. Я з задавальненнем хачу адзначыць, што гэта сведчанне таго, што ЗША нарэшце звярнулі ўвагу не толькі на Еўропу ў цэлым, але і на Беларусь, - сказаў Кіраўнік дзяржавы. - А ў гэты складаны час ваш інтарэс да гэтага рэгіёна абнадзейвае".

"Магчыма, мы знаходзімся ў палоне нейкіх выдумак СМІ. Але як нам тут здаецца ў Беларусі, Еўропа і наогул планета перажываюць няпросты, складаны час", - лічыць Прэзідэнт.

Ён адзначыў, што часта ў гэтым абвінавачваюць ЗША. "Але мы добра разумеем, што не бывае так у жыцці, што адзін нехта вінаваты, а ўсе астатнія мяккія, белыя і пушыстыя. Напэўна, тут і мы ўсе вінаватыя ў тым, што складваецца такая сітуацыя ў свеце", - сказаў Аляксандр Лукашэнка.

"Я перакананы, што Ваш візіт па меншай меры кіраўніцтву Беларусі, беларускаму народу прадаставіць магчымасць больш аб'ектыўна паглядзець на свет, зыходзячы з той інфармацыі, якую я разлічваю атрымаць ад вельмі інфармаванага чалавека", - дадаў Кіраўнік дзяржавы.

Паводле яго слоў, нядаўна з'явілася абнадзейлівая, добрая інфармацыя, звязаная з ракетамі сярэдняй і меншай далёкасці. "Нас гэта хвалюе, таму што Беларусь з'яўляецца ўдзельніцай дагавора (Дагавор аб ліквідацыі ракет сярэдняй і меншай далёкасці. - Заўвага). Дагавор на сённяшні дзень практычна разбураны, але з'явіліся заявы аб тым, што ні НАТА, ні Расія не збіраюцца размяшчаць у Еўропе гэтыя ракеты, - сказаў Прэзідэнт. - Я ў сваю чаргу нядаўна сказаў аб тым, што мы ні ў якім разе не будзем ініцыятарамі нядобрых спраў па разбурэнні гэтага дагавора. Больш таго, мы ніколі не станем такія ракеты размяшчаць на тэрыторыі Беларусі для таго, каб ускладняць абстаноўку (калі гэта не пагражае нашай бяспецы). Але гэтыя дзве заявы - з Захаду і з Усходу - пераконваюць мяне ў тым, што нам не давядзецца ў Беларусі звяртацца да гэтых крайніх мер. На гэта ў нас няма ні жадання, ні лішніх грошай".

Аляксандр Лукашэнка звярнуў увагу, што ў апошняй вайне Беларусь страціла трэць насельніцтва, прычым змагалася супраць агрэсара ў тым ліку разам з ЗША. "Нам не хацелася б, каб зноў на тэрыторыі нашай Беларусі запахла паленым", - адзначыў ён.



"Што датычыцца праблем Еўропы, і асабліва Усходняй Еўропы, у прыватнасці Украіны, я абсалютна перакананы на сённяшні дзень, што без удзелу ЗША гэты канфлікт урэгуляваць не атрымаецца", - заявіў беларускі лідар.

Ён дадаў, што гэта азбука дыпламатыі: калі не атрымліваецца нешта ў перагаворшчыкаў, то трэба ўключаць новыя сілы. "Новыя ідэі павінны з'явіцца, - лічыць Аляксандр Лукашэнка. - Думаю, што ЗША маглі б садзейнічаць урэгуляванню гэтага канфлікту".

"Што датычыцца нашых з вамі адносін, Вы вельмі добра ведаеце і інфармаваны ў тым, што гэта не адзіны сігнал, які мы пасылаем кіраўніцтву ЗША аб нармалізацыі адносін. Гэта ненармальна, што ў сучасным свеце дзве дзяржавы, якія некалі ваявалі на адным баку супраць ворага, сёння маюць такія, так бы мовіць, слабыя адносіны", - сказаў Прэзідэнт.

"Мы будзем рабіць усё, каб нашы адносіны развіваліся", - падкрэсліў беларускі лідар.

У сваю чаргу Дэвід Хэйл перадаў прывітанне ад Дзяржаўнага сакратара ЗША і адзначыў важны гістарычны момант у двухбаковых адносінах - намер аднавіць узровень дыппрадстаўніцтва на ўзроўні паслоў. "Мы згодны з Вамі, што той стан спраў ненатуральны, ненармальны. І мы рады, што гэта глава завяршаецца. Мы закрываем гэты раздзел па прычыне тых крокаў, якія Ваша краіна і Вы асабіста зрабілі. Таксама адзначаем тое бачанне, якое вы прынялі на ўзбраенне - большай разнастайнасці як ва ўнутраных справах, так і ў адносінах са знешнім светам. Мы вельмі моцна падтрымліваем гэта бачанне і зробім усё магчымае, каб дапамагчы вам на гэтым шляху", - падкрэсліў намеснік Дзяржсакратара ЗША.

Ён адзначыў, што ЗША гэта робяць не з мэтай спаборніцтва з нейкай іншай краінай, а толькі ў мэтах таго, каб патэнцыял двухбаковых адносін быў рэалізаваны ў поўнай меры.

"Нам вельмі дарагі гэты рэгіён і мы вельмі ўважліва ставімся да пагроз бяспецы. Мы таксама моцна падтрымліваем суверэнітэт і незалежнасць Беларусі", - сказаў Дэвід Хэйл.

На завяршэнне сустрэчы Аляксандр Лукашэнка падарыў Дэвіду Хэйлу эксклюзіўны набор шакаладу і альбом "Спадчына Беларусі".


Тэгі: Сустрэчы
© 2019, Прэс-служба Прэзідэнта Рэспублікі Беларусь